യുണൈറ്റഡ് നേഷന്‍സ് : ഐക്യരാഷ്ട്രസഭയുടെ ജനറല്‍ അസംബ്ലിയില്‍ ഇസ്രായേലിനെതിരേ വന്‍ പ്രതിഷേധം. ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ പ്രസംഗം ഡെലിഗേറ്റകള്‍ ബഹിഷ്‌ക്കരിച്ചു. പലരും ഹാളിന് പുറത്തുപോയി. പുറത്തും വലിയ പ്രതിഷേധമാണ് ഉയര്‍ന്നത്. പശ്ചിമേഷ്യന്‍ സംഘര്‍ഷത്തോട് ലോകത്തിന്റെ പ്രതികരണം വ്യക്തമാക്കുന്നതായിരുന്നു സംഭവം.
ഇസ്രായേലിനെ എതിര്‍ക്കുന്നവര്‍ അകത്തും പുറത്തും പ്രതിഷേധിച്ചപ്പോള്‍ അനുകൂലിക്കുന്നവര്‍ കയ്യടിക്കുകയും ശബ്ദമുയര്‍ത്തുകയും ചെയ്തു. നെതന്യാഹു പ്രസംഗത്തിനായി റോസ്ട്രത്തിലേക്ക് എത്തിയപ്പോള്‍ വിവിധരാജ്യങ്ങളിലെ പ്രതിനിധികള്‍ പ്രതിഷേധസൂചകമായി ഇറങ്ങിപ്പോയി. ഇതിന് മറുപടിയായി അവരെ 'ധാര്‍മ്മിക ഭീരുക്കള്‍' എന്ന് വിശേഷിപ്പിച്ചാണ് ഇസ്രായേല്‍ പ്രധാനമന്ത്രി സംസാരിച്ചത്. ഗാലറിയിലുണ്ടായിരുന്ന അദ്ദേഹത്തിന്റെ അനുകൂലികള്‍ ഹീബ്രു ഭാഷയില്‍ 'ഇസ്രായേല്‍ ജനത ഇപ്പോഴും ജീവനോടെയുണ്ട്' എന്ന് മുദ്രാവാക്യം വിളിച്ചു.
യു.എന്നിന് പുറത്തും നൂറുകണക്കിന് പ്രക്ഷോഭകര്‍ ഒത്തുകൂടുകയും 'ഇസ്രായേലിന് ആയുധം നല്‍കുന്നത് നിര്‍ത്തുക, ഗാസയെ ജീവിക്കാന്‍ അനുവദിക്കുക' എന്ന് മുദ്രാവാക്യം വിളിക്കുകയും ചെയ്തു. പോലീസ് ഇവരെ കസ്റ്റഡിയിലെടുത്തു. ന്യൂയോര്‍ക്ക് മേയര്‍ സോഹ്രാന്‍ മാംദാനി തന്നെ ഒരു യുദ്ധക്കുറ്റവാളി എന്ന് വിളിച്ചതിനെയും പടിഞ്ഞാറന്‍ യൂറോപ്യന്‍ നേതാക്കള്‍ 'യൂഹൂദവിരുദ്ധ ജനക്കൂട്ട'ത്തിന് മുന്നില്‍ കീഴടങ്ങിയെന്നും നെതന്യാഹു തന്റെ പ്രസംഗത്തില്‍ കുറ്റപ്പെടുത്തി. ഖത്തറും തുര്‍ക്കിയും ഇസ്രായേലിന് എതിരെ നുണകള്‍ പ്രചരിപ്പിക്കുകയാണെന്നും ആരോപിച്ചു.
അഞ്ച് ആഴ്ചകള്‍ക്കുള്ളില്‍ പൊതുതെരഞ്ഞെടുപ്പ് നടക്കാനിരിക്കെ, അഭിപ്രായ സര്‍വേകളില്‍ അധികാരം നഷ്ടപ്പെടുമെന്ന് ആശങ്കപ്പെടുന്ന നെതന്യാഹു തിരഞ്ഞെടുപ്പ് പ്രചാരണ ശൈലിയിലാണ് ഏകദേശം 40 മിനിറ്റ് പ്രസംഗിച്ചത്. ഹമാസ് ആക്രമണത്തിന് ശേഷം ഗാസയില്‍ യുദ്ധം ആരംഭിച്ചതുമുതല്‍ ഇസ്രായേല്‍ അന്താരാഷ്ട്രതലത്തില്‍ വലിയ തോതിലുള്ള നയതന്ത്ര ഒറ്റപ്പെടല്‍ നേരിടുകയാണ്. അന്താരാഷ്ട്ര ക്രിമിനല്‍ കോടതിയുടെ അറസ്റ്റ് വാറണ്ട് നിലനില്‍ക്കുന്നതിനാല്‍ നെതന്യാഹുവിന് പല രാജ്യങ്ങളിലേക്കും യാത്ര ചെയ്യാന്‍ സാധിക്കുന്നില്ല.
Comments