പുകവലി രക്തസമ്മര്‍ദ്ദത്തിലും (Blood Pressure) ഹൃദയമിടിപ്പിലും താല്‍ക്കാലികമായ വര്‍ദ്ധനവിന് കാരണമാകുമെന്നും, എന്നാല്‍ ദീര്‍ഘകാലാടിസ്ഥാനത്തില്‍ പുകയില ഉപയോഗിക്കുന്നത് രക്തധമനികളെ നശിപ്പിക്കുകയും ഹൃദ്രോഗം, സ്‌ട്രോക്ക് എന്നിവയ്ക്കുള്ള സാധ്യത വര്‍ദ്ധിപ്പിക്കുകയും ചെയ്യുമെന്ന് ഡോക്ടര്‍മാര്‍ പറയുന്നു. പുകവലി ശ്വാസകോശ തകരാറുകളുമായി ബന്ധപ്പെട്ടാണ് പലപ്പോഴും അറിയപ്പെടുന്നതെങ്കിലും, ഇതിന്റെ ആഘാതം ശ്വസനവ്യവസ്ഥയ്ക്ക് പുറത്തേക്കും വ്യാപിക്കുന്നുണ്ട്. പുകവലിച്ചയുടന്‍ തന്നെ രക്തസമ്മര്‍ദ്ദത്തിലും ഹൃദയമിടിപ്പിലും പെട്ടെന്നുള്ള വര്‍ദ്ധനവ് ഉണ്ടാകാന്‍ പ്രധാന കാരണം അതിലടങ്ങിയിരിക്കുന്ന നിക്കോട്ടിന്‍ എന്ന ഘടകമാണ്.നിക്കോട്ടിന്‍ നാഡീവ്യവസ്ഥയെ ഉത്തേജിപ്പിക്കുകയും ഹൃദയമിടിപ്പ് വേഗത്തിലാക്കുകയും രക്തധമനികള്‍ ചുരുങ്ങാന്‍ ഇടയാക്കുകയും ചെയ്യുന്നു. ഇത് പുകവലിച്ചയുടന്‍ രക്തസമ്മര്‍ദ്ദവും ഹൃദയമിടിപ്പും താല്‍ക്കാലികമായി ഉയരാന്‍ കാരണമാകുന്നു.
പുകവലി രക്തസമ്മര്‍ദ്ദത്തെ എങ്ങനെ ബാധിക്കുന്നു?
ഒരാള്‍ പുകവലിക്കുമ്പോള്‍, നിക്കോട്ടിന്‍ സിമ്പതറ്റിക് നാഡീവ്യവസ്ഥയെ ഉത്തേജിപ്പിക്കുകയും ഹൃദയമിടിപ്പ് വര്‍ദ്ധിപ്പിക്കുകയും രക്തധമനികള്‍ ഇടുങ്ങിയതാക്കുകയും ചെയ്യുന്നു. ഇതിന്റെ ഫലമായി ശരീരത്തിലുടനീളം രക്തം പമ്പ് ചെയ്യാന്‍ ഹൃദയത്തിന് കൂടുതല്‍ പ്രയത്‌നിക്കേണ്ടി വരുന്നു, ഇത് താല്‍ക്കാലികമായി രക്തസമ്മര്‍ദ്ദം ഉയര്‍ത്തുന്നു. എന്നാല്‍ ഇത്തരം ഹ്രസ്വകാല മാറ്റങ്ങളില്‍ മാത്രം ഒതുങ്ങുന്നതല്ല ഇതിന്റെ പ്രത്യാഘാതം. പുകവലിയിലൂടെ പുകയില ശരീരത്തിലെത്തുന്നത് രക്തധമനികള്‍ക്ക് ദീര്‍ഘകാല തകരാറുകള്‍ ഉണ്ടാക്കും. തുടര്‍ച്ചയായ പുകവലി രക്തധമനികളുടെ ഉള്‍പാളിയെ നശിപ്പിക്കുകയും അവയുടെ വഴക്കം (elasticity) കുറയ്ക്കുകയും ആരോഗ്യത്തെ ബാധിക്കുകയും ചെയ്യുന്നു. പുകയിലപ്പുകയില്‍ കാര്‍ബണ്‍ മൊണോക്‌സൈഡും മറ്റ് നിരവധി രാസവസ്തുക്കളും അടങ്ങിയിട്ടുണ്ട്. ഇവ ശരീര കലകള്‍ക്ക് ആവശ്യമായ ഓക്‌സിജന്റെ അളവ് കുറയ്ക്കുകയും രക്തധമനികളില്‍ വീക്കവും (inflammation) തകരാറുകളും ഉണ്ടാക്കുകയും ചെയ്യുന്നു. കാലക്രമേണ, ഇത് ഹൃദയാഘാതം, സ്‌ട്രോക്ക് തുടങ്ങിയ ഗുരുതരമായ ഹൃദ്രോഗ സാധ്യതകള്‍ വര്‍ദ്ധിപ്പിക്കുന്നു.
