മകനും ഗായകനുമായ അരവിന്ദിന് ജന്മദിനാശംസകള്‍ നേര്‍ന്ന് ഗായകന്‍ ജി വേണുഗോപാല്‍. മകന്റെ കുട്ടിക്കാലത്തെ ചിത്രവും തനിക്കും ഭാര്യയ്ക്കുമൊപ്പം നിൽക്കുന്ന മറ്റൊരു ചിത്രവും പങ്കിട്ടുകൊണ്ടാണ് ജി. വേണുഗോപാൽ സമൂഹമാധ്യമത്തിൽ ആശംസകൾ പങ്കുവെച്ചത്.
“ഇവനിന്നു ജന്മദിനം. ആദ്യത്തെ കണ്മണി ആണായിരുന്നു... അച്ഛനെപ്പോലെ ഇരുന്നില്ലെങ്കിലും അച്ഛനെപ്പോലെ പാടി. അച്ഛനെ ഓരോ വാക്കിലും ഓർമ്മിപ്പിക്കുന്ന ശബ്ദമുണ്ടായി. അച്ഛനെക്കാളും നന്നാവട്ടെ മോനെ എല്ലാം. സർവ്വ നന്മകളും സൗഭാഗ്യവും നിന്റെ ഈ ജന്മദിനത്തിൽ നേരുന്നു” എന്നായിരുന്നു ജി. വേണുഗോപാലിന്റെ ഹൃദ്യമായ കുറിപ്പ്.
അച്ഛന്റെ പാത പിന്തുടർന്ന് സംഗീതലോകത്ത് ശ്രദ്ധേയമായ നേട്ടങ്ങൾ കൈവരിച്ച ഗായകനാണ് അരവിന്ദ് വേണുഗോപാൽ. 'ദ് ട്രെയ്ൻ' എന്ന സിനിമയിലൂടെയാണ് അരവിന്ദ് പിന്നണി ഗായകനായി അരങ്ങേറ്റം കുറിക്കുന്നത്. തുടർന്ന് 'സൺഡേ ഹോളിഡേ', 'ലൂക്ക', 'ഹൃദയം', 'മധുര മനോഹര മോഹം' തുടങ്ങി നിരവധി ചിത്രങ്ങളിൽ അദ്ദേഹം പാടി. 'മൺസൂൺ രാഗ' എന്ന ചിത്രത്തിലൂടെ കന്നഡ ചലച്ചിത്രമേഖലയിലും അദ്ദേഹം സാന്നിധ്യമറിയിച്ചു.
കഴിഞ്ഞ വർഷമായിരുന്നു അരവിന്ദ് വേണുഗോപാലിന്റെ വിവാഹം. നടിയും മോഡലും നർത്തകിയുമായ സ്നേഹ അജിത്താണ് ഭാര്യ.
Comments