ആരാധകര്‍ ഏറെ നാളായി കാത്തിരുന്ന വിവാഹമായിരുന്നു അഭിനേത്രിയും സോഷ്യല്‍ മീഡിയ ഇന്‍ഫ്ലുവന്‍സറുമായ അഹാ‍നയുടേതും പാന്‍ ഇന്ത്യന്‍ ഛായാഗ്രാഹകനായി നിമിഷ് രവിയുടേതും. അഹാനയുടെ വിവാഹത്തിന് മാത്രമല്ല ജീവിതത്തിലുടനീളം കരുത്തും പിന്തുണയുമായി എപ്പോഴും നിന്നിട്ടുള്ളത് അമ്മ സിന്ധു കൃഷ്ണയാണ്. തമ്മിലുള്ള അടുത്ത ബന്ധവും അവർ ഒരുമിച്ച് പങ്കുവെക്കുന്ന വിശേഷങ്ങളും എപ്പോഴും സോഷ്യൽ മീഡിയയിൽ ശ്രദ്ധ നേടാറുണ്ട്. അമ്മയും മകളും ഒപ്പമുള്ള യാത്രകളും രസകരമായ ചാറ്റ് സെഷനുകളും ഇരുവരുടെയും യൂട്യൂബ് ചാനലുകളിൽ വ്ലോഗുകളായും വരാറുണ്ട്. അതുകൊണ്ടു തന്നെ അഹാനയുടെ വിവാഹാഘോഷങ്ങളില്‍ ആരാധകര്‍ കൂടുതല്‍ ശ്രദ്ധിച്ചതും സിന്ധുവിനെ തന്നെയാണ്.
ഇപ്പോഴിതാ അമ്മ സിന്ധു കൃഷ്ണയ്ക്കൊപ്പമുള്ള അഹാനയുടെ നൃത്തമാണ് സോഷ്യല്‍ മീഡിയ ഏറ്റെടുക്കുന്നത്. അഹാനയുടെ വിവാഹത്തിന് മുന്നോടിയായുള്ള സംഗീത് നൈറ്റില്‍ അമ്മ സിന്ധു കൃഷ്ണയ്ക്കൊപ്പം ‘ഓലത്തുമ്പത്തിരുന്നൂയലാടും ചെല്ലപ്പൈങ്കിളീ...’എന്ന താരാട്ടുപാട്ടിനാണ് അഹാന നൃത്തം ചെയ്തത്. അതിമനോഹരമായ ഹൃദ്യനിമിഷങ്ങളായിരുന്നു സിന്ധു കൃഷ്ണയും അഹാനയും കാഴ്ചവച്ചത്. ഏതൊരു പെണ്‍കുട്ടിയും ജീവിതത്തില്‍ സ്വപ്നം കാണുന്നൊരു നിമിഷമായി അഹാനയുടെയും സിന്ധുവിന്റെയും പെര്‍ഫോമന്‍സ് മാറി. നിരവധി പേരാണ് ഈ ഹൃദ്യമായ പെര്‍ഫോമന്‍സിന് താഴെ സ്നേഹം നിറയ്ക്കുന്ന കമന്റുകള്‍ നിറയുന്നുണ്ട്.
കോവളത്തെ താജ് റിസോർട്ടിൽ അടുത്ത ബന്ധുക്കളും സുഹൃത്തുക്കളും മാത്രം പങ്കെടുത്ത സ്വകാര്യ ചടങ്ങില്‍ വച്ചായിരുന്നു അഹാനയുടെയും നിമിഷ് രവിയുടെയും വിവാഹം. സിനിമയിൽ നിന്നും ദുൽഖർ സൽമാൻ, ഋഷഭ് ഷെട്ടി, മമിത ബൈജു, ചന്തു സലിംകുമാർ, ജേക്സ് ബിജോയ്, ഡൊമിനിക് അരുൺ തുടങ്ങിയവരാണ് ചടങ്ങില്‍ അതിഥികളായി എത്തിയിരുന്നത്. വിവാഹച്ചടങ്ങില്‍ ചുവപ്പില്‍ സ്വർണക്കസവ് ബോർഡർ ഉള്ള സാരിയും പരമ്പരാഗത രീതിയിലുള്ള സ്വർണാഭരണങ്ങളും ഹെയർസ്റ്റൈലുമായിരുന്നു അഹാനയുടേത്. ഐവറി സ്യൂട്ടായിരുന്നു നിമിഷന്റെ വേഷം.
Comments