ഉയര്‍ന്ന രക്തസമ്മര്‍ദ്ദമുള്ളവര്‍ പുകവലിച്ചാല്‍ കൂടുതല്‍ അപകടകരമാണോ?
ഹൃദ്രോഗ സാധ്യതയുള്ളവര്‍ക്ക് പുകവലി കൂടുതല്‍ അപകടകരമാണ്. ഉയര്‍ന്ന രക്തസമ്മര്‍ദ്ദം, പ്രമേഹം, ഉയര്‍ന്ന കൊളസ്‌ട്രോള്‍, അല്ലെങ്കില്‍ കുടുംബത്തില്‍ ഹൃദ്രോഗ പാരമ്പര്യമുള്ളവര്‍ എന്നിവരില്‍ ഹൃദ്രോഗ സാധ്യത ഇതിനകം തന്നെ കൂടുതലാണ്. ഇതിനൊപ്പം പുകവലി കൂടിയാകുമ്പോള്‍ അപകടസാധ്യത ഇരട്ടിക്കുന്നു. അതിനാല്‍, ഉയര്‍ന്ന രക്തസമ്മര്‍ദ്ദമുള്ളവര്‍ പുകവലി മൂലമുണ്ടാകുന്ന രക്തസമ്മര്‍ദ്ദ വര്‍ദ്ധനവ് താല്‍ക്കാലികമാണെന്ന് കരുതി നിസ്സാരമായി കാണരുത്.
സിഗരറ്റിന്റെ എണ്ണം കുറയ്ക്കുന്നത് അപകടസാധ്യത കുറയ്ക്കുമോ?
സിഗരറ്റിന്റെ ഉപയോഗം കുറയ്ക്കുന്നത് പുകവലി പൂര്‍ണ്ണമായി നിര്‍ത്തുന്നതിലേക്കുള്ള ഒരു പടിയാകാം, എന്നാല്‍ ഇത് പുകയില ഉപയോഗം പൂര്‍ണ്ണമായും സുരക്ഷിതമാക്കുന്നില്ല. പുകയില ഉപയോഗത്തില്‍ സുരക്ഷിതമായ ഒരു അളവ് എന്നൊന്നില്ല. അതിനാല്‍, പുകവലി ഉപേക്ഷിക്കുക എന്നതാണ് ഹൃദയാരോഗ്യം സംരക്ഷിക്കാന്‍ ഒരു പുകവലിക്കാരന് ചെയ്യാന്‍ കഴിയുന്ന ഏറ്റവും പ്രധാനപ്പെട്ട കാര്യം. പുകവലി നിര്‍ത്തുന്നതോടെ രക്തസമ്മര്‍ദ്ദവും ഹൃദയമിടിപ്പും സാധാരണ നിലയിലാകാന്‍ തുടങ്ങും, ഒപ്പം ദീര്‍ഘകാല ഹൃദ്രോഗ സാധ്യത കുറയുകയും ചെയ്യും. സ്വന്തമായി പുകവലി നിര്‍ത്താന്‍ പ്രയാസപ്പെടുന്നവര്‍ക്ക് വൈദ്യസഹായത്തോടെയുള്ള ചികിത്സാരീതികള്‍ തേടാവുന്നതാണ്.
Comments