സോഷ്യല്‍ മീഡിയ താരം രേണു സുധി മലയാളികള്‍ക്ക് പ്രിയങ്കരിയാണ്. കാന്‍സര്‍ ചികിത്സയില്‍ കഴിയുന്ന രേണുവിന്റെ ആരോഗ്യം ഗുരുതരാസ്ഥയിലാണെന്ന വാര്‍ത്തകള്‍ ആരാധകരെ നിരാശരാക്കിയിരുന്നു.
ഇപ്പോഴിതാ താന്‍ കടന്നുപോയ അതീവ പ്രയാസകരമായ ദിവസങ്ങളെക്കുറിച്ച് തുറന്നുപറഞ്ഞിരിക്കുകയാണ് രേണു സുധി. അഞ്ചാമത്തെ കീമോതെറാപ്പിക്ക് പിന്നാലെ ആരോഗ്യനില മോശമായതിനെ തുടര്‍ന്ന് ഏകദേശം പതിനഞ്ച് ദിവസത്തോളം ഐസിയുവില്‍ കഴിയേണ്ടിവന്നുവെന്നാണ് രേണു പറയുന്നത്. ജീവിതത്തിലേക്ക് ഇനി ഒരു തിരിച്ചുവരവ് ഉണ്ടാകുമോ എന്ന് പോലും ഭയപ്പെട്ട ദിവസങ്ങളായിരുന്നു അതെന്നും രേണു പങ്കുവെച്ചു.
ചേച്ചിക്കൊപ്പം ഇരുന്നാണ് ചികിത്സയ്ക്കിടയിലെ അനുഭവങ്ങള്‍ രേണു പങ്കുവെച്ചത്. കീമോതെറാപ്പിക്ക് ശേഷം പ്ലേറ്റ്‌ലെറ്റ് കൗണ്ട് വലിയ തോതില്‍ കുറഞ്ഞതോടെ ശരീരം വളരെ ക്ഷീണിക്കുകയും നിരവധി ശാരീരിക ബുദ്ധിമുട്ടുകള്‍ നേരിടേണ്ടിവരികയും ചെയ്തതായി രേണു പറയുന്നു. ശരീരം അസ്ഥികൂടം പോലെയായ അവസ്ഥയിലേക്കെത്തിയെന്നും ആ ദിവസങ്ങള്‍ മരണത്തെ നേരില്‍ കണ്ടതുപോലെയായിരുന്നുവെന്നും അവര്‍ ഓര്‍ക്കുന്നു.
എന്നാല്‍ ആശുപത്രിയില്‍ കഴിയുന്നതിനിടെ തന്നെക്കാള്‍ ഗുരുതരമായ അവസ്ഥയില്‍, നോക്കാനും പരിചരിക്കാനും ആരുമില്ലാതെ വേദനകൊണ്ട് കരയുന്ന നിരവധി പേരെ കണ്ടപ്പോള്‍ തന്റെ ബുദ്ധിമുട്ടുകള്‍ ഒന്നുമല്ലെന്ന് തോന്നിയെന്നും രേണു പറഞ്ഞു. ഏറ്റവും പ്രയാസകരമായ സമയത്ത് തനിക്കുവേണ്ടി പ്രാര്‍ത്ഥിക്കുകയും പിന്തുണ നല്‍കുകയും ഒപ്പം നില്‍ക്കുകയും ചെയ്ത എല്ലാവരോടും അവര്‍ നന്ദി അറിയിച്ചു.
നീണ്ട ആശുപത്രിവാസത്തിനും ചികിത്സയ്ക്കും ശേഷം ആരോഗ്യനിലയില്‍ പുരോഗതി ഉണ്ടായതോടെ രേണു വീട്ടിലേക്ക് മടങ്ങിയിരിക്കുകയാണ്. ശരീരം പതുക്കെ പഴയ നിലയിലേക്ക് തിരിച്ചെത്തുകയാണെന്നും മുടി വീണ്ടും വളരാന്‍ തുടങ്ങിയതില്‍ ഏറെ സന്തോഷമുണ്ടെന്നും അവര്‍ പറയുന്നു.
Comments