‘ഇനി ഞാൻ തന്നെ ഓർഡർ ചെയ്യും’; കൊച്ചുമകളിൽ നിന്ന് ഓൺലൈൻ ഷോപ്പിങ് പഠിച്ച് നാനി, രസകരമായ വീഡിയോ വൈറൽ

കൊച്ചുമകളിൽ നിന്ന് ഓൺലൈൻ ഷോപ്പിങ് പഠിക്കുന്ന നാനിയുടെ രസകരമായ വീഡിയോയാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. ഓൺലൈനായി സാധനങ്ങൾ ഓർഡർ ചെയ്യുന്നത് എങ്ങനെയെന്ന് കൊച്ചുമകൾ ഓരോ ഘട്ടമായി പറഞ്ഞുകൊടുക്കുമ്പോൾ നാനി അതെല്ലാം ശ്രദ്ധയോടെ പഠിക്കുകയായിരുന്നു. സ്നേഹവും കൗതുകവും നിറഞ്ഞ ഇരുവരുടെയും ഈ നിമിഷം സോഷ്യൽ മീഡിയ ഉപയോക്താക്കളുടെ ശ്രദ്ധ നേടി.

ആപ്പ് തുറക്കുന്നതുമുതൽ ആവശ്യമായ സാധനം തിരയുന്നതും ഓർഡർ ചെയ്യുന്നതുമെല്ലാം കൊച്ചുമകൾ നാനിക്ക് വിശദീകരിച്ചുകൊടുത്തു. കാര്യങ്ങൾ മറന്നുപോകാതിരിക്കാൻ ഓരോ ഘട്ടവും നാനി ഒരു നോട്ട്ബുക്കിൽ കുറിച്ചെടുക്കുന്നതാണ് വീഡിയോയിലെ ഏറ്റവും രസകരമായ ഭാഗം. ഷാംപൂ ഉൾപ്പെടെയുള്ള സാധനങ്ങൾ എങ്ങനെ തിരഞ്ഞെടുത്ത് ഓർഡർ ചെയ്യാമെന്നും കൊച്ചുമകൾ കാണിച്ചുകൊടുത്തു.

ഓർഡർ എത്താൻ എത്ര സമയമെടുക്കുമെന്ന കാര്യവും നാനി പ്രത്യേകം കുറിച്ചുവെച്ചു. എന്നാൽ ഓരോ ഓർഡറിനും ഡെലിവറി സമയം വ്യത്യസ്തമായിരിക്കുമെന്ന് കൊച്ചുമകൾ തിരുത്തിപ്പറഞ്ഞു. പഠിപ്പിച്ച കാര്യങ്ങൾ വളരെ ഗൗരവത്തോടെ കുറിച്ചെടുത്ത നാനിയുടെ സമീപനമാണ് വീഡിയോ കണ്ടവരെ കൂടുതൽ ആകർഷിച്ചത്.

പിന്നീട് ഓർഡർ ചെയ്ത സാധനങ്ങൾ ലഭിച്ചതോടെ നാനിയുടെ സന്തോഷവും വീഡിയോയിൽ കാണാം. കൊച്ചുമകൾക്ക് നന്ദി പറഞ്ഞ നാനി പഠിച്ച കാര്യങ്ങൾ സ്വയം ഉപയോഗിക്കാനുള്ള ആവേശത്തിലായിരുന്നു. വീഡിയോ വൈറലായതോടെ നിരവധി പേരാണ് ഇരുവരുടെയും സ്നേഹബന്ധത്തെ പ്രശംസിച്ച് കമന്റുകളുമായി എത്തിയത്.