സംവിധായകൻ മഹേഷ് ഭട്ടിന്റെ ഭാര്യ, ആലിയ ഭട്ടിന്റെ അമ്മ എന്നീ നിലകളിലാണ് സോനി റസ്ദാനെ ഇന്ന്ഏ കൂടുതൽ പ്രേക്ഷകരും അറിയുന്നത്. പക്ഷേ അതിനൊക്കെ മുമ്പ്, തന്റെ അഭിനയ മികവു പ്രേക്ഷരുടെ മനസ്സിൽ ഇടം പിടിച്ച ഒരു അഭിനേത്രിയായിരുന്നു സോനി റസ്ദാൻ. സാരംഗ്' പോലുള്ള സിനിമകളിലൂടെയും ടിവി ഷോകളിലൂടെയും അഭിനയജീവിതത്തിൽ സ്വന്തമായി ഒരു ഐഡന്റിറ്റിയുണ്ടാക്കിയ വ്യക്തിയായിരുന്നു അവർ. മഹേഷ് ഭട്ടിനെ വിവാഹം ചെയ്ത ശേഷമാണ് താരം വെള്ളിത്തിരയോട് ഗുഡ് ബൈ പറഞ്ഞത്.
ഇപ്പോഴിതാ താനും മഹേഷ് ഭട്ടും തമ്മിലുള്ള ബന്ധം ആരംഭിച്ച കാലത്ത് പൂജ ഭട്ട് പ്രകടിപ്പിച്ച പക്വതയെക്കുറിച്ച് പറയുകയാണ് സോനി റസ്ദാൻ. എങ്ങനെയാണ് പൂജയോട് വിവാഹത്തെക്കുറിച്ചുള്ള സംഭാഷണം നടത്തിയത്? എന്നായിരുന്നു അവതാരകയുടെ ചോദ്യം.
‘‘ആ പ്രായത്തിൽ അവൾ വളരെ പക്വതയുള്ളവളായിരുന്നു എന്ന് എനിക്ക് തോന്നുന്നു, അവൾക്ക് വെറും... 15 വയസ്സേ ഉണ്ടായിരുന്നുള്ളൂ, 15 വയസ്സുള്ളപ്പോൾ ഞാൻ എന്താണ് ചെയ്യുമായിരുന്നത് എന്ന് എനിക്ക് അറിയില്ല. എന്റെ അച്ഛൻ മറ്റൊരു സ്ത്രീയെ വിവാഹം കഴിക്കാൻ ആഗ്രഹിക്കുന്നു എന്ന വാർത്ത കേൾക്കാൻ ഞാൻ അത്ര സന്തോഷത്തോടെ തയ്യാറാകുമായിരുന്നില്ല. എന്നാൽ ഇതിന്റെ മുഴുവൻ ക്രെഡിറ്റും ഞാൻ പൂജയ്ക്ക് നൽകണം. അവൾ അതിൽ വളരെ പക്വത കാണിച്ചു, എന്നോട് വളരെ നന്നായി പെരുമാറുകയും ചെയ്തു. അതായത്, അവൾ എന്നെ ബുദ്ധിമുട്ടിച്ചില്ല...
