അമിത് ഷായ്ക്ക് നേരെ കൊല്ലത്ത് യൂത്ത് കോൺഗ്രസ് പ്രവർത്തകർ കരിങ്കൊടി കാട്ടി; പ്രതിഷേധിച്ചവരെ അറസ്റ്റുചെയ്തു

കൊല്ലം: കൊല്ലം ആശ്രാമം മൈതാനത്തിനു സമീപം വെച്ച് യൂത്ത് കോൺഗ്രസ് പ്രവർത്തകർ കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ കരിങ്കൊടി കാട്ടി. പ്രവർത്തകരെ പൊലീസ് അറസ്റ്റുചെയ്ത് നീക്കി.

ആശ്രാമം മൈതാനത്ത് ഹെലികോപ്ടറിൽ ഇറങ്ങിയ അമിത് ഷാ റോഡുമാർഗം നിർദ്ദിഷ്ട പരിപാടികൾക്കായി പോകുമ്പോഴാണ് കരിങ്കൊടിയുമായി യൂത്ത്കോൺഗ്രസ് പ്രവർത്തകർ വാഹനവ്യൂഹത്തിനു മുന്നിലേക്ക് ചാടി വീണത്. കഴിഞ്ഞ ദിവസം ഡൽഹിയിൽ നടന്ന പ്രതിഷേധത്തിനു തുടർച്ചയെന്നോണം ‘കേന്ദ്രസർക്കാർ ജനാധിപത്യത്തെ കശാപ്പു ചെയ്യുന്നു’, അമിത് ഷാ ഗോ ബാക്ക്’ തുടങ്ങിയ മുദ്രാവാക്യങ്ങൾ വിളിച്ചായിരുന്നു യൂത്ത് കോൺഗ്രസ് നേതാവ് ബിനു ചുള്ളിയിലിന്റെ നേതൃത്വത്തിലുള്ള പ്രതിഷേധം.

കൊല്ലത്ത് സഹകരണ സംരംഭങ്ങളുടെ ഉദ്ഘാടനത്തിനും മാതാ അമൃതാനന്ദമയിയുടെ പിറന്നാൾ ആഘോഷത്തിന്റെ ഉദ്ഘാടന പരിപാടിക്കുമാണ് കേന്ദ്ര ആഭ്യന്തരമന്ത്രി എത്തിയത്. അമിത്ഷാ എത്തുന്നതു കാരണം ധാരാളം ബിജെപി പ്രവർത്തരും സ്ഥലത്തുണ്ടായിരുന്നു. പ്രതിഷേധം മൂർച്ഛിച്ചപ്പോൾ ബിജെപി പ്രവർത്തകർ ഇടപെടാൻ ശ്രമിച്ചു. എന്നാൽ, പൊലീസിന്റെ സമയോചിത ഇടപെടൽ കാരണം വലിയൊരു സംഘർഷം ഒഴിവാകുകയായിരുന്നു.