ഒമാൻ തീരത്ത് ഇന്ത്യയിലേക്ക് വരികയായിരുന്ന കപ്പലിന് നേരെ ടോർപിഡോ ആക്രമണം; ഇന്ത്യൻ നാവികൻ കൊല്ലപ്പെട്ടു

മസ്കറ്റ്: ഒമാൻ തീരത്ത് 'എം.വി. കേപ് ദാവോ' എന്ന കപ്പലിന് നേരെ നടന്ന ടോർപിഡോ ആക്രമണത്തിൽ ഒരു ഇന്ത്യൻ നാവികൻ കൊല്ലപ്പെട്ടു. ഇന്ത്യയിലേക്ക് വരികയായിരുന്ന കപ്പലിന് നേരെ ആക്രമണമുണ്ടായതിനെ തുടർന്ന് ഒരു ഇന്ത്യൻ നാവികൻ കൊല്ലപ്പെട്ടതായി ഫോർവേഡ് സീമെൻസ് യൂണിയൻ ഓഫ് ഇന്ത്യ (എഫ്.എസ്.യു.ഐ) അറിയിച്ചു. ഉത്തർപ്രദേശിലെ ദേവരിയ സ്വദേശിയായ വൈപ്പർ സൂരജ് യാദവാണ് കൊല്ലപ്പെട്ടത്. രണ്ട് പേർക്ക് പരിക്കുപറ്റിയിട്ടുണ്ട്.

കപ്പലിന് നേരെ രണ്ട് ടോർപിഡോകൾ പതിച്ചതായി എഫ്.എസ്.യു.ഐ പറഞ്ഞു. ജീവനക്കാർ താമസിക്കുന്നതിനു സമീപമുള്ള ഇടനാഴിയുടെ വശത്തുള്ള സി-ഡെക്കിലാണ് ഒരു ടോർപിഡോ പതിച്ചത്, മറ്റൊന്ന് എഞ്ചിൻ റൂമിന് സമീപമുള്ള കപ്പലിന്റെ വശത്ത് പതിച്ചു. കപ്പലിൽ ആകെ 28 ജീവനക്കാരാണ് ഉണ്ടായിരുന്നത്, അതിൽ 20 പേർ ഇന്ത്യൻ പൗരന്മാരാണ്.

ഇന്ത്യൻ എംബസി ഉടൻ തന്നെ ഇടപെടുകയും സാഹചര്യം സൂക്ഷ്മമായി നിരീക്ഷിക്കുകയും ചെയ്തു. ഇന്ത്യൻ പൗരന്റെ മരണം സ്ഥിരീകരിച്ച അവർ, ദുഃഖിതരായ കുടുംബത്തിന് അനുശോചനം അറിയിച്ചു. കൂടാതെ, ബാക്കിയുള്ള ഇന്ത്യൻ ജീവനക്കാരുടെ സുരക്ഷയും പരിചരണവും നാട്ടിലേക്ക് മടങ്ങുന്നതിനുള്ള ക്രമീകരണങ്ങളും ഉറപ്പാക്കുന്നതിനായി ഒമാനി അധികാരികളുമായും പ്രാദേശിക റിക്രൂട്ട്‌മെന്റ്/പ്ലേസ്‌മെന്റ് ഏജൻസികളുമായും ചേർന്ന് സജീവമായി പ്രവർത്തിച്ചുവരികയാണ്. കപ്പലിലുണ്ടായിരുന്ന ഇന്ത്യൻ പൗരന്മാർ ഉൾപ്പെടെയുള്ള ജീവനക്കാരെ ഒമാനി അധികാരികൾ സുരക്ഷിതമായി ഒഴിപ്പിച്ചു.

ഈ മേഖലയിലെ നാവികരുടെ സുരക്ഷയെക്കുറിച്ചുള്ള ഉറപ്പുകൾ ആക്രമണത്തിന്റെ പശ്ചാത്തലത്തിൽ അർത്ഥശൂന്യമാണെന്ന് എഫ്.എസ്.യു.ഐ പ്രസ്താവനയിൽ വ്യക്തമാക്കി. "നിഷ്കളങ്കരായ സിവിലിയൻ നാവികർ ഹോർമുസിലും പരിസരത്തുമായി കൊല്ലപ്പെടുന്നു," എന്ന് യൂണിയൻ പറഞ്ഞു. സംഭവത്തിൽ ഉടനടി ഉത്തരവാദിത്തം പറയണമെന്ന് സംഘടന ആവശ്യപ്പെട്ടു. കൂടാതെ, ഈ മേഖലയിലൂടെ യാത്ര ചെയ്യുന്ന നാവികർക്ക് സുരക്ഷിതമായി സഞ്ചരിക്കാനുള്ള വഴിയൊരുക്കണമെന്നും, യാദവിനും "അപകടസാധ്യത നിലനിൽക്കുന്ന ഓരോ ഇന്ത്യൻ നാവികനും" നീതി ലഭ്യമാക്കണമെന്നും അവർ ആവശ്യപ്പെട്ടു.