സൂരിയെ നായകനാക്കി മതിമാരൻ പുകഴേന്തി സംവിധാനം ചെയ്ത ‘മണ്ടാടി’ തിയേറ്ററുകളിൽ ആവേശം തീര്‍ക്കുകയാണ്. കടലിലെ പോരാട്ടത്തിന്റെ കഥ പറയുന്ന ചിത്രം മികച്ച പ്രേക്ഷക പ്രതികരണം നേടി ആഗോള ബോക്സ് ഓഫീസിൽ 100 കോടി ക്ലബ്ബിലേക്ക് എത്തിയിരിക്കുകയാണ്. സെൽഫിക്ക് ശേഷം മതിമാരൻ പുകഴേന്തി ഒരുക്കുന്ന ഈ ചിത്രത്തില്‍ മലയാളത്തിന്റെ പ്രിയ താരം മഹിമ നമ്പ്യാരാണ് നായിക. ഈ സിനിമയിലെ ‘ഉസിരേ നീ താൻ’ എന്ന ഗാനരംഗം ഷൂട്ട് ചെയ്യുന്നതിന് അഞ്ച് ദിവസം മുൻപ് മഹിമയ്ക്ക് ഗുരുതരമായ വാഹനാപകടം സംഭവിച്ചിരുന്നു.അപകടത്തിൽ മുഖത്തിന് സാരമായി പരിക്കേറ്റ താരത്തിന് 20-ലേറെ തുന്നലുകൾ വേണ്ടിവന്നു.
ഇപ്പോഴിതാ അപകടം നടന്ന ശേഷവും അഭിനയിക്കാന്‍ വന്ന മഹിമ നമ്പ്യാരെ പ്രശംസിക്കുകയാണ് സംവിധായകൻ മതിമാരൻ പുകഴേന്തി. ചിത്രത്തിലെ ഹിറ്റ് ഗാനമായ ‘ഉസിരേ നീ താൻ’ ചിത്രീകരിക്കുന്നതിന് ഏതാനും ദിവസങ്ങള്‍ക്ക് മുൻപ് മഹിമയ്ക്ക് ഗുരുതരമായ അപകടം സംഭവിച്ചിരുന്നുവെന്നും, മുഖത്ത് 20-ലേറെ തുന്നലുകളിട്ട അവസ്ഥയിലും പ്ലാസ്റ്റിക് സർജറി കഴിഞ്ഞ് ആറാം നാള്‍ താരം ഷൂട്ടിങ്ങിനായി സെറ്റിലെത്തിയെന്നുമാണ് മതിമാരന്‍ പറയുന്നത്.
‘‘ഉസിരേ നീ താന്‍ പാട്ടിനെക്കുറിച്ച്‌ പറയുമ്പോള്‍, നിങ്ങള്‍ക്ക് അതിനു മുമ്പ് നടന്ന അപകടത്തെക്കുറിച്ച്‌ ആര്‍ക്കും അറിയില്ലെന്ന് തോന്നുന്നു. ഞാന്‍ അതേക്കുറിച്ച്‌ പറയണമെന്ന് വിചാരിക്കുന്നു. അതില്‍ 20 ന് മുകളില്‍ സ്റ്റിച്ചുണ്ടായിരുന്നു. മുഖം മൊത്തം കൊളാപ്‌സ് ആയിപ്പോയിരുന്നു. പാട്ട് എടുക്കുന്നതിന്റെ അഞ്ച് ദിവസം മുമ്പ് അവര്‍ക്കൊരു അപകടമുണ്ടായി. മുഖമാകെ തകര്‍ന്നുപോയി. 20 ന് മുകളില്‍ സ്റ്റിച്ചിട്ടിരുന്നു. അവര്‍ എനിക്കൊരു സെല്‍ഫി അയച്ചു തന്നിരുന്നു. നാണമില്ലാതെ ഞാന്‍ ചോദിച്ചത് ഷൂട്ടിങിന് വരുമോ എന്നായിരുന്നു. എനിക്ക് വേറെ വഴിയില്ലായിരുന്നു. പ്ലാസ്റ്റിക് സര്‍ജറി ചെയ്ത് ആറാം ദിവസം ഷൂട്ടിങിന് വന്നു. ആ പാട്ടിന് പിന്നില്‍ ഈ ഡെഡിക്കേഷനുണ്ട്. ഞാനത് ഒരിക്കലും മറക്കില്ല...’’ എന്നാണ് മതിമാരൻ പറഞ്ഞത്. സിനിമയുടെ സക്സസ് മീറ്റില്‍ സംസാരിക്കവെയാണ് മഹിമയുടെ ഈ സമർപ്പണത്തെക്കുറിച്ച്‌ സംവിധായകന്‍ പറഞ്ഞത്. നിറഞ്ഞ കൈയടിയോടെയാണ് സദസ്സ് മതിമാരന്റെ വാക്കുകള്‍ ഏറ്റെടുത്തത്. മഹിമയുടെ ഡെഡിക്കേഷനെ പ്രശംസിച്ച് പലരും കമന്റുകളും കുറിക്കുന്നുണ്ട്.
‘കാര്യസ്ഥൻ’ എന്ന സിനിമയിലൂടെയാണ് മഹിമ നമ്പ്യാര്‍ ബിഗ്സ്ക്രീനിലേക്ക് എത്തിയത്. മലയാളത്തിലും തമിഴിലുമായി നിരവധി ശ്രദ്ധേയ കഥാപാത്രങ്ങളെ അവതരിപ്പിച്ച താരം ഏറെ ശ്രദ്ധിക്കപ്പെട്ടത് ഇര, ആർഡിഎക്സ്, ജയ് ഗണേഷ് തുടങ്ങിയ ചിത്രങ്ങളിലൂടെയാണ്. സൂരി നായകനായെത്തിയ ‘മണ്ടാടി’ യിലെ അഭിനയവും മഹിമയുടെ കരിയറില്‍ ഏറെ പ്രശംസ നേടിയതാണ്.
Comments