തിരുവനന്തപുരം: കഴിഞ്ഞ സര്‍ക്കാരിന്റെ കാലത്ത് പ്രവാസികളെ ലക്ഷ്യം വെച്ച് ഒരുക്കിയ ലോകകേരളസഭ ധൂര്‍ത്തും ചെലവുമാണെന്ന് മുഖ്യമന്ത്രി വി.ഡി. സതീശന്‍. ലോകകേരളസഭ പിരിച്ചുവിട്ടതായും പറഞ്ഞു. പ്രവാസികള്‍ക്ക് അവരുടെ വിഷയം ചര്‍ച്ച ചെയ്യാന്‍ പ്രത്യേക പ്ലാറ്റ് ഫോമുണ്ടാക്കും. ഇത് പഠിക്കാന്‍ പ്രത്യേക ഉപസമിതിയെ വെക്കുമെന്നും അദ്ദേഹം വ്യക്തമാക്കി.
സിഎംആര്‍എല്‍ - എക്‌സാലോജിക് കേസുമായി ബന്ധപ്പെട്ട ഇ.ഡി. കത്തിലെ അന്വേഷണം നിയമോപദേശത്തിന് ശേഷം തീരുമാനിച്ചതാണ്. അന്വേഷണം നിയമപരമായ ബാധ്യതയാണെന്നും പറഞ്ഞു. കെ.എം. ഷാജി സ്വകാര്യ വാഹനം ഉപയോഗിച്ചതില്‍ ഒരു തെറ്റുമില്ലെന്നും അതിന് അദ്ദേഹത്തിന് അനുമതി നല്‍കിയിരുന്നതായും പറഞ്ഞു. മുന്‍ മന്ത്രിമാരും ഇങ്ങിനെ സ്വകാര്യ വ്യക്തികളുടെ വാഹനം ഔദ്യോഗിക കാര്യത്തിനായി ഉപയോഗിച്ച ചരിത്രമുണ്ടെന്നും പറഞ്ഞു. ഇഎസ്എ മാപ്പ് ഉടന്‍ പ്രസിദ്ധീകരിക്കമെന്നും ജനവാസമേഖല ഒഴിവാക്കുമെന്നും പറഞ്ഞു.
മഴക്കെടുതിയില്‍ മരണപ്പെട്ടവരുടെ കുടുംബങ്ങള്‍ക്ക് എട്ടുലക്ഷം രൂപ ധനസഹായവും പ്രഖ്യാപിച്ചു. സംസ്ഥാനത്ത് റോഡപകടങ്ങള്‍ കൂടുകയാണെന്നും ഇക്കാര്യത്തില്‍ ബോധവല്‍ക്കരണവും കര്‍ശന നടപടികളുമുണ്ടാകും. വിവിധ വകുപ്പുകളെ ഏകോപിപ്പിച്ചുകൊണ്ട് കേരളപ്പിറവി വിപുലമായി ആഘോഷിക്കും. ഫെസ്റ്റിവെല്‍ കേരള സംഘടിപ്പിക്കുമെന്നും പറഞ്ഞു.
Comments