ജപ്പാനിൽ മഴയത്ത് സൈക്കിളിൽ യാത്ര ചെയ്യുന്നതിനിടെ അപകടത്തിൽപ്പെട്ട ഇന്ത്യൻ യുവതിക്ക് ലഭിച്ച അപ്രതീക്ഷിത സഹായമാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. ജോലിക്ക് പോകുന്നതിനിടെ സൈക്കിൾ തെന്നിവീണതോടെ യുവതിയുടെ തോളിന് പരിക്കേൽക്കുകയും സൈക്കിളിന്റെ ഹാൻഡിൽ വളയുകയും ചെയ്തു. ജോലിസ്ഥലത്ത് പ്രാഥമിക ശുശ്രൂഷ നേടിയ ശേഷം ഉച്ചഭക്ഷണ സമയത്ത് സൈക്കിൾ നന്നാക്കാനായി അവർ അടുത്തുള്ള റിപ്പയർ ഷോപ്പിലെത്തി.
ജപ്പാനിലെ സൈക്കിൾ അറ്റകുറ്റപ്പണികൾക്ക് നല്ല തുക ചെലവാകുമെന്ന് അറിയാമായിരുന്നതിനാൽ പണം നൽകാൻ തയ്യാറെടുത്തായിരുന്നു യുവതി കടയിലെത്തിയത്. സൈക്കിളിന്റെ സീറ്റ് ഉയരം ക്രമീകരിക്കാൻ നേരത്തെ 500 യെൻ നൽകിയ അനുഭവവും അവർ പങ്കുവെച്ചു. എന്നാൽ കടയിലെത്തിയപ്പോൾ ഉടമ ആദ്യം ശ്രദ്ധിച്ചത് സൈക്കിളിന്റെ കേടുപാടുകളിലേക്കല്ല, യുവതിയുടെ പരിക്കുകളിലേക്കായിരുന്നു. സുഖമാണോയെന്ന് ചോദിച്ച ശേഷം അദ്ദേഹം സൈക്കിളിന്റെ ഹാൻഡിൽ വേഗത്തിൽ ശരിയാക്കി നൽകി.
അറ്റകുറ്റപ്പണിക്ക് എത്ര രൂപ നൽകണമെന്ന് യുവതി ചോദിച്ചപ്പോൾ ജാപ്പനീസ് ഭാഷയിൽ ‘ഇകുറാ ദേശു കാ?’ എന്ന് ചോദിച്ചു. എന്നാൽ കടയുടമയുടെ മറുപടി ‘വിലയില്ല’ എന്നായിരുന്നു. പണം വാങ്ങാതെ സൈക്കിൾ ശരിയാക്കിയതിനു പുറമെ മഴയത്ത് സൈക്കിൾ ഓടിക്കുമ്പോൾ ശ്രദ്ധിക്കേണ്ട കാര്യങ്ങളെക്കുറിച്ചും അദ്ദേഹം ഉപദേശം നൽകി. കടയുടമയുടെ കരുതൽ യുവതിയെ ഏറെ സ്പർശിച്ചു. നന്ദി അറിയിക്കാനായി സമീപത്തെ ഇന്ത്യൻ റെസ്റ്റോറന്റിൽ നിന്ന് അദ്ദേഹത്തിനായി ചൂടുള്ള ഭക്ഷണം വാങ്ങി യുവതി വീണ്ടും കടയിലെത്തി.
യുവതി ഭക്ഷണവുമായി തിരിച്ചെത്തിയപ്പോൾ വീണ്ടും എന്തെങ്കിലും അപകടമുണ്ടായെന്നായിരുന്നു കടയുടമ ആദ്യം കരുതിയത്. എന്നാൽ തനിക്കായി ഭക്ഷണം കൊണ്ടുവന്നതാണെന്ന് അറിഞ്ഞതോടെ അദ്ദേഹം ഏറെ സന്തോഷിച്ചു. സോനം മിധ എന്ന യുവതിയാണ് ഈ അനുഭവം ഇൻസ്റ്റഗ്രാമിലൂടെ പങ്കുവെച്ചത്. അപകടം കൊണ്ടോ പരിക്ക് കൊണ്ടോ അല്ല, ഒരു ജപ്പാൻകാരൻ കാണിച്ച മനുഷ്യത്വത്തിന്റെ പേരിലാണ് ഈ ദിവസം താൻ എന്നും ഓർക്കുകയെന്ന് അവർ പറഞ്ഞു. സംഭവത്തിന്റെ വീഡിയോ സോഷ്യൽ മീഡിയയിൽ വൈറലായതോടെ ഇരുവരുടെയും സ്നേഹപൂർവമായ പെരുമാറ്റത്തെ പ്രശംസിച്ച് നിരവധി പേരാണ് രംഗത്തെത്തിയത്.
Comments