മലയാള സിനിമയില്‍ ഒരു തലമുറയിലാകെ തീ കോരി നിറച്ച ക്ഷുഭിത യൗവ്വനമായിരുന്നു സുകുമാരൻ. നേരെ വാ നേരെ പോ എന്ന പ്രകൃതമുള്ള ജീവിതത്തില്‍ അഭിനയിക്കാനറിയാത്ത മനുഷ്യന്‍. തീക്ഷ്ണമായ കണ്ണുകളിൽ നിഷേധത്തിന്റെ കടലിരമ്പിയ നായക സങ്കൽപ്പം. ഒരു കാലത്ത് നായകനായി നിറഞ്ഞു നിന്ന താരം പിന്നീട് വില്ലനായും പ്രേക്ഷകരുടെ വെറുപ്പ് നേടി. സ്വഭാവ പ്രതിനായക വേഷങ്ങളിലേക്കു തിരിഞ്ഞപ്പോഴും മലയാളസിനിമയില്‍ തന്റെതായ ഒരിടം കണ്ടെത്താനായ അപൂര്‍വ്വം താരങ്ങളില്‍ ഒരാള്‍.
ഒരു കാലത്ത് മലയാള സിനിമകളില്‍ നിറഞ്ഞു നിന്നിരുന്ന സുകുമാരനെ ഇന്നത്തെ തലമുറയ്ക്ക് കൂടുതലറിയാവുന്നത് നടൻമാരായ പൃഥ്വിരാജിന്റെയും ഇന്ദ്രജിത്തിന്റെയും അച്ഛനായാണ്. അൻപത് വർഷത്തിലേറെയായി മലയാള സിനിമയിൽ നിറഞ്ഞുനിൽക്കുന്ന നടിയാണെങ്കിലും സുകുമാരന്റെ ഭാര്യയായ മല്ലിക എന്ന വിശേഷണത്തില്‍ എന്നും അഭിമാനിക്കുന്ന വ്യക്തിയാണ് സുകുമാരന്റെ ഭാര്യ മല്ലിക സുകുമാരന്‍. ‘സുകവേട്ടന്‍’ എന്ന പേര് പറയുമ്പോള്‍ തന്നെ മല്ലികയുടെ മുഖത്തും കണ്ണുകളിലും ആ അഭിമാനം നിഴലിക്കുന്നത് പലപ്പോഴും പ്രേക്ഷകര്‍ കണ്ടിട്ടുണ്ട്.
ഇപ്പോഴിതാ സുകുമാരനെപ്പറ്റി ഭാര്യ മല്ലിക സുകുമാരൻ പറഞ്ഞ വാക്കുകളാണ് സോഷ്യൽ മീഡിയ ഏറ്റെടുക്കുന്നത്. സുകുമാരന്‍ എപ്പോഴും തന്റെയും മക്കളുടെയും കൂടെയുണ്ടെന്നും ബലപ്പെടുത്തേണ്ട സമയത്ത് ബലപ്പെടുത്താറുണ്ടെന്നും മല്ലിക സുകുമാരന്‍ പറയുന്നു.
‘‘അയ്യോ... സംശയമില്ലാത്ത കാര്യമാണത്. എനിക്ക് എന്തെങ്കിലും ദുഃഖം ഉണ്ടായിട്ടുണ്ടെങ്കിൽ അതിന് തക്കതായ ഒരു കാരണം ഉണ്ടെന്ന് നന്നായിട്ട് മനസ്സിലാക്കിയ ഒരാളാണ് സുകുവേട്ടൻ. അതുകൊണ്ട് മാത്രമാണ് ആരുടെ മുമ്പിലും വഴങ്ങാത്ത സുകുമാരൻ എന്റെ വീട്ടിൽ വന്ന് എന്റെ അച്ഛനോടും അമ്മയോടും പറഞ്ഞത്, ‘ഞാൻ ഈ കുട്ടിയെ വിവാഹം കഴിക്കാം. എന്തിനാ ഇങ്ങനെ ആവശ്യമില്ലാത്ത ഇടത്ത് വിഷമിക്കുന്നത്? ഒരുപാട് പൊട്ടൻഷ്യൽ ഉള്ള ഒരു ലേഡിയാണ് നിങ്ങളുടെ മകൾ. അവര് നല്ല സുഖമായിട്ട് പിടിക്കട്ടെ. അല്ലാതെ പല കാര്യങ്ങൾക്കും ഇടപെടേണ്ട ഒരു വ്യക്തിയാണ്...’ എന്ന്.
