ആഡംബര ജീവിതത്തിനും ആഡംബര കാറുകൾക്കും പേരുകേട്ട നഗരമാണ് ദുബായ്. എന്നാൽ പാർക്കിങ് ഏരിയയിൽ ദിവസങ്ങളായി പൊടിപിടിച്ച് കിടക്കുന്ന കോടികൾ വിലമതിക്കുന്ന ആഡംബര കാറുകൾ കണ്ട് അമ്പരന്നിരിക്കുകയാണ് ഇന്ത്യൻ യുവതി. ഒന്നല്ല, നിരവധി റോൾസ് റോയ്‌സ് കാറുകളും ഒരു ഫെറാറിയുമാണ് ഉപയോഗിക്കാതെ ഉപേക്ഷിച്ചതുപോലെ പാർക്കിങ് ഏരിയയിൽ കിടക്കുന്നത്. കാറുകളുടെ ദൃശ്യങ്ങൾ യുവതി ഇൻസ്റ്റഗ്രാമിൽ പങ്കുവെച്ചതോടെ വിഡിയോ സമൂഹമാധ്യമങ്ങളിൽ വൈറലായി.
ദുബായിൽ താമസിക്കുന്ന റിയ എന്ന യുവതിയാണ് ആഡംബര കാറുകളുടെ ദൃശ്യങ്ങൾ ഇൻസ്റ്റഗ്രാമിലൂടെ പങ്കുവെച്ചത്. മൂന്ന് അക്കങ്ങളുള്ള നമ്പർ പ്ലേറ്റുകളോട് കൂടിയ നിരവധി റോൾസ് റോയ്‌സ് കാറുകളും ഒരു ഫെറാറിയുമാണ് പാർക്കിങ് ഏരിയയിൽ കണ്ടെത്തിയത്. കാറുകളെല്ലാം കട്ടിയുള്ള പൊടിപടലങ്ങളാൽ മൂടിയ നിലയിലായിരുന്നു. ദിവസങ്ങളായി കഴുകുകയോ ഉപയോഗിക്കുകയോ ചെയ്യാത്തതുപോലെയാണ് കാറുകളുടെ അവസ്ഥയെന്നും ഇത്രയധികം വിലയുള്ള വാഹനങ്ങൾ ഇത്തരത്തിൽ ഉപേക്ഷിക്കപ്പെട്ട നിലയിൽ കിടക്കുന്നത് വിശ്വസിക്കാനാകുന്നില്ലെന്നും യുവതി വിഡിയോയിൽ പറഞ്ഞു.
ദുബായിലെ സമ്പന്നതയെക്കുറിച്ച് നേരത്തെ തന്നെ അറിയാമായിരുന്നെങ്കിലും ഇത്രയധികം സമ്പത്തുള്ള ആളുകളുണ്ടെന്നത് തന്നെ അത്ഭുതപ്പെടുത്തിയെന്ന് റിയ പറഞ്ഞു. പണം ധാരാളമുള്ളതിനാൽ വാഹനങ്ങളുടെ കാര്യത്തിൽ പോലും ശ്രദ്ധിക്കാത്തവരുണ്ടാകാമെന്നും എന്നാൽ ഈ കാഴ്ച മറ്റൊരു തലത്തിലുള്ള സമ്പന്നതയാണ് കാണിക്കുന്നതെന്നും യുവതി കൂട്ടിച്ചേർത്തു. ആഡംബര കാറുകൾ ഉപയോഗിക്കാതെയും വൃത്തിയാക്കാതെയും പാർക്കിങ് ഏരിയയിൽ കിടക്കുന്നത് എന്തിനാണെന്നും ഇതിന്റെ ഉടമ ആരാണെന്നും യുവതി വിഡിയോയിലൂടെ ചോദിച്ചു. അതേസമയം, ഈ കാഴ്ച ജീവിതത്തിൽ കൂടുതൽ ഉയരങ്ങളിലെത്താനുള്ള പ്രചോദനമായെന്നും സമ്പന്നതയുടെ ഈ കാഴ്ച ഓരോ ദിവസവും മുന്നേറാൻ പ്രേരിപ്പിക്കുന്നുവെന്നും റിയ പറഞ്ഞു.
വിഡിയോ വൈറലായതോടെ നിരവധി പേരാണ് പ്രതികരണങ്ങളുമായി രംഗത്തെത്തിയത്. ഇത് സമ്പന്നതയുടെ മറ്റൊരു തലമാണെന്നായിരുന്നു ഒരാളുടെ കമന്റ്. ദുബായിൽ മാത്രമേ ഇത്തരമൊരു കാഴ്ച കാണാനാകൂവെന്ന് മറ്റൊരാൾ കുറിച്ചു. ഓടിക്കാനായി നിർമിച്ച ഫെറാറി ഇത്തരത്തിൽ പൊടിപിടിച്ച് കിടക്കുന്നത് സങ്കടകരമാണെന്നും ചിലർ അഭിപ്രായപ്പെട്ടു. എന്നാൽ, വാഹനങ്ങൾ ഉപേക്ഷിക്കപ്പെട്ടതാണോ അതോ താൽക്കാലികമായി പാർക്ക് ചെയ്തതാണോ എന്ന കാര്യത്തിൽ വ്യക്തതയില്ല.
Comments