കൊൽക്കത്തയിലെ മെഡിക്കൽ ഇന്റേണിനെതിരെ സമൂഹമാധ്യമങ്ങളിൽ രൂക്ഷ വിമർശനം. പ്രസവശേഷം നടത്തിയ ശസ്ത്രക്രിയയുടെ ചിത്രം രോഗിയുടെ സ്വകാര്യത ലംഘിക്കുന്ന തരത്തിൽ ഇൻസ്റ്റഗ്രാം സ്റ്റോറിയായി പങ്കുവെച്ചെന്നാണ് ആരോപണം. ചിത്രത്തിൽ രോഗിയുടെ സ്വകാര്യഭാഗം മറച്ചിരുന്നെങ്കിലും ചികിത്സാ നടപടിയും ശസ്ത്രക്രിയാ ഉപകരണങ്ങളും കാണാമായിരുന്നുവെന്നാണ് റിപ്പോർട്ട്. സംഭവത്തിൽ രോഗിയുടെ സമ്മതം വാങ്ങിയിരുന്നോ എന്ന ചോദ്യവും ഉയർന്നിട്ടുണ്ട്.
എക്സിൽ ഒരാൾ പങ്കുവെച്ച സ്ക്രീൻഷോട്ടിലൂടെയാണ് സംഭവം പുറത്തുവന്നത്. പ്രസവസമയത്ത് ചില സാഹചര്യങ്ങളിൽ നടത്താറുള്ള എപ്പിസിയോട്ടമി എന്ന ശസ്ത്രക്രിയാ നടപടിയാണ് ചിത്രത്തിലുള്ളതെന്നാണ് ആരോപണം. ചിത്രത്തിനൊപ്പം ‘സിലൈ ബുനൈ ആത്താ ഹേ?’ എന്ന കുറിപ്പും ഉണ്ടായിരുന്നതായി റിപ്പോർട്ടുണ്ട്. രോഗിയുടെ സ്വകാര്യതയും ചികിത്സാ രംഗത്തെ പ്രൊഫഷണൽ മര്യാദകളും സംബന്ധിച്ചാണ് ഇതോടെ സമൂഹമാധ്യമങ്ങളിൽ ചർച്ച ശക്തമായത്.
ചിത്രത്തിൽ രോഗിയുടെ മുഖമോ വ്യക്തിഗത വിവരങ്ങളോ കാണുന്നില്ലെന്നും അതിനാൽ സ്വകാര്യതാ ലംഘനമല്ലെന്നും ചിലർ വാദിച്ചു. എന്നാൽ ചിത്രം പകർത്തുന്നതിനും സമൂഹമാധ്യമത്തിൽ പങ്കുവെക്കുന്നതിനും മുമ്പ് രോഗിയുടെ വ്യക്തമായ സമ്മതം വാങ്ങിയിരുന്നോ എന്നതാണ് പ്രധാന ചോദ്യമെന്ന് മറ്റുള്ളവർ ചൂണ്ടിക്കാട്ടി. ചിത്രത്തിലെ സ്വകാര്യഭാഗം മറച്ചതുകൊണ്ട് മാത്രം രോഗിയുടെ അനുമതിയില്ലാതെ ചിത്രം പങ്കുവെക്കുന്നത് ന്യായീകരിക്കാനാകുമോ എന്ന ചർച്ചയും ഉയർന്നു.
ചികിത്സയ്ക്കായി ആശുപത്രിയിലെത്തുന്ന രോഗികളുടെ ചിത്രങ്ങൾ സമൂഹമാധ്യമങ്ങളിൽ പങ്കുവെക്കുന്നതുമായി ബന്ധപ്പെട്ട മെഡിക്കൽ നൈതികതയും ഇതോടെ വീണ്ടും ചർച്ചയാകുകയാണ്. സംഭവത്തിൽ നടപടി ആവശ്യപ്പെട്ട് നിരവധി പേർ ദേശീയ മെഡിക്കൽ കമ്മിഷനെ സമൂഹമാധ്യമങ്ങളിൽ ടാഗ് ചെയ്തിട്ടുണ്ട്. അതേസമയം, ഇന്റേണിന്റെ ഉദ്ദേശ്യങ്ങളെക്കുറിച്ച് സമൂഹമാധ്യമ ഉപയോക്താക്കൾ ഉന്നയിച്ച ആരോപണങ്ങൾ ഇതുവരെ സ്വതന്ത്രമായി സ്ഥിരീകരിച്ചിട്ടില്ല.
Comments