മോഡലിംഗ് രംഗത്ത് നിന്ന് മിസ് ഇന്ത്യ ഏഷ്യ പസഫിക് പട്ടം നേടിയ ശേഷം സിനിമാലോകത്തേക്കെത്തിയ താരമാണ് ശ്വേത മേനോൻ. അനശ്വരം എന്ന സിനിമയിലൂടെ ബിഗ്സ്ക്രീനിലെത്തിയ താരം പിന്നീട് തിളങ്ങിയത് ബോളിവുഡിലാണ്. വലിയ ഇടവേളയ്ക്ക് ശേഷം മലയാളത്തിലേക്ക് തിരിച്ചെത്തിയപ്പോഴും ശ്വേതയെ മലയാളസിനിമാപ്രേക്ഷകര്‍ ഇരുകൈയും നീട്ടി സ്വീകരിച്ചു. ബോളിവുഡിലും തമിഴിലും തെലുങ്കിലും കന്നഡയിലും മലയാളത്തിലുമടക്കം കരുത്തുറ്റ കഥാപാത്രങ്ങളിലൂടെ താരം നൂറിലേറെ സിനിമകളുടെ ഭാഗമായിട്ടുണ്ട്. മിനി സ്ക്രീനിലും അവതാരകയായും മറ്റും സജീവമായ താരം മലയാള താരസംഘടനയായ അമ്മയുടെ ആദ്യ വനിതാ പ്രസിഡന്റായി ശ്വേതാ മേനോന്‍ ഈ വര്‍ഷം സ്ഥാനമേറ്റിരുന്നു.
ഇപ്പോഴിതാ മകള്‍ സബൈനയുടെ 14-ാം പിറന്നാള്‍ ആഘോഷിക്കുകയാണ് ശ്വേത മേനോന്‍. കുഞ്ഞായിരിക്കുമ്പോഴുള്ള ചിത്രങ്ങളല്ലാതെ ഇതുവരെ മകളുടെ ചിത്രങ്ങളോ വിഡിയോകളോ സോഷ്യൽ മീഡിയയിൽ ശ്വേത പങ്കുവെച്ചിരുന്നില്ല. ഇതാദ്യമായാണ് മകളുടെ ദൃശ്യങ്ങൾ ഉൾപ്പെടുന്ന ഒരു വിഡിയോ താരം ആരാധകർക്കായി പങ്കുവെക്കുന്നത്. എന്നാല്‍ വീഡിയോയിലെ ഏറ്റവും വലിയ കൗതുകം ഇതിലും സബൈനയുടെ മുഖം ശ്വേത പുറത്തുകാണിച്ചിട്ടില്ല എന്നതാണ്.
‘‘എന്റെ കുഞ്ചിക്കും കണ്ണന്റെ പുച്ചുവിനും 14-ാം പിറന്നാൾ ആശംസകൾ...ഹാപ്പി ബർത്ത്ഡേ സബൈന...’’ എന്ന ക്യാപ്ഷന്‍ നല്‍കിയാണ് ശ്വേത വീഡിയോ പങ്കിട്ടിരിക്കുന്നത്. വിഡിയോയില്‍ ശ്വേത സബൈനയെ മുത്തംവയ്ക്കുന്നതും എല്ലാവരും ചുറ്റു കൂടി കേക്ക് മുറിക്കുന്നതും കൈ കൊട്ടുന്നതുമൊക്കെ കാണാം. എല്ലാവരുമായി കേക്ക് പങ്കുവയ്ക്കുമ്പോഴും സബൈനയുടെ മുഖം കാണിച്ചിട്ടില്ല. മകളുടെ സ്വകാര്യത മാനിച്ചാണ് താരം മകളുടെ ചിത്രങ്ങള്‍ പങ്കുവയ്ക്കാത്തത്. അടുത്ത ബന്ധുക്കളും സുഹൃത്തുക്കളുമടങ്ങിയ ചെറിയ പിറന്നാളാഘോഷമായിരുന്നു സബൈനയുടേത്. ശ്വേത മേനോനും ഭർത്താവ് ശ്രീവത്സൻ മേനോനും മകളെ സ്നേഹത്തോടെ ‘കുഞ്ചി’, ‘പുച്ചു’ എന്നാണ് വിളിക്കുന്നത്. താരത്തിന്റെ പോസ്റ്റിന് താഴെ നിരവധി ആരാധകരും ചലച്ചിത്ര രംഗത്തെ സുഹൃത്തുക്കളുമാണ് സബൈനയ്ക്ക് പിറന്നാൾ ആശംസകള്‍ കുറിച്ചിരിക്കുന്നത്.
ജനിക്കും മുമ്പു തന്നെ വാര്‍ത്തകളില്‍ ഇടം പിടിച്ച താരപുത്രിയാണ് സബൈന. 2012 സെപ്റ്റംബർ 27-നാണ് സബൈന ജനിച്ചത്. ബ്ലെസ്സി സംവിധാനം ചെയ്ത ‘കളിമണ്ണ്’ എന്ന ചിത്രത്തിന് വേണ്ടി സബൈനയുടെ ജനനം തത്സമയം ക്യാമറയിൽ പകർത്തിയത് ഇന്ത്യൻ സിനിമാചരിത്രത്തിൽ വലിയ രീതിയിൽ ശ്രദ്ധിക്കപ്പെട്ടിരുന്നു. എന്നാല്‍ മലയാള സിനിമയിൽ വലിയ ചരിത്രവും വിവാദങ്ങളും സൃഷ്ടിച്ചതായിരുന്നു ഇതിന്റെ ചിത്രീകരണം.
ശ്വേതയുടെ ഭർത്താവ് ശ്രീവത്സൻ മേനോന്റെയും ഡോക്ടർമാരുടെയും പൂർണ്ണ സമ്മതത്തോടെയും സാന്നിധ്യത്തിലുമായിരുന്നു മുംബൈയിലെ നാനാവതി ആശുപത്രിയിൽ വെച്ച് ഈ രംഗങ്ങൾ ചിത്രീകരിച്ചത്. മൂന്ന് ക്യാമറകൾ ഉപയോഗിച്ചായിരുന്നു പ്രസവ മുറിയിലെ അപൂർവ്വ നിമിഷങ്ങൾ ബ്ലെസ്സി ദൃശ്യവൽക്കരിച്ചത്. ഒരു അമ്മയുടെയും കുഞ്ഞിന്റെയും ഏറ്റവും വിശുദ്ധമായ ബന്ധത്തെ ആവിഷ്കരിക്കാനാണ് ഈ രംഗം ഉൾപ്പെടുത്തിയതെന്ന് ബ്ലെസിയും കളിമണ്ണിന്റെ അണിയറപ്രവര്‍ത്തകരും അന്ന് വ്യക്തമാക്കിയിരുന്നു.
Comments