തിരുവനന്തപുരം: കേന്ദ്ര ആഭ്യന്തരമന്ത്രി അമിത് ഷായ്ക്കെതിരെ കരിങ്കൊടി കാട്ടിയ സംഭവത്തിൽ മുഖ്യമന്ത്രി വി ഡി സതീശനും സംസ്ഥാന ആഭ്യന്ത്രമന്ത്രി രമേശ് ചെന്നിത്തലയ്ക്കും അതൃപ്തിയുണ്ടെന്ന റിപ്പോർട്ടുകളെ തള്ളി യൂത്ത് കോൺഗ്രസ് നേതാവ് ബിനു ചുള്ളിയിൽ. അതേസമയം, വേണ്ടി വന്നാൽ പ്രധാനമന്ത്രി നരേന്ദ്ര മോദിയെയും കരിങ്കൊടി കാണിക്കുമെന്ന് യൂത്ത് കോൺഗ്രസ് വർക്കിംഗ് പ്രസിഡന്‍റ് പറഞ്ഞു.
അമിത് ഷായെ കരിങ്കൊടി കാണിച്ചതിനു പിന്നാലെ സംസ്ഥാനമൊട്ടാകെ യുവമോർച്ച പ്രക്ഷോഭം ശക്തമാകുന്ന സാഹചര്യത്തിലാണ് വേണമെങ്കിൽ പ്രധാനമന്ത്രി നരേന്ദ്ര മോദിയെയും കരിങ്കൊടി കാണിക്കുമെന്ന് യൂത്ത് കോൺഗ്രസ് നേതാവ് പറഞ്ഞത്. മുഖ്യമന്ത്രിക്കും ആഭ്യന്തര മന്ത്രിക്കും അഭിപ്രായവ്യത്യാസമുണ്ടെന്ന പ്രചാരണം മാധ്യമ സൃഷ്‌ടിയാണ്. മുഖ്യമന്ത്രിയോ ആഭ്യന്തര മന്ത്രിയോ അങ്ങനെ ഒരു അതൃപ്തി നിങ്ങളോട് പറഞ്ഞോ, ഫെയ്സ്ബുക്കിൽ അങ്ങിനെ കുറിപ്പിട്ടോ എന്നും ബിനു ചുള്ളിയിൽ ചോദിച്ചു. പാർട്ടിയുടെ ദേശവ്യാപക പ്രക്ഷോഭത്തിന്റെ ഭാഗമയാണ് കരിങ്കൊടി കാണിച്ചത്. എന്നാൽ, യുവമോർച്ച നടത്തുന്ന പ്രതിഷേധം എന്തിനാണെന്ന് അവർക്കുപോലുമറിയില്ല എന്നും ബിനു ചുള്ളിയിൽ പരിഹസിച്ചു.
കൊല്ലത്ത് കേന്ദ്ര ആഭ്യന്തരമന്ത്രി അമിത് ഷായ്ക്കെതിരെ യൂത്ത് കോൺഗ്രസ് നടത്തിയ പ്രതിഷേധത്തിൽ മുഖ്യമന്ത്രിക്കും സംസ്ഥാന ആഭ്യന്തരമന്ത്രിക്കും കടുത്ത അതൃപ്തിയുണ്ടെന്നായിരുന്നു റിപ്പോർട്ടുകൾ. യാതൊരുവിധ മുന്നൊരുക്കങ്ങളുമില്ലാതെ നടത്തിയ ഈ സമരം സംസ്ഥാനത്ത് അനാവശ്യമായ ക്രമസമാധാന പ്രശ്നങ്ങൾക്കും പ്രതിഷേധങ്ങൾക്കും വഴിവെച്ചെന്നാണ് വിലയിരുത്തൽ. ഇതിനിടെ കരിങ്കൊടി കാണിക്കുന്ന വീഡിയോ മന്ത്രി ഒ ജെ ജനീഷ് പിൻവലിച്ചതും ഈ അതൃപ്തി പ്രകടമായതിനാലാണെന്ന് റിപ്പോർട്ടുകളുണ്ടായിരുന്നു. എന്നാൽ, തന്റെ ഓഫീസ് നൽകിയ ഉപദേശത്തിന്റെ അടിസ്ഥാനത്തിലാണ് വീഡിയോ പിൻവലിച്ചതെന്ന് മന്ത്രി പിന്നീട് വ്യക്തമാക്കിയിരുന്നു.
അമിത് ഷായ്ക്കെതിരെ കേരളത്തിൽ നടന്ന കരിങ്കൊടി പ്രതിഷേധത്തിന് പകരമായാണ് മന്ത്രിമാരെ ലക്ഷ്യമിട്ട് ബി ജെ പി - യുവമോർച്ച സംഘം സംസ്ഥാന വ്യാപകമായി കരിങ്കൊടി പ്രതിഷേധം നടത്തുന്നതിനെയാണ് ബിനു ചുള്ളിയിൽ പരിഹസിച്ചത്.
Comments