ന്യൂഡൽഹി: ഇന്ത്യയുടെ ഹീറോ പൈലറ്റ് ക്യാപ്റ്റൻ സ്മിത്ത് മച്ഛാറിനെ അഭിനന്ദിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. സെപ്റ്റംബർ 30-ന് ഫ്ലൈദുബായ് വിമാനത്തിന്റെ കോക്ക്പിറ്റിനുള്ളിൽ നടന്ന "ഭീകരാക്രമണത്തെക്കുറിച്ച്" ക്യാപ്റ്റനുമായി സംസാരിച്ച ശേഷം, ഇസ്രായേലിന്റെ അടുത്ത സ്വാതന്ത്ര്യദിനത്തിൽ ആഘോഷ ജ്വാല തെളിയിക്കാൻ പ്രധാനമന്ത്രി നരേന്ദ്ര മോദിയെയും ഇന്ത്യൻ പൈലറ്റ് ക്യാപ്റ്റൻ സ്മിത്തിനെയും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു ക്ഷണിച്ചു.
ദുബായിൽ നിന്ന് ടെൽ അവീവിലേക്ക് പറന്ന ഫ്ലൈ ദുബായ് ഫ്ലൈറ്റ് FZ1073-ൽ വെച്ച് ഒമാനി വംശജനായ സഹപൈലറ്റിന്റെ ആക്രമണമുണ്ടായപ്പോൾ, ക്യാപ്റ്റൻ കാണിച്ച ധൈര്യത്തെയും സമചിത്തതയെയും നെതന്യാഹു പ്രശംസിച്ചു. ശനിയാഴ്ച നടന്ന ഫോൺ സംഭാഷണത്തിലാണ് ഇസ്രയേൽ പ്രധാനമന്ത്രി ഇന്ത്യൻ ക്യാപ്റ്റനുമേൽ അഭിനന്ദനവർഷം നടത്തിയത്.
"ഞങ്ങളുടെ അടുത്ത സ്വാതന്ത്ര്യദിനത്തിൽ ഒരു ആഘോഷ ജ്വാല തെളിയിക്കാൻ നിങ്ങളെയും എന്റെ പ്രിയ സുഹൃത്ത് പ്രധാനമന്ത്രി നരേന്ദ്ര മോദിയെയും ഞാൻ ക്ഷണിക്കാൻ ആഗ്രഹിക്കുന്നു. ഇന്ത്യയിലെയും ഇസ്രായേലിലെയും ധീരരായ ജനങ്ങളുടെ യഥാർത്ഥ വീരനായകനാണ് നിങ്ങൾ, അതോടൊപ്പം ലോകമെമ്പാടുമുള്ള ജനങ്ങളുടെയും വീരനായകനാണ്. നിങ്ങൾക്ക് എത്രയും വേഗം പൂർണ്ണ രോഗശാന്തി ഉണ്ടാകട്ടെ എന്ന് ഞാൻ ആശംസിക്കുന്നു," നെതന്യാഹു പറഞ്ഞു.
ആക്രമണ സമയത്ത് പൈലറ്റ് സ്വീകരിച്ച നിലപാടിൽ താൻ "അത്ഭുതപ്പെട്ടു" എന്ന് ഇസ്രായേൽ പ്രധാനമന്ത്രി പിന്നീട് കൂട്ടിച്ചേർത്തു. "സത്യസന്ധമായി പറഞ്ഞാൽ, അസാധ്യമായ സാഹചര്യങ്ങളിൽ നിങ്ങളുടെ ധൈര്യവും ചിന്താശേഷിയും കണ്ട് ഞാൻ അത്ഭുതപ്പെട്ടുപോയി," എന്നും നെതന്യാഹു പറഞ്ഞു.
Comments