തെലുങ്ക് താരം നാനിയുടെ ഏറ്റവും പുതിയ ചിത്രമായ 'ദി പാരഡൈസ്' ഇന്നലെയായിരുന്നു തിയേറ്ററുകളിലെത്തിയത്. സമ്മിശ്രപ്രതികരണമാണ് ചിത്രത്തിന് ലഭിച്ചുകൊണ്ടിരിക്കുന്നതെങ്കിലും ബോക്‌സ് ഓഫീസില്‍ വന്‍ കളക്ഷനാണ് ചിത്രം നേടുന്നത്. ഇപ്പോഴിതാ സിനിമയുടെ വിജയവും വിമര്‍ശനങ്ങളും ഉള്‍ക്കൊണ്ട് ആരാധകര്‍ക്ക് നന്ദി അറിയിച്ചെത്തിയിരിക്കുകയാണ് നാനി.
പ്രേക്ഷകര്‍ ചിത്രത്തെ ഏറ്റെടുത്ത രീതി എന്റെ ഹൃദയം നിറച്ചു, നിരൂപകര്‍ ചൂണ്ടിക്കാണിച്ച പോരായ്മകളില്‍ നിന്ന് ഞാന്‍ പഠിക്കുകയും ചെയ്തു, എന്നാണ് നാനി തന്റെ സോഷ്യല്‍ മീഡിയ കുറിപ്പില്‍ വ്യക്തമാക്കിയത്.
‘നിങ്ങളുടെ എല്ലാ പ്രതികരണങ്ങളും ഞാന്‍ കണ്ടു. നിങ്ങളുടെ സ്‌നേഹം മുഴുവന്‍ എനിക്ക് ലഭിച്ചു, ഒപ്പം നിങ്ങളുടെ രസകരമായ ട്രോളുകളും ഞാന്‍ ആസ്വദിച്ചു. പ്രേക്ഷകര്‍ ചിത്രത്തെ ഏറ്റെടുത്ത രീതി എന്റെ ഹൃദയം നിറച്ചു, അതുപോലെ നിരൂപകരും റിവ്യൂവേഴ്‌സും ചൂണ്ടിക്കാണിച്ച പോരായ്മകളില്‍ നിന്ന് ഞാന്‍ പഠിക്കുകയും ചെയ്തു. എനിക്ക് പറയാനുള്ളത് നന്ദി മാത്രമാണ്. നിങ്ങള്‍ക്ക് ഒരു സവിശേഷ അനുഭവം നല്‍കാന്‍ ഞങ്ങള്‍ ഒരുപാട് വിയര്‍പ്പൊഴുക്കിയാണ് 'ദി_പാരഡൈസ്' നിര്‍മ്മിച്ചത്, അത് ആഘോഷിക്കാനോ വിധിക്കാനോ ഇപ്പോള്‍ പൂര്‍ണ്ണമായും നിങ്ങളുടെ കൈകളിലാണ്. നിങ്ങള്‍ ചിത്രത്തോട് കാണിച്ച ആവേശവും എന്നോട് കാണിച്ച സ്‌നേഹവും എന്റെ ഹൃദയം നന്ദികൊണ്ട് നിറയ്ക്കുന്നു.’ എന്നായിരുന്നു നാനിയുടെ വാക്കുകള്‍.
അതേസമയം ശ്രീകാന്ത് ഒഡേല സംവിധാനം ചെയ്ത 'ദി പാരഡൈസ്' വലിയ പ്രതീക്ഷകളോടെയാണ് തിയേറ്ററുകളില്‍ എത്തിയത്. നാനിയുടെ മേക്കോവറും ആക്ഷന്‍ രംഗങ്ങളും മികച്ച പ്രശംസ നേടുമ്പോള്‍, തിരക്കഥയിലെയും രണ്ടാം പകുതിയിലെയും ചില പോരായ്മകള്‍ നിരൂപകരും പ്രേക്ഷകരും ചൂണ്ടിക്കാണിക്കുന്നുണ്ട്. ചിത്രത്തിലെ ഗാനങ്ങളും ചില കഥാപാത്രങ്ങളും സമൂഹമാധ്യമങ്ങളില്‍ വലിയ ചര്‍ച്ചയായിട്ടുണ്ട്. മോഹന്‍ ബാബു, കയാദു ലോഹര്‍, രാഘവ് ജുയാല്‍ തുടങ്ങി വലിയൊരു താരനിരയും ചിത്രത്തിലുണ്ട്.
Comments