ചെറുപ്പത്തിൽ മാതാപിതാക്കളും സഹോദരങ്ങൾക്കുമൊപ്പം ചെറിയൊരു മുറിയിൽ കഴിഞ്ഞ പുണെ സ്വദേശിയായ യുവാവിന്റെ ജീവിതത്തിലെ വലിയ സ്വപ്നമാണ് ഒടുവിൽ യാഥാർഥ്യമായത്. റാപ്പറും ഹിപ്-ഹോപ്പ് കലാകാരനുമായ ഹരീഷ് ഠാക്കൂറാണ് മാതാപിതാക്കൾക്കായി സ്വന്തം വീട് വാങ്ങിയത്. പരിമിതമായ സാഹചര്യങ്ങളിൽ വളർന്ന ബാല്യകാലം ഓർത്തെടുത്തുകൊണ്ടാണ് പുതിയ വീട് സ്വന്തമാക്കിയ സന്തോഷം ഹരീഷ് സോഷ്യൽ മീഡിയയിലൂടെ പങ്കുവെച്ചത്.
കുടുംബത്തിന്റെ സാമ്പത്തിക ബുദ്ധിമുട്ടുകൾക്കിടയിലും പിതാവ് കുടുംബത്തെ മുന്നോട്ട് കൊണ്ടുപോകാൻ ഏറെ കഷ്ടപ്പെട്ടിരുന്നുവെന്ന് ഹരീഷ് പറഞ്ഞു. അന്നുതന്നെ ഒരുദിവസം മാതാപിതാക്കൾക്കായി സ്വന്തം വീട് വാങ്ങണമെന്ന് അദ്ദേഹം ആഗ്രഹിച്ചിരുന്നു. വർഷങ്ങളായുള്ള അധ്വാനത്തിനൊടുവിൽ ആ ആഗ്രഹം സഫലമായതിന്റെ സന്തോഷത്തിലാണ് ഹരീഷ്.
പുതിയ വീട്ടിലെത്തിയപ്പോൾ മാതാപിതാക്കളുടെ പേരിലുള്ള നെയിംപ്ലേറ്റ് കണ്ട നിമിഷം ഏറെ വൈകാരികമായിരുന്നുവെന്നും ഹരീഷ് പങ്കുവെച്ചു. കുട്ടിക്കാലത്ത് മനസിൽ സൂക്ഷിച്ചിരുന്ന വാഗ്ദാനം പാലിക്കാൻ കഴിഞ്ഞത് ജീവിതത്തിലെ ഏറ്റവും പ്രത്യേക നിമിഷങ്ങളിലൊന്നാണെന്നും അദ്ദേഹം പറഞ്ഞു. മാതാപിതാക്കൾക്കായി വീട് സ്വന്തമാക്കിയതിന്റെ സന്തോഷം പങ്കുവെച്ചുള്ള വീഡിയോയും സോഷ്യൽ മീഡിയയിൽ പോസ്റ്റ് ചെയ്തു.
ഹരീഷിന്റെ ജീവിതകഥയ്ക്ക് സോഷ്യൽ മീഡിയയിൽ വലിയ സ്വീകാര്യതയാണ് ലഭിച്ചത്. മാതാപിതാക്കൾക്കായി സ്വന്തം വീട് വാങ്ങിയതിൽ അഭിനന്ദനങ്ങളുമായി നിരവധി പേർ രംഗത്തെത്തി. “എല്ലാ ഗല്ലി ബോയിക്കും ഈ ദിവസം കാണാൻ കഴിയട്ടെ” എന്ന ഹരീഷിന്റെ വാക്കുകളും ശ്രദ്ധ നേടി. പരിമിതമായ സാഹചര്യങ്ങളിൽ നിന്ന് കഠിനാധ്വാനത്തിലൂടെ മുന്നേറി മാതാപിതാക്കളുടെ സ്വപ്നം സഫലമാക്കിയ കഥയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
Comments