മലയാളികള്‍ക്ക് പരിചിതനായ ടെലിവിഷന്‍ ഷോ അവതാരകനും നടനുമാണ് ഫിറോസ് ഖാന്‍. ടെലിവിഷന്‍ ഷോകളുടെ അസിസ്റ്റന്റ് ഡയറക്ടറായിട്ടാണ് ഫിറോസ് തന്റെ കരിയര്‍ ആരംഭിച്ചത്. 2012ല്‍ പുറത്തിറങ്ങിയ മമ്മൂട്ടി ചിത്രമായ ഫേസ് റ്റു ഫേസ് എന്ന സിനിമയിലും താരം അഭിനയിച്ചിരുന്നു. പിന്നീട് നിരവധി ഷോകളുടെ അവതാരകനായ താരത്തെ ഏഷ്യാനെറ്റിലെ ബിഗ് ബോസ് എന്ന പരിപാടിയാണ് പ്രേക്ഷകര്‍ക്കിടയില്‍ കൂടുതല്‍ സുപരിചിതനാക്കിയത്. എന്നാല്‍ പിന്നീട് ബിഗ് ബോസ് ഹൗസിലെ ചില പരാമര്‍ശങ്ങള്‍ കാരണം പല അനാവശ്യ വിവാദങ്ങളിലും ഫിറോസ് ഖാൻ ചെന്നുപെട്ടിരുന്നു.
ഇപ്പോഴിതാ മമ്മൂട്ടിയെക്കുറിച്ച് മുൻപു നടത്തിയ വിവാദ പ്രസ്താവനയിൽ വിശദീകരണം നല്‍കുകയാണ് ഫിറോസ് ഖാൻ. തനിക്കേറെ ഇഷ്ടമുള്ളയാളാണ് മമ്മൂക്കയെന്നും ഇഷ്ടപ്പെടുന്ന ഒരാൾ എന്തെങ്കിലും തെറ്റു ചെയ്താൽ അതു പറയരുത് എന്നൊന്നുമില്ലെന്നും ഫിറോസ് ഖാൻ പറയുന്നു.
‘‘മമ്മൂക്ക, ലാലേട്ടൻ ഇവരൊക്കെ നമ്മള്‍ ഇഷ്ടപ്പെടുന്ന ആളുകളാണ്. കാരണം കുട്ടിക്കാലം മുതല്‍ നമ്മള്‍ കണ്ടുവരുന്ന ആള്‍ക്കാരാണ്. എന്ന് വച്ച്‌ ലാലേട്ടനെ കാണാൻ വേണ്ടിയിട്ട് ഒരിക്കലും ബിഗ് ബോസില്‍ പോകുന്നു എന്നില്ല. ഒരിക്കലും അങ്ങനെ ഞാൻ ചിന്തിച്ചിട്ട് പോലുമില്ല. ബിഗ് ബോസ് എന്നുള്ള ഒരു പ്ലാറ്റ്ഫോം അത്രയും മനോഹരമായി തോന്നിയത് കൊണ്ട്, അതില്‍ എന്തെങ്കിലും ചെയ്യാൻ പറ്റും എന്നുള്ള പൂർണ്ണ ഒരു ബോധ്യം ഉണ്ടായത് കൊണ്ടാണ് പോയത്. ഐഡിയ സ്‌റ്റാർ സിംഗർ എന്നതടക്കമുള്ള പാട്ട് പരിപാടിക്ക് എന്നെ വിളിച്ചാല്‍ ഞാൻ പോകത്തില്ല. കാരണം അത് ചെയ്യാൻ പറ്റത്തില്ല എന്നുള്ളത് എനിക്കറിയാം. എന്തെങ്കിലും ചെയ്യാൻ പറ്റുന്ന മേഖലയില്‍ പോകണം എന്നേയുള്ളൂ.