ഞാൻ എന്നിട്ട് കളിയാക്കും, ‘എന്റെ അച്ഛൻ കോൺഗ്രസ്സുകാരനാണ്....’ എന്ന്. അപ്പോ സുകുവേട്ടന്‍ പറയും, ‘ഒരാളുടെ ജീവിതം തീരുമാനിക്കുന്നത് കോൺഗ്രസ്സും കമ്മ്യൂണിസ്റ്റും ഒന്നുമല്ല. അതൊക്കെ വ്യക്തിപരമായ കാര്യങ്ങളാണ്...’ എന്ന്. അങ്ങനെ ആദ്യമായിട്ട് ഞാൻ എന്റെ വീട്ടിലേക്ക് തിരിച്ചുപോകുന്നത് സുകുവേട്ടന്റെ കാറിലാണ്, .
ഞാൻ എപ്പോഴും അതുകൊണ്ടല്ലേ പറയുന്നത് എന്റെ മനസ്സിൽ ഇന്നും സുകുവേട്ടൻ അങ്ങ് പോയി എന്നൊന്നുമില്ല. ഇങ്ങനെയൊക്കെ പറയുമ്പോഴാണ് നമുക്ക് ആ ഒരു ഓർമ്മ വരുന്നത്. അല്ലാതെ എപ്പോഴും ഞങ്ങളുടെ കൂടെയുണ്ട്, എന്റെയും എന്റെ മക്കളുടെയും കൂടെയുണ്ട്. ബലപ്പെടുത്തേണ്ട സമയത്ത് ബലപ്പെടുത്തും, ‘മിണ്ടാതിരിക്കെടീ’ എന്ന് പറയേണ്ട സമയത്ത് മിണ്ടാതിരിപ്പിക്കും. അതൊക്കെ അദ്ദേഹം നോക്കിക്കൊള്ളും. അദ്ദേഹത്തെക്കുറിച്ചൊക്കെ ഈ ട്രോളന്മാർക്ക് എന്ത് കുന്തം അറിയാം ?...മല്ലിക എന്ന പേരിനൊപ്പം സുകുമാരന്‍ ചേര്‍ന്നതോടെ ജീവിതമേ മാറി. ജീവിതം വേറെ കല വേറെ എന്ന് മനസ്സിലാക്കിത്തന്നത് ആ വാലാണ്, സുകുമാരന്‍ എന്ന ആ വ്യക്തിയാണ്...’’ എന്നാണ് മല്ലിക പറയുന്നത്. സിനിമാ-രാഷ്ട്രീയ രംഗങ്ങളിലെ വിഷയങ്ങളില്‍ തന്റെ നിലപാട് ഉറക്കെ പറയാൻ മടിയിലാത്ത അഭിനേത്രി കൂടിയാണ് മല്ലിക സുകുമാരൻ. അതിന്റെ പേരില്‍ വലിയ സൈബർ ആക്രമണങ്ങള്‍ മല്ലിക സുകുകാരന് നേരിടേണ്ടി വന്നിട്ടുണ്ട്.
ജി. അരവിന്ദൻ സംവിധാനം ചെയ്ത ‘ഉത്തരായനം’ എന്ന ചിത്രത്തിലൂടെ അഭിനയരംഗത്തേക്ക് എത്തിയ താരമാണ് മല്ലിക, അരങ്ങേറ്റ വർഷം തന്നെ ‘സ്വപ്നാടനം’ എന്ന ചിത്രത്തിലെ പ്രകടനത്തിന് കേരള സംസ്ഥാന ചലച്ചിത്ര പുരസ്‌കാരവും സ്വന്തമാക്കി. പിന്നീട് ‘ചുവന്ന സന്ധ്യകൾ’, ‘ആലിംഗനം’, ‘അവളുടെ രാവുകൾ’ തുടങ്ങി നിരവധി ശ്രദ്ധേയ ചിത്രങ്ങളിലൂടെ മലയാള സിനിമയിൽ മല്ലിക തന്റേതായ ഇടം കണ്ടെത്തി. നടൻ സുകുമാരനുമായുള്ള വിവാഹശേഷം അഭിനയത്തിൽ നിന്ന് ഇടവേളയെടുത്തെങ്കിലും 2000 കളിൽ ശക്തമായ തിരിച്ചുവരവ് നടത്തിയ മല്ലിക സുകുമാരൻ, അമ്മ വേഷങ്ങളിലൂടെയും ഹാസ്യകഥാപാത്രങ്ങളിലൂടെയും മലയാള സിനിമയിലും ടെലിവിഷനിലും ഇന്നും സജീവ സാന്നിധ്യമാണ്.
Comments