കേരള സംഗീത നാടക അക്കാദമി ചെയർമാനായി നിയമിതനായ ശേഷം തന്റെ സന്തോഷവും വരാനിരിക്കുന്ന പ്രവർത്തനങ്ങളെക്കുറിച്ചുള്ള കാഴ്ചപ്പാടുകളും പങ്കുവെച്ച് ഗായകൻ ജി. വേണുഗോപാൽ. പദവി പ്രഖ്യാപിച്ചതിന് പിന്നാലെ ആശംസകളുടെ പ്രവാഹമായിരുന്നെന്നും സര്‍ക്കാര്‍ ഏൽപ്പിച്ച ഈ ഭാരിച്ച ഉത്തരവാദിത്വത്തിൽ നിറഞ്ഞ സന്തോഷമുണ്ടെന്നും അദ്ദേഹം വ്യക്തമാക്കി.
മുഖ്യമന്ത്രി വി.ഡി സതീശന്‍, സാംസ്‌കാരിക വകുപ്പ് മന്ത്രി പി സി വിഷ്ണുനാഥ്, കെ.സി വേണുഗോപാല്‍ എന്നിവരോടുളള നന്ദിയും അദ്ദേഹം കുറിപ്പിലൂടെ പങ്കുവെച്ചു.
ജി. വേണുഗോപാലിന്റെ കുറിപ്പ്:
കേരള സംഗീത നാടക അക്കാദമി ചെയർമാൻ പദവി അറിഞ്ഞ ശേഷം സോഷ്യൽ മീഡിയയിൽ പോസ്റ്റ്‌ ഒന്നും ഇടാൻ സാധിച്ചില്ല. അത്രമാത്രം ഫോൺ കാളുകളും മെസ്സേജുകളും, സന്ദർശകരുമായിരുന്നു. ഒരു യാത്ര കഴിഞ്ഞു ഇന്നലെ തിരിച്ചെത്തിയതേയുള്ളു. എന്നെ ഈ ഗവൺമെന്റ് വിശ്വസിച്ചേൽപ്പിച്ച ഈ ഭാരിച്ച ഉത്തരവാദിത്വത്തിൽ നിറഞ്ഞ സന്തോഷം .
മുഖ്യ മന്ത്രി ശ്രീ . വി. ഡീ സതീശന്റെ ഒരു ഫോൺ കാൾ വളരെ പ്രധാനപ്പെട്ടതായിരുന്നു. " ഞങ്ങൾക്ക് ഞങ്ങളുടേതായ കൃത്യമായ രാഷ്ട്രീയമുണ്ട്. പക്ഷെ സാംസ്‌കാരിക സ്ഥാപനങ്ങൾ പോലുള്ള ഇടങ്ങളിൽ അതത് രംഗത്ത് യോജിക്കുന്നവരെ നിയമിക്കാൻ ആയിരുന്നു തീരുമാനം. ആശംസകൾ ". സാംസ്‌കാരിക വകുപ്പ് മന്ത്രി ശ്രീ പി സി വിഷ്ണുനാഥിനെ വർഷങ്ങളായി അറിയാം. ഏറ്റവും പ്രധാനപ്പെട്ട ഒരു ഗുണം അദ്ദേഹത്തിൽ കണ്ടിട്ടുള്ളത് സംഗീതത്തോടുള്ള ആഭിമുഖ്യവും, കലാബോധവും, നന്മയുള്ളൊരു മനസ്സുമാണ്. ഈ രംഗത്ത് എന്റെ സ്വപ്നങ്ങളും, ആശങ്കകളും അദ്ദേഹവുമായി പങ്കു വയ്ക്കുമ്പോഴെല്ലാം ഒരു സമാന ചിന്താഗതിക്കാരനെ അദ്ദേഹത്തിൽ കാണുവാൻ സാധിച്ചിട്ടുണ്ട്. മുന്നോട്ടുള്ള എന്റെ പ്രവർത്തനത്തിന് ഏറ്റവും സഹായകവും അതു തന്നെയായിരിക്കും. നാല്പതു വർഷത്തിലേറേയായി എന്റെ പ്രിയപ്പെട്ട സുഹൃത്താണ് ശ്രീ കെ. സി വേണുഗോപാൽ എന്ന മികച്ച വ്യക്തിത്വം. എന്റെ സ്നേഹവും നന്ദിയും ഇവരോടൊക്കെയാണ്.
സംഗീത നാടക ആക്കാദമിയിൽ ദാസേട്ടന് ശേഷം മറ്റൊരു ഗായകൻ ചെയർമാൻ ആകുന്നതു ഇപ്പോഴാണ്. എന്നെ നിരന്തരം ഉപദേശിക്കുവാനും ക്രിയാത്മകമായി വിമർശിക്കാനും എന്റെ സുഹൃത്തുക്കൾ നിരവധിയുണ്ട്. കൃത്യമായി അവയൊക്കെ ഉൾക്കൊള്ളാനും എനിക്ക് സാധിച്ചിട്ടുണ്ട്.
അവരിൽ ഒരാൾ എന്നോട് പറഞ്ഞ ഒരു കാര്യം വളരെ ശ്രദ്ധേയമായി തോന്നി. ( E V Rajeev) " ഇതു ജി. വേണുഗോപാൽ എന്ന ഗായകന് കിട്ടിയ മറ്റൊരു വേദിയല്ല. കേരളത്തിന്റെ കലാ സാംസ്‌കാരിക ഇടങ്ങളോടുള്ള പ്രതിബദ്ധതയാണ് ഈ കസേര. ഇനി പാടേണ്ടത് ഒരു പാട്ടല്ല, സംസ്കാരത്തിന്റെ പുതിയൊരു അധ്യായമാണ് " വളരെ കൃത്യമാണ് ആ സന്ദേശം .
സ്വന്തം ശബ്ദവും സ്വന്തം രൂപവും മാത്രം കേട്ടും കണ്ടും അഭിരമിച്ചിരുന്നൊരു കാലത്തിനു മെല്ലെ തിരശീല താഴുകയാണ്. കവിയും ദേവസ്വം ബോർഡ്‌ ചെയർമാനുമായ ജയകുമാറേട്ടൻ പറഞ്ഞ ഉള്ളിൽ തട്ടുന്ന ഒരു വാചകം ഉണ്ടായിരുന്നു. " വേണു, അനർഹർക്ക് അംഗീകാരം കിട്ടുമായിരിക്കും. പക്ഷേ, ഈ കസേരയിൽ ഇരിക്കുമ്പോൾ അർഹതപ്പെട്ട ഒരാളെപ്പോലും അതിനു വേണ്ടി തഴയരുത്". എന്റെ പ്രശസ്തമായ ഉണരുമീ ഗാനത്തിലെ ഈ വരികൾ ഓർത്തു ഞാൻ ഒരു നിമിഷം നിർന്നിമേഷനായി... " എന്നിലേയെന്നെ..കാണ്മു ഞാൻ നിന്നിൽ... " അടുത്ത മാസം ആദ്യം ജോയിൻ ചെയ്യാനാണ് തീരുമാനം. നിങ്ങളുടെയെല്ലാം സ്നേഹ സഹകരണങ്ങൾ, ഉപദേശങ്ങൾ, വിമർശനങ്ങൾ, ഇനിയും പ്രതീക്ഷിക്കുന്നു
Comments