കൊച്ചി: വിദേശത്ത് ജോലി സ്വപ്‌നം കണ്ട് പണം നല്‍കിയ നിരവധി ഉദ്യോഗാര്‍ഥികളെ കാത്തിരുന്നത് തട്ടിപ്പിന്റെ വല. പോളണ്ട്, അര്‍മേനിയ, കാനഡ തുടങ്ങിയ രാജ്യങ്ങളിലേക്ക് തൊഴില്‍, ഇമിഗ്രേഷന്‍ വീസകള്‍ വാഗ്ദാനം ചെയ്ത് ലക്ഷങ്ങളുടെ തട്ടിപ്പ് നടത്തിയെന്ന കേസില്‍ ദുബായ് കേന്ദ്രീകരിച്ച് പ്രവര്‍ത്തിക്കുന്ന ആംസ്റ്റര്‍ ഓവര്‍സീസ് സി.ഇ.ഒ. പാര്‍വതി മായാ ഷാജി (39) അറസ്റ്റിലായത് പ്രവാസലോകത്തെ ഞെട്ടിച്ചു.
ഗള്‍ഫിലെ പ്രവാസി മലയാളികള്‍ക്കിടയില്‍ ആഡംബര ജീവിതശൈലിയും വ്യവസായ രംഗത്തെ പ്രവര്‍ത്തനങ്ങളും കൊണ്ട് ശ്രദ്ധേയയായിരുന്ന പാര്‍വതിക്കെതിരേയാണ് പരാതിപ്രവാഹമുണ്ടായത്. വിദേശത്തുനിന്ന് മടങ്ങിയെത്തുന്നതിനിടെ തിരുവനന്തപുരം രാജ്യാന്തര വിമാനത്താവളത്തില്‍ എമിഗ്രേഷന്‍ വിഭാഗം പാര്‍വതിയെ തടഞ്ഞുവയ്ക്കുകയായിരുന്നു. തുടര്‍ന്ന് വിമാനത്താവള പോലീസ് കസ്റ്റഡിയിലെടുത്ത് പാലാരിവട്ടം പോലീസിന് കൈമാറി.
നേരത്തെ പാലാരിവട്ടം പോലീസ് ഇവര്‍ക്കെതിരേ ലുക്ക് ഔട്ട് നോട്ടീസ് പുറപ്പെടുവിച്ചിരുന്നു. കൊച്ചിയിലെത്തിച്ചാണ് പാര്‍വതി മായാ ഷാജിയുടെ അറസ്റ്റ് രേഖപ്പെടുത്തിയത്. വഞ്ചന, ഇമിഗ്രേഷന്‍ ആക്ട് ലംഘനം തുടങ്ങിയ കുറ്റങ്ങളാണ് ഇവര്‍ക്കെതിരെ ചുമത്തിയിട്ടുള്ളത്. അറസ്റ്റിലായ പാര്‍വതി മായാ ഷാജിയെ കോടതി ഇന്ന് ഉച്ചയ്ക്ക് 12 മണിവരെ പോലീസ് കസ്റ്റഡിയില്‍ വിട്ടു. അര്‍മേനിയയിലും പോളണ്ടിലും ജോലി വാഗ്ദാനം ചെയ്ത് പണം തട്ടിയെന്ന പരാതികളിലാണ് പോലീസ് പ്രധാനമായും അന്വേഷണം നടത്തുന്നത്. പാലാരിവട്ടത്തെ ഓഫീസിലൂടെ രണ്ട് പേരില്‍ നിന്ന് 14 ലക്ഷം രൂപ തട്ടിയെടുത്തെന്ന പരാതിയിലാണ് ആദ്യം ലുക്ക് ഔട്ട് നോട്ടീസ് പുറപ്പെടുവിച്ചത്.
വിദേശത്ത് എന്‍ജിനീയറിങ് ജോലി വാഗ്ദാനം ചെയ്ത് തിരുവനന്തപുരം സ്വദേശിയില്‍ നിന്ന് 6.06 ലക്ഷം രൂപയും കാനഡയിലേക്ക് ജോലിയും വീസയും വാഗ്ദാനം ചെയ്ത് മറ്റൊരു യുവതിയില്‍ നിന്ന് 4.96 ലക്ഷം രൂപയും വിമാന ടിക്കറ്റിനായി 1.10 ലക്ഷം രൂപയും കൈപ്പറ്റിയെന്ന പരാതികളും നിലവിലുണ്ട്. നിയമസെല്ലുകളുടെ കണ്ണ് വെട്ടിച്ചായിരുന്നു ഇവരുടെ പ്രവര്‍ത്തനം. പോളണ്ട്, അര്‍മേനിയ, കുവൈത്ത് തുടങ്ങിയ രാജ്യങ്ങളിലേക്ക് തൊഴില്‍ വാഗ്ദാനം ചെയ്ത് വ്യാജ രേഖകള്‍ നല്‍കിയതായും അന്വേഷണത്തില്‍ കണ്ടെത്തിയിട്ടുണ്ട്.
