മലപ്പുറം: സർക്കാരിൽ നടക്കുന്ന കാര്യങ്ങൾ ഒന്നും അറിയുന്നില്ല എന്നും ചില കാര്യങ്ങൾ മാധ്യമങ്ങളിലൂടെയാണ് അറിയുന്നത് എന്നുമുള്ള യുഡി‌എഫ് കൺവീനർ അടൂർ പ്രകാശിന്റെ തുറന്നു‌പറച്ചിലിനോട് പ്രതികരിച്ച് മന്ത്രി എ പി അനിൽ കുമാർ. ചർച്ചകളും കൂടിയാലോചനകളും നടക്കണം. തന്റെ തീരുമാനം മുന്നണിക്കുള്ളിൽ പറയുമെന്നും അദ്ദേഹം പറഞ്ഞു.
എന്നാൽ, എല്ലാ കാര്യങ്ങളും കെസി വേണുഗോപാലിൽ കേന്ദ്രീകരിക്കേണ്ടതില്ല. മുഖ്യമന്ത്രിയെ തീരുമാനിക്കുന്ന സമയത്ത് വേണുഗോപാലിനെ മാധ്യമങ്ങൾ വേട്ടയാടി എന്നും അദ്ദേഹം ചൂണ്ടിക്കാട്ടി. അഭിപ്രായ വ്യത്യാസങ്ങൾ പാർട്ടിക്കുള്ളിൽ പറയുന്ന ശീലമാണ് തനിക്കുള്ളത്. പറയാനുള്ളത് മുന്നണിയിൽ പറയുമെന്നും ആദ്ദേഹം കൂട്ടിച്ചേർത്തു.
അതേസമയം, എസ്‌എഫ്ഐയും ഡിവൈഎഫ്ഐയും മന്ത്രിമാരെ തടയുന്നതിനെ മന്ത്രി വിമർശിക്കുകയും ചെയ്തു. തിരുവനന്തപുരത്ത് യൂത്ത് കോൺഗ്രസ് ബിജെപിക്ക് എതിരെയാണ് സമരം നടത്തിയത്. സിപിഐഎമ്മിന് എതിരെയല്ല. അവർ എന്തിനാണ് മന്ത്രിമാരെ തടയുന്നതെന്ന് മനസ്സിലാകുന്നില്ല. ബിജെപിക്കെതിരെ സമരം നടത്തുമ്പോൾ എന്തിനാണ് സിപിഐഎമ്മിന് വേദനിക്കുന്നതെന്നും മന്ത്രി ചോദിച്ചു.
അതേസമയം, അടൂർ പ്രകാശിനെ പറയാനുള്ളത് പാർട്ടി വേദികളിൽ പറയണം എന്ന നിലപാടിലാണ് മന്ത്രി കെ മുരളീധരൻ. ആവശ്യമുള്ള കാര്യങ്ങളൊക്കെ മുഖ്യമന്ത്രി തന്നെ അറിയിക്കുന്നുണ്ട്. പത്രങ്ങളിലൂടെയാണ് കാര്യങ്ങൾ അറിയുന്നതെന്ന് താൻ മുമ്പ് പരാതിപ്പെട്ടിരുന്നു. അത് വലിയ വിമർശനം ഏറ്റുവാങ്ങിയിരുന്നു എന്നും ഇപ്പോൾ തനിക്ക് അത്തരം പരാതി ഇല്ല എന്നും അദ്ദേഹം പറഞ്ഞു.
Comments