തിരുവനന്തപുരം: ഗവണ്‍മെന്റും ദേവസ്വംബോര്‍ഡും ഒരുമിച്ച് നിന്ന് ഇത്തവണത്തെ മണ്ഡലകാലത്ത് കാര്യങ്ങള്‍ ഭംഗിയായി നിര്‍വ്വഹിക്കുമെന്ന് ദേവസ്വംമന്ത്രി കെ. മുരളീധരന്‍. ഭക്തര്‍ക്ക് ഒരു ബുദ്ധിമുട്ടും ഉണ്ടാകാത്ത സാഹചര്യം സൃഷ്ടിക്കും. ആശങ്കയ്ക്ക് കാര്യമില്ലെന്നും മന്ത്രി പറഞ്ഞു.
ദേവസ്വംബോര്‍ഡ് പ്രസിഡന്റും മന്ത്രിയും കൂടിക്കാഴ്ച നടത്തിയ ശേഷം ഇരുവരും ചേര്‍ന്നായിരുന്നു മാധ്യമങ്ങളെ കണ്ടത്. സര്‍ക്കാരും ദേവസ്വം തമ്മിലുണ്ടായത് ചെറിയ ആശയവിനിമയത്തിലെ പ്രശ്‌നമായിരുന്നെന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് കെ. ജയകുമാറും വ്യക്തമാക്കി.
ഇന്ന് രാവിലെയാണ് കെ.ജയകുമാര്‍ കെ. മുരളീധരനെ കണ്ടത്. സര്‍ക്കാരിനെ കാര്യങ്ങള്‍ അറിയിക്കുന്നതില്‍ ബോര്‍ഡിനു വീഴ്ചയുണ്ടായെന്നും ആശയവിനിമയപ്രശ്‌നം പരിഹരിക്കുമെന്നും ഇന്നലെ ജയകുമാര്‍ പറഞ്ഞിരുന്നു. അരവണപ്രശ്‌നം ബോര്‍ഡ് യോഗം സമഗ്രമായി ചര്‍ച്ചചെയ്തു. ശബരിമലയില്‍ അരവണനിര്‍മാണം കൂട്ടും. നിലവില്‍ പ്രതിദിനം 2.6 ലക്ഷം ടിന്‍ തയാറാക്കുന്നത് 3.6 ലക്ഷമായി വര്‍ധിപ്പിക്കും.
നട തുറക്കുമ്പോള്‍ 75 ലക്ഷം ടിന്‍ അരവണ കരുതലായി സംഭരിക്കും. മണ്ഡലകാലത്ത് അരവണക്ഷാമം ഉണ്ടാവില്ല. ശര്‍ക്കരയ്ക്കു ടെന്‍ഡര്‍ വിളിച്ചു. ഒക്‌ടോബര്‍ അഞ്ചിനു മുമ്പ് കരാര്‍ സാധ്യമാകും. കടകളുടെ ലേലം ഓണ്‍ലൈനാക്കും. ശബരിമലയില്‍ എ.ഐ. ഉപയോഗിച്ച് തിരക്ക് നിയന്ത്രിക്കും.
പോലീസിനാണ് ഇതിന്റെ ചുമതല. നിലയ്ക്കലില്‍ കണ്‍ട്രോള്‍ റൂം തുറന്ന്, വാഹനങ്ങളെയും ആളുകളെയും എ.ഐ. ഉപയോഗിച്ച് നിയന്ത്രിക്കും. വന്‍പ്രവൃത്തികളുടെയെല്ലാം ടെന്‍ഡര്‍ പൂര്‍ത്തിയായി. പ്രവൃത്തികള്‍ ഒക്‌ടോബര്‍ 31-നുള്ളില്‍ പൂര്‍ത്തിയാക്കും. നിലവാരമുറപ്പാക്കാന്‍ ബോര്‍ഡ് പ്രത്യേകസംഘത്തെ നിയോഗിച്ച് പരിശോധന നടത്തുമെന്നും ജയകുമാര്‍ ഇന്നലെ പത്രസമ്മേളനത്തില്‍ വ്യക്തമാക്കിയിരുന്നു.
Comments