തിരുവനന്തപുരം: ആഭ്യന്തരമന്ത്രി അമിത്ഷായ്ക്ക് എതിരായ യൂത്ത് കോണ്‍ഗ്രസിന്റെ കരിങ്കൊടി പ്രതിഷേധത്തില്‍ നടപടി വേണമെന്ന ആവശ്യം ശക്തമാക്കി ബിജെപി. നടപടിയില്ലെങ്കില്‍ സമരം പാര്‍ട്ടിയേറ്റെടുക്കാനും മുഖ്യമന്ത്രിക്കും മന്ത്രിമാര്‍ക്കും എതിരായ യുവമോര്‍ച്ചയുടെ കരിങ്കൊടി പ്രതിഷേധം തുടരാനും തീരുമാനമുണ്ട്. സംഭവത്തില്‍ സുരക്ഷാ വീഴ്ച ഉണ്ടായിട്ടില്ലെന്നാണ് പോലീസ് ഇന്ന് വ്യക്തമാക്കിയിരിക്കുന്നത്.
അതേസമയം സംഭവത്തെ ഗൗരവമായി എടുക്കാനാണ് ബിജെപി ആലോചന. പോലീസ് രാഷ്ട്രീയ യജമാനന്മാര്‍ പറയുന്നത് കേട്ട് പ്രതികരിക്കുകയാണ് എന്നായിരുന്നു ബിജെപി ദേശീയ സെക്രട്ടറി കെ. സുരേന്ദ്രന്‍ ഇന്ന് നടത്തിയ പ്രതികരണം. നേരത്തേ അമിത്ഷായ്ക്ക് എതിരേയുള്ള യൂത്ത് കോണ്‍ഗ്രസിന്റെ പ്രതിഷേധത്തിന് മറുപടിയായി പ്രിയങ്കാഗാന്ധി, രമേശ് ചെന്നിത്തല എന്നിവര്‍ പങ്കെടുത്ത പരിപാടിയില്‍ യുവമോര്‍ച്ചക്കാരും കരിങ്കൊടിയുമായി എത്തിയിരുന്നു. മുഖ്യമന്ത്രിക്ക് എതിരേയും പ്രതിഷേധവുമായി യുവമോര്‍ച്ചാ പ്രവര്‍ത്തകര്‍ എത്തിയിരുന്നു.
അതേസമയം ഈ വിഷയത്തില്‍ കോണ്‍ഗ്രസ്സില്‍ ഭിന്നത രൂക്ഷമായിരിക്കുകയാണ്. ശക്തമായ എതിര്‍പ്പാണ് മുഖ്യമന്ത്രി വിഡി സതീശന്‍ ഉള്‍പ്പെടെയുള്ളവര്‍ രേഖപ്പെടുത്തിയത്. എന്നാല്‍ പ്രതിഷേധത്തെ പരസ്യമായി പിന്തുണച്ച് കെസി വേണുഗോപാല്‍ രംഗത്തെത്തിയിരുന്നു. അമിത്ഷാ ദൈവമല്ലല്ലോ പ്രതിഷേധത്തിനതീതനല്ലല്ലോ എന്നായിരുന്നു കഴിഞ്ഞ ദിവസം വേണുഗോപാല്‍ നടത്തിയ പ്രതികരണം. കരിങ്കൊടി കാണിക്കുന്ന ദൃശ്യങ്ങള്‍ മന്ത്രി ഒ ജെ ജനീഷ് സമൂഹമാധ്യമത്തില്‍ നിന്ന് നീക്കം ചെയ്തതിനെ ചൊല്ലിയും വിവാദമുണ്ട്. കോൺഗ്രസ് നടത്തിയ പ്രതിഷേധത്തില്‍ തെറ്റില്ലെന്നായിരുന്നു ഒ ജെ ജനീഷ് ആദ്യം പ്രതികരിച്ചിരുന്നത്. മുഖ്യമന്ത്രിയുടെ നിര്‍ദേശപ്രകാരമാണോ എന്നാണ് സംശയം.
Comments