സിനിമയിൽ 48 വർഷങ്ങൾ പൂർത്തിയാക്കിയ മെഗാസ്റ്റാർ ചിരഞ്ജീവിക്ക് സ്നേഹനിർഭരമായ ആശംസകളുമായി മകനും നടനുമായ രാം ചരൺ. ചിരഞ്ജീവിയുടെയും കുടുംബത്തിന്റെയും ജീവിതം മാറ്റിമറിച്ച ആ ദിവസത്തെ അനുസ്മരിച്ചുകൊണ്ട് സോഷ്യൽ മീഡിയയിലാണ് താരം ഹൃദയസ്പർശിയായ കുറിപ്പ് പങ്കുവെച്ചത്. അദ്ദേഹത്തിന്റെ സിനിമായാത്ര തങ്ങൾക്കെല്ലാം എപ്പോഴും ഒരു വലിയ പ്രചോദനമാണെന്നും രാം ചരൺ കുറിച്ചു.
പതിറ്റാണ്ടുകളായി മെഗാസ്റ്റാറിന് നൽകിയ സ്നേഹത്തിന് പ്രേക്ഷകർക്കും ആരാധകർക്കും നന്ദി അറിയിച്ച താരം, തന്റെ പിതാവ് സിനിമയിൽ 50 വർഷം പൂർത്തിയാക്കുന്ന സുവർണ്ണ ജൂബിലി ആഘോഷത്തിനായി കാത്തിരിക്കുകയാണെന്നും കൂട്ടിച്ചേർത്തു.
‘‘നിങ്ങൾ സിനിമയിൽ നിങ്ങളുടെ യാത്ര തുടങ്ങിയിട്ട് 48 വർഷമായി, അച്ഛാ. നിങ്ങൾക്കും ഞങ്ങളുടെ കുടുംബത്തിനും എല്ലാം മാറ്റിമറിച്ച ആ ദിവസത്തെ ഞങ്ങൾ ഓരോ ദിവസവും ഓർക്കുന്നു. നിങ്ങൾ ചെയ്ത എല്ലാ കാര്യങ്ങൾക്കും, അതുപോലെ നിങ്ങൾക്ക് നൽകിയ നിരന്തരമായ സ്നേഹത്തിനും പിന്തുണയ്ക്കും പ്രേക്ഷകർക്കും ഞാൻ നന്ദി പറയുന്നു, നിങ്ങളുടെ യാത്ര എപ്പോഴും ഞങ്ങൾക്ക് ഒരു പ്രചോദനമായിരിക്കും. സിനിമയിലെ അവിശ്വസനീയമായ 50 വർഷങ്ങൾ എന്ന നാഴികക്കല്ല് നമ്മൾ ആഘോഷിക്കുന്ന ആ ദിവസത്തിനായി ഞാൻ ഇപ്പോൾ കാത്തിരിക്കുകയാണ് ’’എന്നായിരുന്നു രാം ചരണിന്റെ വാക്കുകൾ.
1978-ൽ പുറത്തിറങ്ങിയ 'പ്രാണം ഖരീദു' എന്ന ചിത്രത്തിലൂടെയാണ് ചിരഞ്ജീവി വെള്ളിത്തിരയിലെത്തുന്നത്. തന്റെ 48 വർഷത്തെ സിനിമാജീവിതം വിജയിപ്പിച്ചതിന് പിന്നിൽ പ്രവർത്തിച്ച നിർമ്മാതാക്കൾ, സംവിധായകർ, സഹനടന്മാർ, സാങ്കേതിക വിദഗ്ധർ, ആരാധകർ എന്നിവർക്കെല്ലാം നന്ദി അറിയിച്ചുകൊണ്ട് മെഗാസ്റ്റാറും സമൂഹമാധ്യമങ്ങളിൽ വൈകാരികമായ ഒരു കുറിപ്പ് പങ്കുവെച്ചിരുന്നു.
Comments