മുംബൈ മെട്രോ സ്റ്റേഷനിലെത്തിയ യാത്രക്കാരെ അമ്പരപ്പിച്ച് ടിക്കറ്റ് നിക്ഷേപിക്കാനുള്ള സുതാര്യമായ ബോക്സിനുള്ളിൽ സുഖമായി ഉറങ്ങി പൂച്ച. പൂച്ച കിടന്നുറങ്ങുന്ന ദൃശ്യങ്ങൾ സമൂഹമാധ്യമങ്ങളിൽ വൈറലായതോടെ നിരവധി പേരാണ് കൗതുകവും തമാശയും പങ്കുവെച്ചത്. സുതാര്യമായ ബോക്സിനുള്ളിൽ ചുരുണ്ടുകൂടി കിടന്ന പൂച്ചയുടെ ഉറക്കമാണ് വീഡിയോയിലെ ശ്രദ്ധാകേന്ദ്രമായത്.
ഇൻസ്റ്റഗ്രാം ഉപയോക്താവായ ശ്രേയ ഷാജിയാണ് ദൃശ്യങ്ങൾ പങ്കുവെച്ചത്. ‘ആരെങ്കിലും ടിക്കറ്റാണെന്ന് കരുതി പൂച്ചയെ എടുത്ത് ഇവിടെ ഇട്ടതാണോ’ എന്ന തരത്തിലുള്ള തമാശയോടെയുള്ള കുറിപ്പും വീഡിയോയ്ക്കൊപ്പമുണ്ടായിരുന്നു. ബോക്സിനുള്ളിൽ വളരെ സുഖമായി കിടന്നുറങ്ങുന്ന പൂച്ചയെ കണ്ടതോടെ യാത്രക്കാരും സമൂഹമാധ്യമ ഉപയോക്താക്കളും ചിരിയോടെയാണ് വീഡിയോ ഏറ്റെടുത്തത്.
വീഡിയോയ്ക്ക് ഇൻസ്റ്റഗ്രാമിൽ ഇതിനോടകം വലിയ പ്രതികരണമാണ് ലഭിച്ചത്. നിരവധി പേരാണ് പൂച്ചയുടെ ഉറക്കത്തെക്കുറിച്ച് രസകരമായ കമന്റുകളുമായി എത്തിയത്. മുംബൈ മെട്രോയിലെ ഗുണ്ടവാലി സ്റ്റേഷനിൽ സ്ഥിരമായി കാണപ്പെടുന്ന പൂച്ചകളെ ഓർമിപ്പിക്കുന്നതാണ് ഈ കാഴ്ചയെന്നും ചിലർ അഭിപ്രായപ്പെട്ടു.
സാധാരണ യാത്രയ്ക്കിടയിൽ കാണുന്ന കാഴ്ചകളിൽ നിന്ന് വ്യത്യസ്തമായി മെട്രോയിലെ ടിക്കറ്റ് ബോക്സ് തന്നെ ഉറങ്ങാനുള്ള ഇടമാക്കിയ പൂച്ചയുടെ ദൃശ്യമാണ് ഇപ്പോൾ സമൂഹമാധ്യമങ്ങളിൽ ചിരി പടർത്തുന്നത്. യാത്രക്കാരുടെ ശ്രദ്ധ പിടിച്ചുപറ്റിയെങ്കിലും യാതൊരു കൂസലുമില്ലാതെ സുഖമായി ഉറങ്ങുകയായിരുന്നു പൂച്ച. മുംബൈ മെട്രോയിലെ ഈ രസകരമായ കാഴ്ചയാണ് ഇപ്പോൾ വൈറലാകുന്നത്.
Comments