സാംസ്കാരിക പ്രവർത്തകനും സംഗീത നാടക അക്കാദമി മുൻ ചെയർമാനുമായിരുന്ന സൂര്യ കൃഷ്ണമൂർത്തിയുടെവേർപാടിന്റെ നൊമ്പരത്തിലാണ് കലാ ലോകം. കല ഒരു തപസ്യയാണെന്നും ജീവിതം അതിന്റെ സമർപ്പണമാണെന്നും സ്വന്തം ജീവിതം കൊണ്ട് തെളിയിച്ച, അതിന്റെ അ ർത്ഥവും ആഴവും പകർന്നുനല്‍കിയ സർഗ്ഗപ്രതിഭയായിരുന്നു സൂര്യ കൃഷ്ണമൂർത്തി. ലോകത്തിലെ ഏറ്റവും വലിയ സാംസ്കാരിക കലാമേളയായ സൂര്യ ഫെസ്റ്റിലൂടെ വിശ്വപ്രതിഭകൾക്കായി കേരളത്തിൽ അരങ്ങൊരുക്കിയ വ്യക്തിത്വമാണ് വിടപറഞ്ഞത്. സൂര്യ ഫെസ്റ്റിവലിലൂടെ തങ്ങളുടെ കഴിവുകൾ പ്രകടമാകാത്ത കലാകാരന്മാർ കുറവാണെന്നു തന്നെ പറയാം.
ഇപ്പോഴിതാ സൂര്യകൃഷ്ണമൂര്‍ത്തിയുടെ വിയോഗത്തില്‍ വികാരഭരിതമായ പോസ്റ്റ് പങ്കിടുകയാണ് നവ്യ നായര്‍. മൂന്ന് ദിവസം മുൻപ് തന്നെ വിളിച്ചെന്നും വ്യക്തമായിട്ടല്ലാതെ സംസാരിച്ചെന്നുമാണ് നവ്യ കുറിക്കുന്നത്.
‘‘കുറച്ചു ദിവസമായി സൂര്യാ കൃഷ്ണമൂർത്തി സാർ സുഖമില്ലാതെ ആശുപത്രിയിലായിരുന്നു. രാവിലെയും വൈകിട്ടും ഞാൻ വിളിക്കും. പ്രദീപേട്ടനെയാണ് വിളിക്കുന്നത്. എന്നും വിളിക്കുന്നതു കൊണ്ടാകും പ്രദീപേട്ടൻ മൂന്നു ദിവസം മുൻപ് ഐ.സി.യുവിൽ ചെന്നപ്പോൾ നവ്യ വിളിക്കുന്നു എന്നു പറഞ്ഞു. കുറച്ചു കഴിഞ്ഞപ്പോൾ സാർ അദ്ദേഹത്തിന്റെ ഫോണിൽ നിന്ന് എന്നെ വിളിച്ചു. വ്യക്തമായി ഒന്നു പറയാൻ പറ്റുന്നുണ്ടായിരുന്നില്ല...നവ്യ.. എന്നു വിളിച്ച് ക്ലിയറല്ലാതെ സംസാരിച്ചു. അതാണ് അദ്ദേഹത്തെ അവസാനമായി കേട്ടത്...
മെഡിക്കൽ റിപ്പോർട്ട് അനുസരിച്ച് 6.45നാണ് സാറ് പോയി എന്നു പറയുന്നത്... സൂര്യാ പ്രോഗ്രാം ഞങ്ങൾ എല്ലാ ദിവസവും കറക്ട് 6.30ന് തുടങ്ങും. സാറിനത് വലിയ നിർബന്ധമാണ്. സാറപ്പോ ആ ഡിസിപ്ലിനോട് ആ സമയത്ത് തന്നെ പോയതാകും...
അദ്ദേഹം എപ്പോഴും വലിയ അഭിമാനത്തോടെ പറയുമായിരുന്നു, നൃത്തത്തിലെ ഉപരിപഠനത്തിന് എന്റെ ഗുരുനാഥ പ്രിയദർശിനി ഗോവിന്ദിലേക്ക് അദ്ദഹമാണ് എന്നെ എത്തിച്ചതെന്ന്... ഞാൻ അത്ര തന്നെ അഭിമാനത്തോടെ പറയും ഞാൻ സൂര്യാകൃഷ്ണമൂർത്തിയുടെയും ശിഷ്യയാണെന്ന്...
അദ്ദേഹത്തിന്റെ കലാസപര്യയുടെ തുടർച്ചയാണ് എന്നിലെ കലാകാരിയും. സാറിന്റെ കലാപ്രവർത്തനങ്ങൾ ഒരിക്കലും നിന്നു പോകരുത്. അതാണ് അദ്ദേഹത്തോടുള്ള ആദരവ്. സാറ് ഇത്തവണത്തെ സൂര്യ ഫെസ്റ്റിവെൽ മാത്രമല്ല, അടുത്ത വർഷത്തെ കൂടി പ്ലാൻ ചെയ്തു വെച്ചിട്ടുണ്ടെന്നാണ് പറയുന്നത്. സാറിന്റെ ലെഗസി എന്നത്തേയ്ക്കുമായി തുടരാൻ സർക്കാർ മുന്നിട്ടിറങ്ങും എന്നുറപ്പാണ്. സാറിനോടുള്ള എല്ലാ ആദരവോടും ഞാനും ഒപ്പമുണ്ടാകും....’’ എന്നാണ്ന സൂര്യ കൃഷ്ണമൂർത്തിയ്ക്കൊപ്പമുള്ള ചിത്രം പങ്കിട്ട് നവ്യ കുറിച്ചിരിക്കുന്നത്.
Comments