തിരുവനന്തപുരം: സ്വന്തം നേതാക്കളെ ഇങ്ങിനെ വലിച്ചിഴയ്ക്കരുതെന്ന് സൈബര്‍ ആക്രമണത്തില്‍ പ്രതികരിച്ച് കെ.സി. വേണുഗോപാല്‍. താന്‍ സൈബര്‍ ആക്രമണം കുറേ കണ്ടതാണെന്നും അതുകൊണ്ടു പ്രശ്‌നമില്ലെന്നും പ്രവര്‍ത്തകള്‍ നിലകൊള്ളേണ്ടത് പാര്‍ട്ടിക്ക് വേണ്ടിയാണെന്നും പറഞ്ഞു. തനിക്കെതിരേ ഉയര്‍ന്ന സൈബര്‍ ആക്രമണ ആരോപണത്തിലായിരുന്നു കെ.സി. വേണുഗോപാല്‍ മറുപടി നല്‍കിയത്.
ഏത് ഗ്രൂപ്പിലെ നേതാവായാലും അവഹേളിച്ച് സൈബര്‍ ഇടത്ത് ആഘോഷിക്കുന്നത് പാര്‍ട്ടിക്ക് ഗുണം ചെയ്യില്ല. സ്വന്തം പാര്‍ട്ടിയിലെ ഇഷ്ടമുള്ളതോ ഇഷ്ടമില്ലാത്തതോ ആയ നേതാവിനെ വലിച്ചിഴച്ച് അപമാനിക്കുന്നത് ഒഴിവാക്കുന്നതാണ് ഉചിതം. ഞാനുമായി ബന്ധപ്പെട്ട ഒരു വിഷയത്തിന്റെ പേരില്‍ കോണ്‍ഗ്രസ് പ്രവര്‍ത്തകനെ പൊലീസ് സ്റ്റേഷനിലേക്ക് കൊണ്ടുപോകുന്നതിനോട് യോജിപ്പില്ല. മുഖ്യമന്ത്രി അറിഞ്ഞിട്ടാണ് ഇതെന്ന് കരുതുന്നില്ല. തന്നെ വ്യക്തിപരമായി അധിക്ഷേപിച്ചതിന്റെ പേരില്‍ അതിന് പിന്നില്‍ പ്രവര്‍ത്തിച്ചവരെ ജയിലില്‍ അടപ്പിക്കണം എന്ന വാശിയുള്ള ആളല്ല താന്‍.
കോണ്‍ഗ്രസുകാര്‍ അതിന്റെ പേരില്‍ ബുദ്ധിമുട്ട് അനുഭവിക്കരുതെന്നും കെ സി വേണുഗോപാല്‍ പറഞ്ഞു. സുരക്ഷാവീഴ്ചയുമായി ബന്ധപ്പെട്ട് ആക്ഷേപം ശക്തമാകുമ്പോള്‍ അമിത്ഷായ്ക്ക് എതിരേ യൂത്ത് കോണ്‍ഗ്രസ് നടത്തിയ കരിങ്കൊടി പ്രതിഷേധത്തെയും അദ്ദേഹം ന്യായീകരിച്ചു. അതിത്ഷാ ദൈവം തമ്പുരാനല്ലെന്നും അദ്ദേഹം കരിങ്കൊടിക്ക് അതീതതനല്ലെന്നും പറഞ്ഞു. കേന്ദ്രത്തില്‍ നടക്കുന്ന തെരഞ്ഞെടുപ്പ് കമ്മീഷണര്‍ ഗ്യാനേഷ്‌കുമാറിനെതിരേയുള്ള സമരം ആലോചിച്ച് തീരുമാനമെടുക്കുമെന്നും പറഞ്ഞു.
ഇക്കാര്യത്തില്‍ ജനാധിപത്യത്തിന്റെ അടിത്തറ സംരക്ഷിക്കും. മറ്റന്നാള്‍ ഇന്‍ഡ്യാ സഖ്യം ചേര്‍ന്ന ശേഷം തുടര്‍സമരപരിപാടികള്‍ തീരുമാനിക്കും. ഇത് ജനാധിപത്യം അട്ടിമറിക്കാനുള്ള നീക്കമാണെന്നും ഗ്യാനേഷ് കുമാറിനെ നീതിക്ക് മുന്നില്‍ കൊണ്ടുവരുമെന്നും പറഞ്ഞു. അതേസമയം കെ സി വേണുഗോപാലിനെതിരായ സൈബര്‍ ആക്രമണത്തില്‍ പൊലീസ് വിഡി സതീശന്‍ അനുകൂലികളായ കോണ്‍ഗ്രസ് പ്രവര്‍ത്തകര്‍ക്കെതിരെ കേസെടുത്തിട്ടുണ്ട്. ജാമ്യമില്ലാ വകുപ്പ് പ്രകാരം അഞ്ച് പേര്‍ക്കെതിരെയാണ് കേസെടുത്തിരിക്കുന്നത്.
കെപിസിസി രാഷ്ട്രീയകാര്യ സമിതി അംഗം ജോണ്‍സണ്‍ എബ്രഹാമിന്റെ പരാതിയിലാണ് കേസ്. സംസ്ഥാന പൊലീസ് മേധാവിക്കായിരുന്നു ജോണ്‍സണ്‍ എബ്രഹാം പരാതി നല്‍കിയത്. സൈബര്‍ ആക്രമണം നടത്തിയ സോഷ്യല്‍ മീഡിയ അക്കൗണ്ടുകളുടെ വിവരങ്ങളും പരാതിക്കൊപ്പം കൈമാറിയിരുന്നു. മാസങ്ങള്‍ക്ക് മുമ്പ് നല്‍കിയ പരാതിയില്‍ കഴിഞ്ഞ ദിവസമാണ് ആഭ്യന്തര മന്ത്രി നടപടിക്ക് നിര്‍ദേശം നല്‍കിയത്.
സമൂഹമാധ്യമങ്ങളിലൂടെ തുടര്‍ച്ചയായി സൈബര്‍ ആക്രമണം നടത്തിയെന്നായിരുന്നു പരാതി. ആഭ്യന്തര മന്ത്രിയുടെ നിര്‍ദേശപ്രകാരം അന്വേഷണത്തിനായി സൈബര്‍ വിഭാഗം ഐജിയെ ചുമതലപ്പെടുത്തുകയായിരുന്നു.
Comments