ബെംഗളൂരുവിലെ ഗതാഗതക്കുരുക്ക് റോഡുകളിൽ നിന്ന് താമസസമുച്ചയങ്ങൾക്കുള്ളിലേക്കും എത്തിയെന്ന തരത്തിലുള്ള വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. വീട്ടിൽ നിന്ന് പുറത്തേക്ക് ഇറങ്ങാൻ പോലും വാഹനങ്ങളുടെ നീണ്ട നിര മറികടക്കേണ്ടിവരുന്ന കാഴ്ചയാണ് വീഡിയോയിൽ കാണുന്നത്. ശനിയാഴ്ച ഉച്ചയ്ക്ക് രണ്ടുമണിയോടെ പകർത്തിയ ദൃശ്യങ്ങളാണ് യുവതി സോഷ്യൽ മീഡിയയിൽ പങ്കുവച്ചത്.
ആദ്യം വീടിന് പുറത്തുള്ള റോഡിലെ ഗതാഗതക്കുരുക്കാണ് യുവതി വീഡിയോയിൽ കാണിക്കുന്നത്. തുടർന്ന് സമീപത്തെ വലിയ താമസസമുച്ചയത്തിനുള്ളിലേക്ക് ക്യാമറ തിരിക്കുമ്പോൾ അവിടെയും വാഹനങ്ങളുടെ നീണ്ട നിര കാണാം. പ്രധാന റോഡിലെത്തുന്നതിന് മുമ്പുതന്നെ താമസക്കാർക്ക് ഗതാഗതക്കുരുക്കിൽപ്പെടേണ്ടി വരുന്ന അവസ്ഥയാണെന്ന് യുവതി പറയുന്നു.
താമസസമുച്ചയത്തിന്റെ പുറത്തേക്കുള്ള ഗേറ്റിന് സമീപം വാഹനങ്ങൾ നിരനിരയായി കിടക്കുന്നതും വാഹനങ്ങൾ വളരെ പതുക്കെ നീങ്ങുന്നതുമാണ് ദൃശ്യങ്ങളിൽ. ചില താമസക്കാർക്ക് സമുച്ചയത്തിൽ നിന്ന് പുറത്തുകടക്കാൻ മാത്രം 30 മിനിറ്റോളം കാത്തിരിക്കേണ്ടിവരുന്നുണ്ടെന്നും യുവതി പറയുന്നു. ബെംഗളൂരുവിലെ പതിവ് ഗതാഗതക്കുരുക്കിന് പുറമെ താമസസ്ഥലത്തിനുള്ളിലും ഇതേ അവസ്ഥയാണെന്നത് വീഡിയോയെ ശ്രദ്ധേയമാക്കി.
വീഡിയോ പുറത്തുവന്നതിന് പിന്നാലെ നിരവധി പേരാണ് സോഷ്യൽ മീഡിയയിൽ പ്രതികരണവുമായി എത്തിയത്. ബെംഗളൂരുവിലെ ഗതാഗതക്കുരുക്ക് ഇനി താമസസമുച്ചയത്തിനുള്ളിൽ പോലും ഒഴിവാക്കാനാകാത്ത അവസ്ഥയാണെന്നായിരുന്നു പലരുടെയും പരിഹാസം. വൈറ്റ്‌ഫീൽഡിന് സമീപമുള്ള വർത്തൂരിലെ ബ്രിഗേഡ് ഉട്ടോപ്യയിലാണ് ദൃശ്യങ്ങൾ പകർത്തിയതെന്നും ചിലർ കമന്റുകളിൽ ചൂണ്ടിക്കാട്ടി. താമസസമുച്ചയത്തിനുള്ളിലെ ട്രാഫിക് ജാമിന്റെ ദൃശ്യങ്ങൾ ഇപ്പോൾ വലിയ വാര്‍ത്തയ്ക്കാണ് വഴിവച്ചിരിക്കുന്നത്.
Comments