വലിയ ഹൈപ്പോടെ പ്രേക്ഷകര്‍ കാത്തിരുന്നെങ്കിലും തിയേറ്ററില്‍ അട്ടര്‍ ഫ്ലോപ്പായി പോയ ചിത്രങ്ങളിലൊന്നാണ് 2018 റിലീസ് ചെയ്ത മോഹന്‍ലാല്‍ നായകനായി ശ്രീകുമാര്‍ മേനോന്‍ സംവിധാനം ചെയ്ത ‘ഒടിയന്‍’. വടക്കൻ കേരളത്തിലെ മാന്ത്രിക രൂപമാറ്റക്കാരനായ ഒടിയന്റെ കഥ പറഞ്ഞ ചിത്രം പാലക്കാടൻ ഗ്രാമങ്ങൾക്ക് മാത്രം സുപരിചിതമായ മിത്തിനെ തിരശ്ശീലയിലേക്ക് എത്തിക്കാനുള്ള ശ്രമമായിരുന്നു. പ്രീ റിലീസ് ഇവന്റുകളിലൂടെയും പ്രൊമോഷന്‍ അഭിമുഖങ്ങളിലൂടെയും വലിയ ഹൈപ്പ് കിട്ടിയ ചിത്രം പക്ഷേ ബിഗ്സ്ക്രീനില്‍ അമ്പേ പരാജയമായിരുന്നു.
കേരളക്കരയാകെ ഇളക്കിമറിച്ച ഹൈപ്പും, തൊട്ടുപിന്നാലെ വന്ന പരാജയവും, ശേഷമെത്തിയ ചൂടേറിയ ചർച്ചകളും മാത്രമല്ല ഒടിയനെ വ്യത്യസ്തനാക്കിയത്, അതിലെ മോഹൻലാലിന്റെ ക്ലീൻ ഷേവ് ലുക്ക് കൂടിയാണ്. മീശ പിരിച്ച്‌ മുണ്ടു മടക്കി മാസ്സായി ലാലേട്ടനെ കണ്ടുശീലിച്ച പ്രേക്ഷകർ ശരിക്കും ഈ രൂപമാറ്റം കണ്ട് ഞെട്ടുകയും, തങ്ങളുടെ ഇഷ്ടക്കേട് പ്രകടമാക്കുകയും ചെയ്തിരുന്നു.
എന്നാല്‍ ഇപ്പോഴിതാ സിനിമയിലെ കഥാപാത്രത്തെ എഐ സാങ്കേതികവിദ്യ ഉപയോഗിച്ച് പുനഃസൃഷ്ടിച്ച വിഡിയോ സോഷ്യൽ മീഡിയയിൽ വൈറലായി മാറുകയാണ്. തിയേറ്ററുകളില്‍ കണ്ട ഒടിയൻ മാണിക്യനു പകരം കൂടുതൽ റിയലിസ്റ്റിക് രീതിയിലാണ് ഒടിയനെ വീഡിയോയില്‍ അവതരിപ്പിച്ചിരിക്കുന്നത്. കഥാപാത്രത്തിന്റെ രൂപവും വിഎഫ്എക്സ് ദൃശ്യങ്ങളുമാണ് വിഡിയോയുടെ പ്രധാന ആകർഷണം. പഴയ സിനിമകളിലെ മോഹൻലാലിന്റെ മാനറിസങ്ങളെ അനുസ്മരിപ്പിക്കുന്ന വിധത്തിലാണ് വീഡിയോയിലെ പല ഫ്രെയിമുകളും ആവിഷ്കരിച്ചിരിക്കുന്നത്. ഏതായാലും ലാലേട്ടന്റെ ഈ ലുക്ക് ഏറ്റെടുക്കുകയാണ് ആരാധകര്‍. തങ്ങള്‍ പ്രതീക്ഷിച്ചിരുന്ന ലുക്കാണ് ഇതെന്നാണ് പലരും കമന്റുകളില്‍ കുറിക്കുന്നത്. ‘ഒടിയൻ’ സിനിമയിലെ യഥാർഥ ദൃശ്യങ്ങളേക്കാൾ മികച്ചതാണ് ഇതെന്ന തരത്തിലാണ് കമന്റുകള്‍.
‘ഇതല്ലേ നമ്മളാഗ്രഹിച്ച ഒടിയൻ’, ഇങ്ങനെ വല്ലോം ആയിരുന്നെങ്കില്‍, തിയേറ്റർ നിന്ന് കത്തിയേനെ, ഒടിയൻ മണിക്കന്റെ പൊട്ടന്‍ഷ്യല്‍ തിരിച്ചറിയാത്ത ഒരു ഡയറക്ടര്‍ എടുത്ത് കുളമാക്കിയ മൂവി ഇപ്പോള്‍ അതിന്റെ കൂടുതല്‍ ഭംഗിയോടെ...’ എന്നതടക്കമാണ് കമന്റുകള്‍. ‘ആരോണ്‍കൃഷ്. എഐ’ എന്ന ഇന്‍സ്റ്റഗ്രാം അക്കൗണ്ടിലൂടെയാണ് വീഡിയോ പ്രത്യക്ഷപ്പെട്ടിരിക്കുന്നത്. മലൈക്കോട്ടൈ വാലിബന്‍’, ‘സ്ട്രേ‍ഞ്ചര്‍ തിങ്ക്സ്’, ‘മായാവി’ തുടങ്ങിയ എഐ വിഡിയോകളും ഈ അക്കൗണ്ടിലൂടെ സോഷ്യല്‍ മീഡിയ കീഴടക്കിയിട്ടുണ്ട്.
പരസ്യ സംവിധായകനായിരുന്ന ശ്രീകുമാര്‍ മേനോന്‍ ആദ്യമായി സംവിധാനം ചെയ്ത ചിത്രമായിരുന്നു ഒടിയന്‍. പാലക്കാടൻ പശ്ചാത്തലത്തില്‍ ഒടിവിദ്യ വശമുള്ള മാണിക്യന്റെ കഥപറഞ്ഞ ചിത്രം നിർമിച്ചത് ആശിർവാദ് സിനിമാസിന്റെ ബാനറില്‍ ആന്റണി പെരുമ്പാവൂർ ആയിരുന്നു. സിനിമയ്ക്ക് വേണ്ടി മോഹൻലാല്‍ ശരീരഭാരം കുറച്ച്‌ കൂടുതല്‍ ചെറുപ്പമായി മാറിയതടക്കം ഒടിയനുമായി ബന്ധപ്പെട്ടു വന്ന എല്ലാ അപ്ഡേറ്റുകളും പ്രേക്ഷകര്‍ അന്ന് ആഘോഷമാക്കി. അതിനാല്‍ ഒടിയനായി മോഹൻലാല്‍ ബിഗ്സ്ക്രീനിലെത്തുന്നത് കാണാന്‍ വലിയ ആകാംക്ഷയോടെയാണ് പ്രേക്ഷകര്‍ കാത്തിരുന്നത്. പക്ഷേ എല്ലാ പ്രതീക്ഷകളും കാറ്റില്‍ പറത്തി വലിയ തോതില്‍ വിമര്‍ശനങ്ങളും പരാജയങ്ങളും സിനിമ ഏറ്റുവാങ്ങി.
Comments