റാന്തംബോർ ദേശീയോദ്യാനത്തിലെ സഫാരിക്കിടെ വിനോദസഞ്ചാരികൾ കണ്ട കാഴ്ചയാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. സഫാരി പാതയുടെ നടുവിൽ ഒരു കടുവ കിടന്നുറങ്ങുന്നതായിരുന്നു സംഭവം. കടുവയെ മറികടന്ന് മുന്നോട്ടുപോകാൻ കഴിയാതെ വന്നതോടെ പിന്നാലെയെത്തിയ സഫാരി വാഹനങ്ങൾ ഓരോന്നായി നിർത്തി. ഇതോടെ വനത്തിനുള്ളിൽ തന്നെ വ്യത്യസ്തമായൊരു ‘ട്രാഫിക് ജാം’ രൂപപ്പെട്ടു.
കടുവയെ കാണാനെത്തിയ സഞ്ചാരികൾക്ക് അപ്രതീക്ഷിതമായി ലഭിച്ച കാഴ്ചയായിരുന്നു ഇത്. മൺപാതയിൽ യാതൊരു ഭയവുമില്ലാതെ കിടന്ന കടുവയെ നിരവധി സഫാരി വാഹനങ്ങളിലുണ്ടായിരുന്നവർ ദൂരത്തുനിന്ന് നോക്കിനിന്നു. വാഹനങ്ങളുടെ നീണ്ട നിരയ്ക്കിടയിലും കടുവ തന്റെ ഉറക്കം തുടർന്നതോടെ ദൃശ്യം കൂടുതൽ കൗതുകകരമായി.
കുറച്ചുസമയത്തിന് ശേഷം കടുവ ഉറക്കമുണർന്ന് എഴുന്നേറ്റു. ശരീരം നീട്ടിയശേഷം പതുക്കെ റോഡിൽ നിന്ന് മാറി കാട്ടിലേക്ക് നടന്നുപോയതോടെയാണ് വാഹനങ്ങൾക്ക് മുന്നോട്ടുപോകാൻ വഴിയൊരുങ്ങിയത്. ഏകദേശം 200 കിലോഗ്രാം ഭാരമുള്ള കടുവയുടെ ‘ഉച്ചയുറക്കം’ കാരണം 30 ഓളം സഫാരി ജീപ്പുകൾ കാത്തുനിന്നതായാണ് വീഡിയോ പങ്കുവച്ച എലീന പറയുന്നത്.
സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പങ്കുവച്ചതോടെ നിരവധി പേരാണ് വീഡിയോ ഏറ്റെടുത്തത്. സാധാരണയായി വന്യജീവികളെ കാണാനാണ് സഞ്ചാരികൾ സഫാരിക്കെത്തുന്നത്. എന്നാൽ ഇത്തവണ സഞ്ചാരികളുടെ യാത്ര തന്നെ തടഞ്ഞ് കടുവ ‘വഴിയിലെ താരമായി’ മാറുകയായിരുന്നു. കടുവയുടെ സ്വസ്ഥമായ ഉറക്കവും പിന്നിൽ കാത്തുകിടക്കുന്ന സഫാരി വാഹനങ്ങളുടെ നിരയുമാണ് വീഡിയോയെ വൈറലാക്കിയത്.
Comments