സിംഗപ്പൂരിലെ പാണ്ടൻ റിസർവോയറിൽ മുതലയെ കണ്ടെന്ന തരത്തിൽ എഐ ഉപയോഗിച്ച് വ്യാജ ചിത്രം പ്രചരിപ്പിച്ച സംഭവത്തിൽ യുവാവിനെതിരെ കേസ്. മുതലയെ കണ്ടെന്ന വിവരം ലഭിച്ചതിനെ തുടർന്ന് അധികൃതർ റിസർവോയറിൽ തിരച്ചിൽ നടത്തിയെങ്കിലും പിന്നീട് പ്രചരിച്ച ചിത്രം എഐ ഉപയോഗിച്ച് നിർമിച്ചതാണെന്ന് കണ്ടെത്തുകയായിരുന്നു.
മ്യാൻമർ സ്വദേശിയായ 30-കാരൻ യെ ലിൻ ആണ് കേസിൽ പ്രതി. ഓഗസ്റ്റ് 20-ന് പാണ്ടൻ റിസർവോയറിൽ മുതലയെ കണ്ടെന്ന തരത്തിലുള്ള ചിത്രം ഇയാൾ മറ്റൊരാൾക്ക് അയച്ചതായാണ് റിപ്പോർട്ട്. ചിത്രം യഥാർഥമാണെന്ന് കരുതി സിംഗപ്പൂരിലെ ദേശീയ ജല ഏജൻസിയും ദേശീയ പാർക്ക് അധികൃതരും പരിശോധനയും തിരച്ചിലും നടത്തി.
തിരച്ചിലിനിടെ മുതലയുടെ സാന്നിധ്യത്തിന് തെളിവുകളൊന്നും കണ്ടെത്താനായില്ല. ഇതോടെ ചിത്രത്തിന്റെ യാഥാർഥ്യം പരിശോധിച്ചപ്പോഴാണ് എഐ ഉപയോഗിച്ച് നിർമിച്ചതാണെന്ന് വ്യക്തമായത്. സംഭവത്തെ തുടർന്ന് റിസർവോയറിലെ ജലകായിക പ്രവർത്തനങ്ങൾ രണ്ട് ദിവസത്തേക്ക് നിർത്തിവെക്കുകയും ചെയ്തിരുന്നു.
വ്യാജ ചിത്രം പ്രചരിപ്പിച്ചതിനും നീതിനടപടി തടസ്സപ്പെടുത്തിയതിനുമാണ് യെ ലിന്നെതിരെ രണ്ട് കുറ്റങ്ങൾ ചുമത്തിയത്. വ്യാജ വിവരം കൈമാറിയ കുറ്റത്തിന് മൂന്ന് വർഷം വരെ തടവും പിഴയും ലഭിക്കാം. നീതിനടപടി തടസ്സപ്പെടുത്തിയെന്ന കുറ്റത്തിന് ഏഴ് വർഷം വരെ തടവ് ലഭിക്കാവുന്നതാണ്. കേസ് നവംബറിൽ വീണ്ടും പരിഗണിക്കും.
Comments