ഇന്ത്യന്‍ ക്രിക്കറ്റിന്റെ ബാറ്റിംഗ് ഇതിഹാസം സച്ചിന്‍ ടെന്‍ഡുല്‍ക്കര്‍ക്കൊപ്പം ഒരുകാലത്ത് തിളങ്ങി നിന്നിരുന്നു ക്രിക്കറ്റ് താരമായിരുന്നു വിനോദ് കാംബ്ലി. സച്ചിന്റെ കളിക്കൂട്ടുകാരന്‍ കൂടിയായിരുന്ന കാംബ്ലി ഒരു സമയത്ത്, സച്ചിനേക്കാള്‍ കേമന്‍... ബ്രയാന്‍ ലാറയെ അനുസ്മരിക്കുന്ന ബാറ്റിംഗ് ശൈലിയുള്ള കളിക്കാരന്‍ എന്നിങ്ങനെയുള്ള വിശേഷണങ്ങള്‍ നേടിയിരുന്ന ക്രിക്കറ്റ് താരം കൂടിയായിരുന്നു. എന്നാല്‍ 17 ടെസ്റ്റുകള്‍ കൊണ്ട് കരിയര്‍ അവസാനിപ്പിക്കേണ്ടി വന്ന താരം കൂടിയാണ് കാംബ്ലിഴ
ഏറെ പ്രതീക്ഷയോടെ ഉയർന്നുവന്ന കാംബ്ലിയെന്ന അത്ഭുത പ്രതിഭ കരിയറിലെ മികച്ച തുടക്കത്തിന് ശേഷം പ്രതീക്ഷിച്ച ഉയരങ്ങളിലേക്ക് എത്തിയില്ല. ഇന്ത്യയ്ക്കായി 17 ടെസ്റ്റുകളും 104 ഏകദിനങ്ങളും കളിച്ച താരം 2000 ല്‍ അന്താരാഷ്ട്ര ക്രിക്കറ്റില്‍ നിന്ന് വിരമിച്ചു. ഔട്ട് ഓഫ് ഫോം എന്ന അവസ്ഥയിലേക്ക് കാംബ്ലി എത്തിയതിനൊപ്പം ഗ്രൗണ്ടിന് പുറത്തെ താരത്തിന്റെ നിയന്ത്രണമില്ലാത്ത ജീവിതവുമാണ് താരത്തിന്റെ കരിയര്‍ തകര്‍ത്തത്.
ഇപ്പോഴിതാ മുൻ ഇന്ത്യൻ ക്രിക്കറ്റ് താരം വിനോദ് കാംബ്ലിയുടെ ആരോഗ്യനിലയില്‍ വീണ്ടും ആശങ്കയിലായിരിക്കുകയാണ് ക്രിക്കറ്റ് ലോകം. താനെയിലെ ഒരു വയോജന പരിചരണ കേന്ദ്രത്തില്‍ കഴിയുന്ന കാംബ്ലിയുടെ പുതിയ വീഡിയോയാണ് സോഷ്യല്‍ മീഡിയയില്‍ നിറയുന്നത്. താനെയിലെ ‘നിദാൻ സെന്‍റർ ഫോർ എല്‍ഡർലി കെയർ’ കേന്ദ്രത്തില്‍ നിന്നുള്ളതാണ് ഈ വീഡിയോ.
വയോജന കേന്ദ്രത്തിലെ ശുചിത്വത്തെയും സൗകര്യങ്ങളെയും പ്രശംസിച്ച്‌ കാംബ്ലി സംസാരിക്കുന്നതാണ് വീഡിയോയില്‍ കാണുന്നത്. ‘‘വയോജന കേന്ദ്രത്തിലെ ജീവിതം സ്വന്തം വീട്ടിലെന്ന പോലെ അനുഭവപ്പെടുന്നു...’’ എന്ന് പറയുമ്പോഴും വ്യക്തമായി സംസാരിക്കാൻ പോലും പ്രയാസപ്പെടുന്ന കാംബ്ലിയുടെ ശാരീരികാവസ്ഥയാണ് ആരാധകരെ ആശങ്കയിലാഴ്ത്തിയത്.
54-കാരനായ കാംബ്ലി കഴിഞ്ഞ കുറച്ചുകാലമായി കടുത്ത ആരോഗ്യപ്രശ്നങ്ങള്‍ നേരിടുകയാണെന്ന് വാര്‍ത്തകള്‍ വന്നിതുന്നു. കാംബ്ലിയുടെ തലച്ചോറില്‍ രക്തക്കട്ട പിടിച്ചിട്ടുണ്ടെന്നും ഇതുമൂലം താരത്തിന് ഓർമ്മക്കുറവുണ്ടെന്നും സുഹൃത്തും മുൻ ഫസ്റ്റ് ക്ലാസ് അമ്പയറുമായ മാർക്കസ് കുട്ടോ വെളിപ്പെടുത്തിയിരുന്നു. സംഭവങ്ങള്‍ പെട്ടെന്ന് മറന്നുപോകുന്ന അവസ്ഥയാണെന്നും പുകവലി വൻ ആരോഗ്യപ്രതിസന്ധി സൃഷ്ടിക്കുമെന്ന് ഡോക്ടർമാർ മുന്നറിയിപ്പ് നല്‍കിയിട്ടുണ്ടെന്നും അമ്പയര്‍ പറഞ്ഞിരുന്നു. എന്നാല്‍ കാംബ്ലിയുടെ ഭാര്യ ആന്ദ്രിയ ഹെവിറ്റ് ഈ വാർത്ത നിഷേധിച്ച്‌ രംഗത്തെത്തി. കാംബ്ലിയുടെ ആരോഗ്യനില തൃപ്തികരമാണെന്നും തെറ്റായ വിവരങ്ങളാണ് പ്രചരിക്കുന്നതെന്നുമാണ് ആന്ദ്രിയ വ്യക്തമാക്കിയത്. പക്ഷേ താരത്തിന്റെ പുതിയ വീഡിയോ വന്നതോടെ വീണ്ടും ആശങ്കയിലാകുകയാണ് കായികപ്രേമികള്‍.
Comments