മലയാളികള്‍ക്ക് ഏറെയിഷ്ടമുള്ള താരങ്ങളായ മനോജ് കെ.ജയന്റെയും ഉര്‍വശിയുടെയും മകളായ തേജാലക്ഷ്മി എന്ന കുഞ്ഞാറ്റ അച്ഛനമമ്മാരുടെ പാത പിന്തുടര്‍ന്ന് സിനിമയിലെത്തിയിരിക്കുകയാണ്. റെജി പ്രഭാകരൻ സംവിധാനം ചെയ്യുന്ന ‘പ്രിയതമൻ’ എന്ന ചിത്രത്തിലൂടെയാണ് ശ്രീനാഥ് ഭാസിയുടെ നായികയായി തേജലക്ഷ്മി സിനിമയിലേക്ക് എത്തുന്നത്. കുഞ്ഞാറ്റയുടെ സിനിമാ അരങ്ങേറ്റത്തിന്റെ സന്തോഷത്തിലാണ് മനോജ് കെ. ജയന്‍.
ഇക്കഴിഞ്ഞ ദിവസമാണ് സിനിമയുടെ ഷൂട്ടിംഗ് ആരംഭിച്ചത്. കൊല്ലം ദളവാപുരം പള്ളിയിൽ വച്ചാണ് സിനിമയുടെ ആദ്യ രംഗങ്ങൾ പകർത്തിയത്. ഷൂട്ടിങ്ങിനായി മകള്‍ക്കൊപ്പം മനോജ് കെ. ജയനും ലൊക്കേഷനില്‍ എത്തിയിരുന്നു. ഒരു അഭിനേതാവ് എന്നതിലുപരി ഏറെ ടെന്‍ഷനുള്ള ഒരു അച്ഛനെയാണ് പലരുമവിടെ കണ്ടത്.
ഇപ്പോഴിതാ മകള്‍ക്കു വേണ്ടി ആദ്യ ദിവസം മേക്കപ്പ് ബാഗ് ഒരുക്കിയതിനെക്കുറിച്ച് വികാരഭരിതനാകുകയാണ് മനോജ് കെ. ജയന്‍. മകള് രണ്ടിലും മൂന്നിലും പഠിക്കുമ്പോൾ ഞാന്‍ സ്കൂൾ ബാഗൊക്കെ സെറ്റ് ചെയ്തു കൊടുത്ത ഫീലിംഗാണ് വന്നതെന്നാണ് മനോജ് കെ. ജയന്‍ പറയുന്നത്.
‘‘ഒരുപാട് സന്തോഷമുണ്ട്. ഒരുപാട് അഭിമാനമുള്ള നിമിഷമാണിത്. മോളുടെ ആദ്യത്തെ സിനിമയാണ്, ആദ്യത്തെ ദിവസമാണ്. ഞാനിന്ന് മേക്കപ്പ് ബാഗ് എല്ലാം സെറ്റ് ചെയ്ത് കൊടുത്തു. അപ്പോള്‍ ഞാനോര്‍ത്തത് മകള് രണ്ടിലും മൂന്നിലും പഠിക്കുമ്പോൾ ഞാന്‍ സ്കൂൾ ബാഗൊക്കെ സെറ്റ് ചെയ്തു കൊടുത്തതാണ്. ജോമെട്രി ബോക്സുമൊക്കെ സെറ്റ് ചെയ്ത് നെയിം സ്ലിപ്പ് ഒട്ടിച്ചു കൊടുത്ത് ഒരുക്കി നൽകുമായിരുന്നു. പുതിയ കുടയും ഉണ്ടായിരുന്നു. ഇവിടെയും പുതിയ കുടയുണ്ട്. മേക്കപ്പ് ബാഗ് സെറ്റ് ചെയ്ത് കൊടുത്തപ്പോള്‍ എനിക്ക് വല്ലാത്തൊരു ഫീലിംഗ് ആയിരുന്നു.
ടെന്‍ഷന്‍ തീര്‍ച്ചയായും ഉണ്ട്. അവള്‍ നന്നായി ചെയ്യണം, അവള്‍ക്കതിനുള്ള ആത്മവിശ്വാസമുണ്ട്. ചെയ്യുമെന്നാണ് ഞാന്‍ വിശ്വസിക്കുന്നത്. ഞങ്ങളില്‍ നിന്ന് കിട്ടിയ എന്തെങ്കിലുമൊക്കെയൊരു ടാലന്റ് അവള്‍ക്കും കാണുമല്ലോ. പിന്നെ ആദ്യത്തെ സിനിമയാണ്. അപ്പോള്‍ ചില പോരായ്മകള്‍ വരാം. പ്രിയപ്പെട്ട പ്രേക്ഷകര്‍ കണ്ട് അവളെ അനുഗ്രഹിക്കണം എന്നാണ് എന്റെ വിനീതമായ അപേക്ഷ...’’ എന്നാണ് മകളുടെ ആദ്യ ഷൂട്ടിംഗ് ദിനത്തെപ്പറ്റി മനോജ് കെ. ജയന്‍ പറയുന്നത്.
ഏറെ ആത്മബന്ധമുള്ള ഒരമ്മയുടേയും മകന്റേയും ജീവിതത്തിനിടയിലേക്ക് ഒരു പെൺകുട്ടി കടന്നുവരുന്നതും പിന്നീടുണ്ടാകുന്ന സംഭവങ്ങളുമാണ് നർമ മുഹൂർത്തങ്ങളിലൂടെ അവതരിപ്പിക്കപ്പെടുന്നത്. ചിത്രത്തിൽ പ്രിയയായി തേജാലക്ഷ്മിയും വിശ്വാസ് എന്ന കഥാപാത്രമായി ശ്രീനാഥ് ഭാസിയും എത്തുന്നു. പത്മരാജ് രതീഷ്, സുധീർ കരമന, സുനിൽ സുഖദ, സുബിൻ ടാർസാൻ, ഖൈഫ്, വീണാ നായർ, വിദ്യാ വിശ്വനാഥ് എന്നിവരാണ് സിനിമയിലെ മറ്റ് പ്രധാന താരങ്ങള്‍. പ്രണയവും തമാശയും എല്ലാം നിറഞ്ഞുനിൽക്കുന്ന ഒരു രസികൻ കുടുംബചിത്രമായാണ് ‘പ്രിയതമൻ’ ഒരുങ്ങുന്നത്.
Comments