മലയാളത്തിന്റെ സ്വന്തം താരരാജാവ് മോഹന്‍ലാലിന്റെ മക്കള്‍ രണ്ടാളും സിനിമയിലെത്തിയ സന്തോഷം ആരാധകര്‍ ശരിക്കും ആഘോഷമാക്കിയിരുന്നു. ബാലതാരമായി അഭിനയം തുടങ്ങിയ മകന്‍ പ്രണവ്, എട്ടു വര്‍ഷങ്ങള്‍ക്കു മുമ്പ് നായകനായി ബിഗ്സ്ക്രീനിലെത്തിയിരുന്നു. അന്നുമുതല്‍ മകള്‍ വിസ്മയയുടെ അരങ്ങേറ്റത്തിനായി പ്രേക്ഷകര്‍ കാത്തിരുന്നു. ജൂഡ് ആന്‍റണി ചിത്രമായ ‘തുടക്ക’ത്തിലൂടെ വിസ്മയ അഭ്രപാളിയില്‍ അരങ്ങേറ്റം കുറിച്ചു. മികച്ച പ്രതികരണമായിരുന്നു സിനിമയ്ക്ക് കിട്ടിയത്.
ഇപ്പോഴിതാ ‘തുടക്ക’ത്തിന്റെ ഗംഭീര വിജയത്തിനു ശേഷം വിസ്മയ മോഹന്‍ലാല്‍ അടുത്ത സിനിമ ചെയ്യുന്നില്ലേ എന്ന് ചോദിക്കാന്‍ പ്രേക്ഷകര്‍ക്ക് അവസരം നല്‍കാതെ തന്റെ അടുത്ത സിനിമ അനൗണ്‍സ് ചെയ്തിരിക്കുകയാണ് താരപുത്രി. ലൂക്ക, മിണ്ടിയും പറഞ്ഞ് തുടങ്ങിയ ചിത്രങ്ങളുടെ സംവിധായകൻ അരുണ്‍ ബോസ് ഒരുക്കുന്ന പുതിയ ചിത്രത്തിലെ നായിക വിസ്മയയാണ്. തന്റെ സോഷ്യല്‍ മീഡിയയിലൂടെ വിസ്മയ സിനിമയുടെ ഫസ്റ്റ് ലുക്ക് പുറത്തു വിട്ടിട്ടുണ്ട്. ചെടികള്‍ക്കിടയിലൂടെ വിസ്മയയുടെ ഒരു കണ്ണും നിറഞ്ഞ ചിരിയും കാണുന്നതാണ് പോസ്റ്റര്‍. ചിത്രത്തിന്റെ പേര് പ്രഖ്യാപിച്ചിട്ടില്ല.
ഉയരെ, ജാനകി ജാനേ എന്നീ ചിത്രങ്ങള്‍ക്ക് ശേഷം എസ് ക്യൂബ് ഫിലിംസിന്റെ ബാനറിൽ ഷെനുഗ, ഷെഗ്ന, ഷെർഗ എന്നിവർ നിർമ്മിക്കുന്നതാണ് ചിത്രം. വരത്തൻ, വൈറസ്, റൈഫിള്‍ ക്ലബ് തുടങ്ങിയ ചിത്രങ്ങളിലൂടെ ശ്രദ്ധേയരായ രത്തീന, സുഹാസ്, ഷറഫു എന്നിവർ ചേർന്നാണ് ചിത്രത്തിന്റെ രചന നിർവഹിക്കുന്നത്. വ്യത്യസ്തമായ പ്രമേയവും പുതുമയാർന്ന അവതരണവും ചേർന്ന ഒരു സിനിമാനുഭവമായിരിക്കും ചിത്രമെന്ന് അണിയറപ്രവർത്തകർ അറിയിച്ചു. ഹിഷാം അബ്ദുൾ വഹാബാണ് സംഗീത സംവിധാനം. പ്രമുഖ താരങ്ങളും മലയാള സിനിമയിലെ ശ്രദ്ധേയരായ സാങ്കേതിക പ്രവർത്തകരും അണിനിരക്കുന്ന ചിത്രത്തിന്റെ പൂജയും ചിത്രീകരണവും ഉടൻ ആരംഭിക്കും.
Comments