നിവിന്‍ പോളിയെ നായകനാക്കി ഗിരീഷ് എ.ഡി. സംവിധാനം ചെയ്ത 'ബെത്ലെഹേം കുടുംബ യൂണിറ്റ്' തിയേറ്ററുകളിൽ വൻ വിജയം നേടി മുന്നേറുകയാണ്. ചിത്രം ആഗോളതലത്തിൽ 300 കോടി രൂപ ക്ലബ്ബിൽ ഇടംനേടിക്കഴിഞ്ഞു. അതിനിടയിൽ, ചിത്രത്തെ വാനോളം പുകഴ്ത്തി ഗായകൻ ജി വേണുഗോപാൽ രംഗത്തെത്തിയത് ആരാധകർക്കിടയിൽ ചർച്ചയായിരിക്കുകയാണ്. രസമായി കണ്ട്, ചിരിച്ചു തിരിച്ചു വരാവുന്ന ഒരു പോസിറ്റീവ് ചിത്രമാണിതെന്നാണ് അദ്ദേഹം സമൂഹമാധ്യമങ്ങളില്‍ കുറിച്ചത്.
‘ബെത്ലെഹേം കുടുംബ യൂണിറ്റ്"രസമായി കണ്ടു ചിരിച്ചു തിരിച്ചു വരാവുന്ന ഒരു പോസിറ്റീവ്, ഹിറ്റ്‌ ചിത്രം. മമിത ബൈജു, ഉർവശിക്കും മഞ്ജുവിനും ശേഷം എന്റെ മനസ്സിലെ അടുത്ത നായിക നടി.
നിവിൻ പോളി, കൂൾ, ചിൽഡ് ആൻഡ് നാച്ചുറൽ. കലക്കി നിവിൻ. ശ്യാം മോഹൻ, നമ്മൾ ഈ മഞ്ഞു മലയുടെ അറ്റം മാത്രമേ കണ്ടിട്ടുള്ളു. പതുങ്ങും പുലി, പായും പുലി, ഇനി ഈ പുലിക്കു ചെയ്യാൻ കുറെയേറെ ബാക്കിയുണ്ട്.സബാഷ് ശ്യാം .
സംവിധായകൻ ഗിരീഷ്. എ . ഡി, ഒറ്റ വാക്കിൽ, ബ്രില്യന്റ്. വിഷ്ണു വിജയ്. സംഗീതം,എല്ലാ കാലഘട്ടത്തിനും എല്ലാ പ്രായക്കാർക്കുമുള്ള ഒരു സംഗീത സംവിധായകൻ.
പ്രണയിക്കാൻ ഭയം ഉള്ളവർ പോയിക്കണ്ടു ഭയം മാറ്റിക്കോളൂ. ക്ലിനിക്കൽ പരീക്ഷണത്തിൽ വിജയം കണ്ടിട്ടുള്ളത്’ എന്നാണ് ചിത്രം കണ്ടതിനു ശേഷം ജി വേണുഗോപാൽ കുറിച്ചത്.
നിവിന്‍ പോളിക്കും മമിതാ ബൈജുവിനും പുറമെ സംഗീത് പ്രതാപ്, സുരേഷ് കൃഷ്ണ, ബിന്ദു പണിക്കർ, വിനയ് ഫോർട്ട്, റോഷൻ ഷാനവാസ്, ശ്യാം മോഹൻ, ഷമീർ ഖാൻ, ശ്രിന്ദ, പാർവതി അയ്യപ്പദാസ്, മീനാക്ഷി രവീന്ദ്രൻ തുടങ്ങി വലിയൊരു താരനിരയാണ് ചിത്രത്തിൽ അണിനിരന്നിട്ടുള്ളത്.
Comments