തിരുവനന്തപുരം: കേന്ദ്ര ആഭ്യന്തരമന്ത്രി അമിത്ഷായെ കരിങ്കൊടി കാട്ടിയ സംഭവത്തില്‍ സുരക്ഷാ വീഴ്ചയില്ലെന്ന് പോലീസ്. ആഭ്യന്തരമന്ത്രി പ്രതിഷേധക്കാരെ കണ്ടിട്ടില്ലെന്നും വിവിഐപി എത്തുന്നതിന് മുമ്പ് തന്നെ പ്രതിഷേധക്കാരെ മാറ്റിയെന്നും പോലീസ് പറയുന്നു. ആഭ്യന്തരമന്ത്രിയുടെ കേരളാസന്ദര്‍ശനത്തില്‍ കരിങ്കൊടിയുമായി എത്തിയത് യൂത്ത് കോണ്‍ഗ്രസുകാര്‍ ആയിരുന്നു.
എന്നാല്‍ കേന്ദ്ര ആഭ്യന്തരമന്ത്രിയുടെ സഞ്ചാരത്തിനോ സുരക്ഷാക്രമീകരണങ്ങള്‍ക്കോ തടസ്സമുണ്ടായില്ല. വാഹനവ്യൂഹം ഒരു സെക്കന്റ് പോലും തടസ്സപ്പെടുന്ന സാഹചര്യം ഉണ്ടായില്ല. സുരക്ഷാവീഴ്ചയുണ്ടായി ഉന്നത സുരക്ഷാഉദ്യോഗസ്ഥര്‍ക്ക് സ്ഥലത്ത് എവിടെയെങ്കിലും ഇറങ്ങേണ്ട സ്ഥിതി ഉണ്ടായില്ല. പ്രതിഷേധക്കാരെ വിവിഐപി കാണാനുള്ള സാഹചര്യം പോലും ഉണ്ടായില്ലെന്നുമാണ് പോലീസിന്റെ വിലയിരുത്തല്‍.
കൊല്ലത്തുവെച്ചാണ് കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി കാണിച്ച സംഭവമുണ്ടായത്. ഇതിന് പിന്നാലെ അമിത് ഷായ്ക്ക് നേരെ ഉണ്ടായ കരിങ്കൊടി പ്രതിഷേധത്തില്‍ ഗുരുതര സുരക്ഷാ വീഴ്ചയെന്ന പരാതിയുമായി ബി ജെ പി രംഗത്തെത്തുകയും ഉന്നത പോലീസ് ഉദ്യോഗസ്ഥര്‍ക്ക് പരാതി നല്‍കുകയും ചെയ്തിരുന്നു. സുരക്ഷാ മാനദണ്ഡങ്ങള്‍ കാറ്റില്‍പ്പറത്തി, വി വി ഐ പി വാഹനം കടന്നുപോയ വഴിയില്‍ വെറും 50 മീറ്റര്‍ മാത്രം അകലേക്ക് പ്രതിഷേധക്കാര്‍ക്ക് എത്താന്‍ സാധിച്ചത് വലിയ സുരക്ഷാ വീഴ്ചയാണെന്നായിരുന്നു പരാതി.
ഇതില്‍ പ്രതിഷേധിച്ച് യുവമോര്‍ച്ച പ്രവര്‍ത്തകര്‍ കോണ്‍ഗ്രസിന്റെ കേന്ദ്ര സംസ്ഥാനനേതാക്കള്‍ ഉള്‍പ്പെടെയുള്ളവര്‍ക്കെതിരേ തിരിച്ചും കരിങ്കൊടി പ്രതിഷേധം നടത്തിയിരുന്നു. ആഭ്യന്തര മന്ത്രി രമേശ് ചെന്നിത്തല, പ്രിയങ്ക ഗാന്ധി എം പി, ടൂറിസം മന്ത്രി പി സി വിഷ്ണുനാഥ് എന്നിവര്‍ പങ്കെടുത്ത പരിപാടികള്‍ ലക്ഷ്യമിട്ട് പല സ്ഥലങ്ങളിലും കരിങ്കൊടി വീശി പ്രതിഷേധിച്ചു. രമേശ് ചെന്നിത്തലയ്ക്ക് നേരെ കോഴിക്കോട് നാലു തവണയാണ് കരിങ്കൊടി കാട്ടിയത്. തിരുവമ്പാടി തമ്പലമണ്ണയ്ക്ക് സമീപം വെച്ചായിരുന്നു പ്രിയങ്ക ഗാന്ധി എം പിക്ക് നേരെയുള്ള പ്രതിഷേധം.
Comments