പ്രാഥമിക അന്വേഷണത്തില്‍ നൂറിലേറെ ഉദ്യോഗാര്‍ഥികള്‍ പാര്‍വതിയുടെ തട്ടിപ്പിനിരയായതായി പോലീസ് വ്യക്തമാക്കിയിട്ടുണ്ട്. കാനഡ, യു.കെ, ഓസ്‌ട്രേലിയ തുടങ്ങിയ രാജ്യങ്ങളിലേക്ക് കുടിയേറ്റ സഹായം നല്‍കുന്ന രാജ്യാന്തര കണ്‍സള്‍ട്ടന്‍സിയായാണ് ആംസ്റ്റര്‍ ഓവര്‍സീസ് സ്വയം പരസ്യം ചെയ്തിരുന്നത്. ദുബായ് കരാമയില്‍ പ്രോജക്ട് മാനേജ്‌മെന്റ് സര്‍വീസ് സ്ഥാപനമെന്ന പേരില്‍ രജിസ്റ്റര്‍ ചെയ്ത ശേഷമാണ് കുടിയേറ്റ സഹായ സ്ഥാപനമായി പ്രവര്‍ത്തിച്ചതെന്നാണ് റിപ്പോര്‍ട്ടുകള്‍.
അതേസമയം, യു.എ.ഇയിലെ ദുബായ്, ഷാര്‍ജ, അജ്മാന്‍ തുടങ്ങിയ എമിറേറ്റുകളില്‍ മൈഗ്രേഷന്‍ തട്ടിപ്പുകളില്‍പ്പെട്ട നിരവധി പ്രവാസി മലയാളികള്‍ ദുരിതത്തിലാണെന്ന വിവരങ്ങളും പുറത്തുവരുന്നുണ്ട്.
നല്ല ജോലി ലഭിക്കുമെന്ന പ്രതീക്ഷയില്‍ ലക്ഷങ്ങള്‍ കടം വാങ്ങിയും വീടുകള്‍ പണയപ്പെടുത്തിയും വിദേശത്തെത്തിയവരില്‍ പലര്‍ക്കും വാഗ്ദാനം ചെയ്ത ജോലിയോ വീസയോ ലഭിക്കാതെ ദുരിതത്തിലാകേണ്ടിവരുന്നുവെന്നാണ് റിപ്പോര്‍ട്ടുകള്‍. കൃത്യമായ താമസസൗകര്യവും ഭക്ഷണവും ലഭിക്കാതെ കഴിയുന്നവരും നാട്ടിലേക്ക് തിരികെ വരാന്‍പോലും സാധിക്കാത്തവരുമുണ്ടെന്നാണ് വിവരം.
സ്വന്തം അധ്വാനം കൊണ്ട് ഉയര്‍ന്നുവന്ന സംരംഭകയെന്ന നിലയില്‍ മലയാളി സമൂഹത്തില്‍ ഏറെ ശ്രദ്ധിക്കപ്പെട്ട വ്യക്തിത്വമായിരുന്നു പാര്‍വതി മായ ഷാജി. ബഹ്‌റൈനില്‍ ആരംഭിച്ച റെസ്‌േറ്റാറന്റിന്റെ ഉടമ കൂടിയായ പാര്‍വതി മായാ ഷാജി മികച്ച യുവ വനിതാസംരംഭകയ്ക്കുള്ള പുരസ്‌കാരം കേരള വിനോദസഞ്ചാര വകുപ്പ് മന്ത്രി പി.സി. വിഷ്ണുനാഥില്‍ നിന്ന് ഏറ്റുവാങ്ങിയിരുന്നു.
ഇവരുടെ അറസ്റ്റ് വിവരം പുറത്തുവന്നതോടെ ദുബായിലെ ആംസ്റ്റര്‍ ഓഫീസുമായി ബന്ധപ്പെടാന്‍ ഇരകള്‍ ശ്രമിച്ചെങ്കിലും വ്യക്തമായ വിവരങ്ങള്‍ ലഭിച്ചില്ലെന്നും ഓഫീസുകള്‍ പൂട്ടിയ നിലയിലാണെന്നും റിപ്പോര്‍ട്ടുകള്‍ പറയുന്നു.
പാര്‍വതിയുടെ അറസ്റ്റ് വിവരം പുറത്തുവന്നതോടെ ദുബായിലെ ആംസ്റ്റര്‍ ഓഫീസുമായി ബന്ധപ്പെടാന്‍ ഇരകള്‍ ശ്രമിച്ചെങ്കിലും വിവരങ്ങള്‍ അറിയില്ലെന്ന നിലപാടിലാണ് ജീവനക്കാര്‍. ഓഫീസുകള്‍ പൂട്ടിയ നിലയിലാണെന്നും റിപ്പോര്‍ട്ടുകളുണ്ട്. സംഭവത്തില്‍ കൂടുതല്‍ പരാതികള്‍ ലഭിക്കാനുള്ള സാധ്യതയും പോലീസ് പരിശോധിച്ചുവരികയാണ്.
Comments