മമ്മൂക്കയെ കുറിച്ച് പറഞ്ഞത് ആളുകൾ തെറ്റായ രീതിയിലാണ് എടുത്തത്. മമ്മൂട്ടി എന്ന ആർട്ടിസ്‌റ്റ് വളരെ വലിയ ആർട്ടിസ്‌റ്റ് ആണ്. ഞാൻ പറഞ്ഞത് മമ്മൂക്കയുടെ ചില പേഴ്‌സണൽ കാര്യങ്ങൾ മാത്രമാണ്. ഞാൻ മമ്മൂക്കയുടെ കൂടെ ഒരു സിനിമയിൽ ഓപ്പോസിറ്റ് മെയിൻ വില്ലൻ ആയിട്ട് ചെയ്‌തതാണ്, ‘ഫേസ് ടു ഫേസ്’ എന്ന ചിത്രത്തില്‍ തോമസ് പുഞ്ചക്കാടൻ എന്ന കഥാപാത്രം. അന്നൊക്കെ എനിക്ക് മമ്മുക്കയെ പേഴ്‌സണലി വളരെ അടുത്ത് അറിയാവുന്ന ആളാണ്. മമ്മൂക്ക നല്ല മനുഷ്യൻ ഒക്കെ തന്നെയാണ്. പക്ഷേ, നമ്മള്‍ ഒരു കാര്യം മനസ്സിലാക്കുക, ഇപ്പൊ നമുക്ക് ഒരു സഹോദരൻ, അല്ലെങ്കില്‍ നമ്മുടെ വീട്ടില്‍ ഒരു മകൻ, അല്ലെങ്കില്‍ ആരും ആയിക്കോട്ടെ, നമുക്ക് അത്രയും വേണ്ടപ്പെട്ടവർ ചെയ്യുന്നതെല്ലാം, നമ്മള്‍ അങ്ങ് അവർ തെറ്റ് ചെയ്‌താല്‍ ശരി എന്ന് പറയുമോ. അങ്ങനെ പറയുമ്പോള്‍ അവരോട് സ്നേഹം ഇല്ല എന്നാണ്. എനിക്ക് മമ്മുക്കായോട് ലാലേട്ടനെക്കാള്‍ കൂടുതലിഷ്ടമാണ്.
എനിക്ക് ഭയങ്കര ഇഷ്‌ടമുള്ള ഒരു മനുഷ്യനാണ് അദ്ദേഹം. ഇപ്പോഴും ഈ 70 പ്ലസ് ആയിട്ടുള്ള അദ്ദേഹത്തിന്റെ ആ സ്വാഗ് എന്ന് പറയുന്നത് വേറൊരു ലെവലാണ്. അദ്ദേഹത്തിന്റെ ഡ്രസ്സിംഗ് സ്‌റ്റൈല്‍ ഒക്കെ എനിക്ക് ഭയങ്കര ഇഷ്‌ടമാണ്. പക്ഷേ, എന്നു കരുതി അയാളുടെ ഒരു കാര്യം മറച്ചു വെക്കാൻ പറ്റില്ല. ഞാൻ നേരത്തെ പറഞ്ഞതുപോലെ തന്നെ, വീട്ടിലെ ജ്യേഷ്ഠൻ, അല്ലെങ്കില്‍ നമ്മുടെ സഹോദരങ്ങള്‍, അല്ലെങ്കില്‍ മക്കള്‍ എന്തെങ്കിലും ഒരു തെറ്റ് കാണിക്കുമ്പോള്‍, അത് നമുക്ക് തെറ്റാണെന്ന് തോന്നി കഴിഞ്ഞാല്‍, അത് പറയും. എന്നെ കുറിച്ച് വേറൊരാള്‍ തെറ്റ് കാണിച്ച്‌ ചൂണ്ടി കാണിച്ചാല്‍, ഞാൻ അവരെ വെറുക്കുകയല്ല ചെയ്യുന്നത്.
