സാംസ്കാരിക നായകനും സംഗീത നാടക അക്കാദമി മുന്‍ ചെയര്‍മാനുമായിരുന്ന സൂര്യ കൃഷ്ണമൂര്‍ത്തിയുടെ വേര്‍പാടില്‍ ദുഃഖം രേഖപ്പെടുത്തി നടിയും നര്‍ത്തകിയുമായ ആശ ശരത്. സൂര്യ കൃഷ്ണമൂര്‍ത്തിക്കൊപ്പമുളള ഒരു ചിത്രവും ആശ ശരത് സോഷ്യല്‍ മീഡിയയിലൂടെ പങ്കുവെച്ചു.
''പ്രശസ്ത കലാകാരനും സാംസ്കാരിക രംഗത്തെ അതികായനുമായ സൂര്യ കൃഷ്ണമൂര്‍ത്തി സാറിന്റെ വിയോഗത്തില്‍ അഗാധമായ ദുഃഖം രേഖപ്പെടുത്തുന്നു. സംസ്‌കാര ചടങ്ങുകള്‍ക്കും മറ്റ് ഔദ്യോഗിക നടപടികള്‍ക്കും ശേഷം തിരുവനന്തപുരത്തുനിന്ന് മടങ്ങിയെത്തിയതേയുള്ളൂ.
സൂര്യ എന്നാല്‍ സൂര്യന്‍ എന്നാണ് അര്‍ത്ഥം. ആ പേര് അന്വര്‍ത്ഥമാക്കും വിധം, അദ്ദേഹമെന്ന സൂര്യന്‍ ഒരിക്കലും അസ്തമിക്കില്ല. അദ്ദേഹം വെറുമൊരു കലാകാരന്‍ മാത്രമായിരുന്നില്ല;ആയിരക്കണക്കിന് കലാകാരന്മാര്‍ക്ക് തിളങ്ങാനുള്ള വെളിച്ചം പകര്‍ന്ന വ്യക്തികൂടിയായിരുന്നു.
സാര്‍, അങ്ങയുടെ മഹത്തായ പാരമ്പര്യം ഇന്നത്തെയും വരുംതലമുറകളിലെയും ഓരോ കലാകാരന്മാരിലൂടെയും നിലനില്‍ക്കുമെന്ന് ഞാന്‍ ഉറപ്പുനല്‍കുന്നു. അങ്ങ് വെളിച്ചമേകിയ ഓരോ വേദികളിലും സ്പര്‍ശിച്ച ഓരോ ജീവിതങ്ങളിലും അങ്ങയുടെ ചൈതന്യം എന്നും നിലനില്‍ക്കും. അങ്ങയുടെ സംഭാവനകള്‍ അനശ്വരമാണ്; അവ കാലങ്ങളോളം കലാലോകത്തിന് വഴികാട്ടിയായി നിലകൊള്ളും'', ആശ ശരത് കുറിച്ചു.
Comments