ഇതിന്റെ മറ്റൊരു ക്രെഡിറ്റ് മഹേഷിനും അവകാശപ്പെട്ടതാണ്, കാരണം അദ്ദേഹം എന്നെ അദ്ദേഹത്തിന്റെ മക്കളുടെ മേലോ, മക്കളെ എന്റെ മേലോ ഒരിക്കലും അടിച്ചേൽപ്പിച്ചില്ല. അതിനാൽ വർഷങ്ങളായി സംഭവിച്ചതെല്ലാം വളരെ സ്വാഭാവികമായി സംഭവിച്ചതാണ്, കാരണം ഇതൊരു വളരെ സെൻസിറ്റീവായ സാഹചര്യമാണെന്ന് ഞാൻ കരുതുന്നു. കുട്ടികൾക്ക് ഇത് എളുപ്പമല്ല, പ്രയാസകരമാണ്. ബന്ധപ്പെട്ട എല്ലാവർക്കും ഇത് ബുദ്ധിമുട്ടാണ്, എനിക്കുമത് ശരിക്കും ബുദ്ധിമുട്ടായിരുന്നു. സ്ത്രീകൾക്ക് എന്നല്ല, ആർക്കും ഇത് എളുപ്പമല്ലെന്നാണ് ഞാൻ കരുതുന്നത്. തീർച്ചയായും എനിക്കും എളുപ്പമായിരുന്നില്ല, ഞാൻ എപ്പോഴെങ്കിലും ഇങ്ങനെയൊരു സാഹചര്യത്തിൽപ്പെടുമെന്ന് കരുതിയതേയല്ല... ’’ എന്നാണ് സോനി റസ്ദാന്‍ പറയുന്നത്. സൂം ടിവിയിലെ അഭിമുഖത്തിലാണ് സോനി റസ്ദാന്‍ മനസ്സു തുറന്നു സംസാരിച്ചത്. ‘സാരാംശ്’ എന്ന ചിത്രത്തിന്റെ സെറ്റിൽ വെച്ചാണ് സോനി സംവിധായകൻ മഹേഷ് ഭട്ടിനെ കണ്ടുമുട്ടിയത്. അഭിനയജീവിതത്തിൽ സജീവമായിരുന്ന കാലഘട്ടത്തിൽ, 1986-ൽ താരം വിവാഹിതയായി. പിന്നീട് ഇവർക്ക് ഷഹീൻ ഭട്ട്, ആലിയ ഭട്ട് എന്നീ രണ്ട് പെൺമക്കളും ജനിച്ചു. മഹേഷ് ഭട്ട് നേരത്തെ കിരൺ ഭട്ടിനെ വിവാഹം കഴിച്ചിരുന്നു. പൂജ, രാഹുൽ എന്നിങ്ങനെ രണ്ട് മക്കളാണ് അതിലുള്ളത്.
തന്റെ അച്ഛനെ വിവാഹം ചെയ്യുന്ന സാഹചര്യത്തെച്ചൊല്ലി സോനി റസ്ദാൻ വലിയൊരു കുറ്റബോധം പേറിയിരുന്നതായി പൂജ മുന്‍പ് വെളിപ്പെടുത്തിയിട്ടുണ്ട്. എന്നാല്‍ തന്റെ മാതാപിതാക്കളുടെ ബന്ധത്തിൽ നേരത്തെ തന്നെ വിള്ളലുകൾ വീണിരുന്നതിനാൽ സോനിയല്ല ആ ദാമ്പത്യം തകർത്തതെന്ന് പറഞ്ഞ് പൂജ ആശ്വസിപ്പിക്കുകയാണ് ചെയ്തത്. ആ കുറ്റബോധം മനസ്സിൽ കൊണ്ടുനടക്കരുതെന്ന് താൻ സോനിയോട് ആവശ്യപ്പെട്ടതായും പൂജ പറഞ്ഞിട്ടുണ്ട്. മാത്രമല്ല, ലോകം അവരുടെ ബന്ധത്തെക്കുറിച്ച് അറിയുന്നതിന് വളരെക്കാലം മുമ്പ് തന്നെ സോനിയുമായുള്ള പ്രണയത്തെക്കുറിച്ച് പിതാവ് മഹേഷ് തന്നോട് പറഞ്ഞിരുന്ന കാര്യവും താരം കൂട്ടിച്ചേർത്തിരുന്നു.
തൊഴിൽപരമായി നെറ്റ്ഫ്ലിക്സിന്റെ ‘ഷാക്: ട്രസ്റ്റ് നോ വൺ’ എന്ന ഷോയിലെ ഒരു പ്രധാന കഥാപാത്രത്തെ സോനി റസ്ദാന്‍ അവതരിപ്പിക്കുന്നുണ്ട്. പരിനീതി ചോപ്ര, ജെന്നിഫർ വിംഗെറ്റ്, താഹിർ രാജ് ഭാസിൻ, സുമീത് വ്യാസ്, ഹാർലീൻ സേത്തി എന്നിവരാണ് ഈ പരമ്പരയിൽ പ്രധാന വേഷങ്ങളിലെത്തുന്നത്. സെപ്റ്റംബർ 24-നാണ് ഈ പരമ്പര നെറ്റ്ഫ്ലിക്സിൽ സ്ട്രീമിംഗ് ആരംഭിച്ചത്.
Comments