മമ്മൂക്ക കാണിച്ച, എനിക്ക് ഒട്ടും യോജിക്കാൻ പറ്റാത്ത ഒരു കാര്യം ഞാൻ അന്ന് പറഞ്ഞതാണ്. നല്ല കുറെ കാര്യങ്ങൾ അതിൽ പറഞ്ഞിട്ടുണ്ട്. അതൊക്കെ കട്ട് ചെയ്‌ത്‌ ഈ കാര്യമാണ് വന്നത്. പുള്ളി ഇടുന്നതു പോലുള്ള വസ്ത്രം പോലെ വേറൊരാൾ ഇട്ടുവന്നതു കണ്ടാൽ അത് അഴിപ്പിക്കും. അതൊരു മോശമായിട്ടാണ് എനിക്ക് തോന്നുന്നത്, അതിപ്പോ എത്ര വലിയ സംഭവം ആയാലും.. അതൊന്നും ഒരു ശരിയായിട്ടുള്ള ഒരു കാര്യമല്ല. എന്റെ ഒരു ക്യാരക്‌ടർ അനുസരിച്ച്, ഞാൻ അതങ്ങ് തുറന്നു പറയും.
അങ്ങനെയുള്ള കുറെ ഇൻസിഡൻസ്, അല്ലെങ്കില്‍ അദ്ദേഹത്തെപ്പറ്റിയുള്ള കുറെ സംഭവങ്ങളാണ് ഞാൻ പറഞ്ഞത്. പിന്നെ അദ്ദേഹത്തെക്കുറിച്ച് തന്നെ, മനോജ് കെ ജയൻ, മനോജ് ചേട്ടൻ ഒരിക്കല്‍ പറഞ്ഞ ഒരു സ്‌റ്റേറ്റ്മെന്റ് ഉണ്ട്. ഒരു മൊബൈല്‍ പുള്ളി മേടിക്കും മുന്‍പേയത് മനോജേട്ടൻ മേടിച്ചത് കൊണ്ടുവന്ന് കാണിച്ചപ്പോള്‍, അന്ന് മൊത്തം മനോജ് ചേട്ടനെ കളിയാക്കി എന്നാണ്.
ശരീരത്തെക്കുറിച്ചും കാലിന് നീളം കുറവാണ് എന്ന് പറഞ്ഞ് മാനസികമായിട്ട് വേദനിപ്പിച്ചത്. അന്ന് എന്തുമാത്രം പുള്ളി വേദനിച്ചു കാണും. അത് മനോജ് ചേട്ടന്‍ കോമഡി ആയിട്ടാണ് പറയുന്നത്. ആ വേദന പോലും മമ്മുക്കയെ പ്ലീസ് ചെയ്‌തു കൊണ്ടാണ് പറയുന്നത്. കാരണം, അല്ലാത്ത രീതിയില്‍ പറഞ്ഞു കഴിഞ്ഞാല്‍, അടുത്ത ചാൻസ് കിട്ടത്തില്ല എന്ന് അറിയാം. ആ രീതിയിലാണ് പറയുന്നത്.
പക്ഷേ, എന്റെ ഒരു ക്യാരക്‌ടർ എന്താണെന്നു വച്ചാല്‍, ഞാൻ അതങ്ങ് തുറന്നു പറയും. അതുകൊണ്ട് തന്നെ എനിക്ക് ചാൻസ് കിട്ടില്ല. അല്ല, ഞാൻ ഇങ്ങനെ പറഞ്ഞു എന്ന് വിചാരിച്ച് വെറുപ്പൊന്നുമില്ല. എനിക്ക് മമ്മുക്കായെ ഭയങ്കര ഇഷ്‌ടമാണ്. എനിക്ക് ലാലേട്ടനെക്കാളും ഇഷ്‌ടം മമ്മുക്കായെ തന്നെയാണ്. ഇത് പറഞ്ഞെന്നു കരുതി അതിനകത്ത് വേറൊരു വിഷമത്തിന്റെ ആവശ്യമില്ല... ’’ എന്നാണ് ഫിറോസ് ഖാന്‍ പറയുന്നത്. ഒരു സ്വകാര്യ യൂട്യൂബ് ചാനലിന് നല്‍കിയ അഭിമുഖത്തിലാണ് താരത്തിന്റെ തുറന്നു പറച്ചില്‍.
Comments