തിരുവനന്തപുരം: നിലവിലെ വഖഫ് ബോര്‍ഡിന്റെ ഘടനയില്‍ മാറ്റങ്ങള്‍ വരുത്തി ബോര്‍ഡ് പിരിച്ചുവിടാന്‍ സംസ്ഥാന സര്‍ക്കാര്‍ ഒരുങ്ങുന്നു. ചട്ടപ്രകാരമുള്ള യോഗ്യതകളും മതിയായ പ്രാതിനിധ്യവും ഇല്ലെന്ന വിലയിരുത്തലിനെ തുടര്‍ന്നാണ് ഈ നിര്‍ണായക തീരുമാനം. ഇക്കാര്യം സംബന്ധിച്ച ഔദ്യോഗിക വിജ്ഞാപനം ഉടന്‍ പുറത്തിറങ്ങിയേക്കും.
സുപ്രീം കോടതി ഉത്തരവുകളുടെയും വഖഫ് നിയമഭേദഗതിയുടെയും അടിസ്ഥാനത്തിലാണ് പുതിയ പുനഃസംഘടന. നാലര വര്‍ഷത്തോളം കാലാവധി ബാക്കിനില്‍ക്കെയാണ് സര്‍ക്കാര്‍ ബോര്‍ഡ് പിരിച്ചുവിടാന്‍ തീരുമാനിച്ചിരിക്കുന്നത്. കഴിഞ്ഞ മാര്‍ച്ചില്‍ അഞ്ച് വര്‍ഷത്തെ കാലാവധി ലക്ഷ്യമിട്ട് കെ.എസ്. ഹംസയെ ചെയര്‍മാനായി നിയമിച്ചുകൊണ്ട് നിലവിലുള്ള ബോര്‍ഡ് നിലവില്‍ വന്നിരുന്നു.
വഖഫ് നിയമഭേദഗതി പ്രകാരം ബോര്‍ഡില്‍ രണ്ട് അമുസ്ലിം അംഗങ്ങളെക്കൂടി പുതിയതായി ഉള്‍പ്പെടുത്തും. മുന്‍പ് ബോര്‍ഡ് രൂപീകരിച്ചപ്പോള്‍ ചട്ടപ്രകാരമുള്ള പ്രാതിനിധ്യ നിര്‍ണയം പൂര്‍ത്തിയായിരുന്നില്ലെന്ന് സര്‍ക്കാര്‍ ഹൈക്കോടതിയെ അറിയിച്ചിരുന്നു. ഈ പഴുതുകള്‍ അടച്ചുകൊണ്ടാണ് പുതിയ ബോര്‍ഡ് നിലവില്‍ വരുന്നത്. പുതിയ ഭേദഗതി അനുസരിച്ച് ബോര്‍ഡില്‍ ആകെ 11 അംഗങ്ങള്‍ ഉണ്ടായിരിക്കണം.
ഫെബ്രുവരിയില്‍ 9 അംഗങ്ങളെ ഉള്‍പ്പെടുത്തി ആയിരുന്നു എല്‍.ഡി.എഫ് സര്‍ക്കാര്‍ ബോര്‍ഡ് രൂപീകരിച്ചിരുന്നത്. ഇതില്‍ മതപണ്ഡിതന്മാര്‍, മുതവല്ലിമാര്‍ തുടങ്ങിയ വിവിധ വിഭാഗങ്ങളില്‍ നിന്നുള്ള നാമനിര്‍ദേശങ്ങളും ഉള്‍പ്പെട്ടിരുന്നു. വഖഫ് ബോര്‍ഡ് പുനഃസംഘടന അടിയന്തരമായി നടപ്പാക്കേണ്ടതുണ്ടെന്ന് സര്‍ക്കാര്‍ നേരത്തെ ഹൈക്കോടതിയില്‍ വ്യക്തമാക്കിയ സാഹചര്യത്തിലാണ് ഈ നടപടി വേഗത്തിലാകുന്നത്.
Comments