സിനിമാലോകത്ത് വില്ലൻ വേഷങ്ങളിലൂടെ ശ്രദ്ധേയനായി മാറിയ ശേഷം കൊമേഡിയനായും സഹനടനായും തിളങ്ങിയ താരമാണ് സുരേഷ് കൃഷ്ണ. വില്ലന്‍ വേഷങ്ങളില്‍ നിന്നും കോമഡിയിലേക്കുള്ള സുരേഷ് കൃഷ്ണയുടെ ചുവടുമാറ്റത്തെ നിറഞ്ഞ കൈയടിയോടെയാണ് താരം സ്വീകരിച്ചത്. കണ്‍വിന്‍സിങ് സ്റ്റാര്‍ പേരിലാണ് സോഷ്യല്‍ മീഡിയയില്‍ ഇന്ന് സുരേഷ് കൃഷ്ണ അറിയപ്പെടുന്നത്. താരം ചെയ്യുന്ന സിനിമകളെല്ലാം പ്രേക്ഷകര്‍ ഏറ്റെടുക്കാറുമുണ്ട്.
ഇപ്പോഴിതാ സിനിമാ മോഹവുമായി നടന്നിരുന്ന ചെറുപ്പകാലത്ത് സുഹൃത്തുക്കളുടെ സഹായത്തോടെ പകർത്തിയ 38 വർഷം പഴക്കമുള്ള ചിത്രങ്ങള്‍ പങ്കിട്ടിരിക്കുകയാണ് സുരേഷ് കൃഷ്ണ. സുഹൃത്തുക്കളെടുത്ത ചിത്രങ്ങളില്‍ വഴിപോക്കന്റെ ബൈക്കും പല സുഹൃത്തുക്കളുടേതായ കോസ്റ്റ്യൂമുമാണ് ധരിച്ചിരിക്കുന്നത് എന്നാണ് താരം കുറിച്ചിരിക്കുന്നത്.
‘‘ഈ ഫോട്ടോകൾക്ക് 38 വർഷം പഴക്കം ഉണ്ട്... സിനിമ മോഹമായി നടന്ന ഒരു ചെറുപ്പക്കാരൻ ഒരു ഫോട്ടോ ഷൂട്ട്‌ സുഹൃത്തുക്കളുടെ സഹായത്തോടെ നടത്തുന്നു... ഇത് ഇപ്പൊ കാണുമ്പോൾ മുഖത്ത് ഒരു ചെറു പുഞ്ചിരി ഉണ്ടെങ്കിലും ചില ഓർമപ്പെടുത്തൽ മനസ്സിൽ കൂടി കടന്നു പോകുന്നു, അതിൽ സന്തോഷവും സങ്കടവും ഓക്കെ കൂടി കലർന്നത്...
ക്രെഡിറ്റ്സ്
ഫോട്ടോ എടുത്തത് : പ്രിയപ്പെട്ട സുഹൃത്തുക്കൾ
കോസ്റ്റ്യൂം :പല സുഹൃത്തുക്കളുടെ
ബൈക്ക് : ഒരു വഴിപോക്കന്റെ
മേക്കപ്പ് ആന്‍ഡ് സ്റ്റൈല്‍: അതൊക്കെ അന്ന് വലിയ ചിലവാ
ഫിലിം റോൾ & ഫോട്ടോ : കടം
പുകവലി ആരോഗ്യത്തിന് ഹാനികരമാണ്...’’ എന്ന രസകരമായ ക്യാപ്ഷന്‍ നല്‍കിയാണ് സുരേഷ് കൃഷ്ണ ത്രോബാക്ക് ചിത്രങ്ങള്‍ പങ്കിട്ടിരിക്കുന്നത്. നാലായിരത്തിലധികം ലൈക്കുകളാണ് ഈ കമന്റിനു മാത്രം ലഭിച്ചത്. നടൻ വിനയ് ഫോർട്ട്, സൗബിൻ ഷാഹിർ ഉൾപ്പെടെ നിരവധി സിനിമ താരങ്ങളും ചിത്രത്തിൽ കമന്റുകൾ പങ്കുവച്ചിട്ടുണ്ട്. നിരവധി ആരാധകരും താരത്തിന്റെ ഇന്‍സ്റ്റഗ്രാം പോസ്റ്റിനു താഴെ രസകരമായ കമന്റുകള്‍ കുറിച്ചിട്ടുണ്ട്. ‘ആത്മാർത്ഥമായി ഓടിക്കാൻ ആണെങ്കിൽ ഒരു ടയർ ആയാലും മതി, 100 ഇഡലി തിന്ന ചെറുപ്പക്കാരൻ, വണ്ടിക്കാരൻ മുതൽ ക്യാമറ മാനെ വരെ കൺവിൻസ് ചെയ്തു... കണ്‍വിന്‍സിംഗ് സ്റ്റാര്‍...’ എന്നതടക്കമാണ് കമന്റുകള്‍.
ഗിരീഷ് എ.ഡി സംവിധാനം ചെയ്ത് ബോക്സ് ഓഫീസിൽ ചരിത്ര വിജയം കുറിച്ച ‘ബെത്‌ലഹേം കുടുംബ യൂണിറ്റാ’ണ് സുരേഷ് കൃഷ്ണയുടേതായി അവസാനം തിയേറ്ററിലെത്തിയ സിനിമ. നിവിൻ പോളിയും മമിത ബൈജും കേന്ദ്ര കഥാപാത്രങ്ങളായെത്തിയ ചിത്രത്തിൽ സുരേഷ് കൃഷ്ണയും ബൈജു എന്ന സുപ്രധാന വേഷം ചെയ്തിരുന്നു. നിവിൻ പോളിയുടെ ജസ്റ്റിന്‍ എന്ന കഥാപാത്രത്തിനൊപ്പം കോമഡി രംഗങ്ങളിൽ തിളങ്ങിയ സുരേഷ് കൃഷ്ണയുടെ എന്ന കഥാപാത്രം തിയേറ്ററുകളിൽ വലിയ കൈയടി നേടിയിരുന്നു. സുരേഷ് കൃഷ്ണയുടെ ഡയലോഗുകളിൽ പലതും സോഷ്യൽ മീഡിയയിൽ ട്രെൻഡിംഗുമാണ്.
ഹാസ്യപ്രധാനമുള്ള വേഷങ്ങളിലൂടെ അഭിനയം തേച്ചുമിനുക്കുകയാണ് താരമിപ്പോള്‍. വിനീത് ശ്രീനിവാസൻ നായകനാകുന്ന ‘ചടങ്ങ്’ ആണ് സുരേഷ് കൃഷ്ണയുടെ വരാനിരിക്കുന്ന ചിത്രം. ജഗദീഷ്, സോന നായർ, മീനാക്ഷി മാധവി, നിഹാൽ നിഹാം, ബിജു സോപാനം, ശ്രീജിത്ത് ബാബു തുടങ്ങിയവരും ചിത്രത്തിൽ അണിനിരക്കുന്നുണ്ട്.
Comments