അമൃതയുടെ തിളങ്ങുന്ന കണ്ണുകളും റെട്രോ ഹെയർ ഫ്ലിപ്പും റീക്രിയേറ്റ് ചെയ്ത് സാറ അലി ഖാന്‍; അമ്മയുടെ തനിപ്പകര്‍പ്പാണ് താനെന്ന് വീണ്ടും തെളിയിച്ച് താരപുത്രി

പട്ടൗഡി കുടുംബത്തിലെ കൊച്ചുമകളും സെയ്ഫ് അലി ഖാന്റെയും അമൃത സിംഗിന്റെയും മകളുമായ സാറ അലി ഖാന്‍, അച്ഛന്റെയും അമ്മയുടെയും മുത്തശ്ശിയുടെ പാത പിന്തുടര്‍ന്നാണ് സിനിമയിലെത്തിയത്. കേദാര്‍നാഥ് എന്ന സിനിമയിലൂടെയാണ് സാറ വെള്ളിത്തിരയില്‍ അരങ്ങേറ്റം കുറിച്ചത്. പിന്നീടിങ്ങോട്ട് ഒരുപാട് മികച്ച സിനിമകളിലൂടെ താരം തന്റെ അഭിനയമികവ് തെളിയിച്ചിരുന്നു.

ഒരു കാലത്ത് ഹിന്ദി സിനിമയില്‍ നായികയായും വില്ലന്‍ വേഷങ്ങളിലുമടക്കം തിളങ്ങി നിന്നിരുന്ന അഭിനേത്രിയാണ് സാറയുടെ അമ്മ അമൃത സിംഗ്. വിവാഹശേഷം അഭിനയത്തിൽ നിന്ന് പിന്മാറിയ അമൃത, 13 വർഷത്തെ ദാമ്പത്യത്തിന് ശേഷം 2004-ൽ സെയ്ഫുമായി വേർപിരിഞ്ഞു. അതിനു ശേഷം സിനിമയിലും സീരിയലിലുമടക്കം അമൃത മികച്ച വേഷങ്ങള്‍ ചെയ്തിട്ടുണ്ട്.

ഇപ്പോഴിതാ തന്റെ അമ്മ അമൃത സിങ്ങിന്റെ തനിപ്പകർപ്പാണെന്ന് വീണ്ടും തെളിയിക്കുകയാണ് സാറ അലി ഖാൻ. റെട്രോ ഹെയർ ഫ്ലിപ്പിലുള്ള തന്റെയും അമ്മയുടെയും ചിത്രങ്ങളാണ് സാറ പങ്കിട്ടിരിക്കുന്നത്.

‘‘എപ്പോഴും അമ്മയിൽ നിന്ന് പ്രചോദനം ഉൾക്കൊള്ളുന്നു ...തിളങ്ങുന്ന കണ്ണുകളും റെട്രോ ഹെയർ ഫ്ലിപ്പും...അമ്മയുടെ സൗന്ദര്യത്തിന്റെ ഒരു ശതമാനം എങ്കിലും എനിക്കുണ്ടെങ്കിൽ ഞാൻ സംതൃപ്തയും എന്നെന്നും നന്ദിയുള്ളവളുമായിരിക്കും...’’ എന്നാണ് സാറ അലി ഖാന്‍ കുറിച്ചിരിക്കുന്നത്. ആരാധകരും മാധ്യമങ്ങളും പലപ്പോഴും സാറയെ ചെറുപ്പകാലത്തെ അമൃത സിങ്ങിന്റെ ‘കാർബൺ കോപ്പി’ എന്നു വിളിക്കാറുണ്ട്. അതു വീണ്ടും തെളിയിക്കുകയാണ് സാറ.