കാര്‍ത്തിക് സുബ്ബരാജ് സംവിധാനം ചെയ്ത പുതിയ ചിത്രമാണ് ' ഡൊറോത്തി'. ചിത്രത്തിന്റെ പ്രൊമോഷനായി കേരളത്തിലെത്തിയ കാര്‍ത്തിക് സുബ്ബരാജ് മെഗാസ്റ്റാര്‍ മമ്മൂട്ടിയെ വീട്ടിലെത്തി സന്ദര്‍ശിച്ചു. ചിത്രത്തിലെ അഭിനേതാക്കളായ സനന്ത്, റിഷികാന്ത് എന്നിവരും അദ്ദേഹത്തോടൊപ്പമുണ്ടായിരുന്നു.മമ്മൂട്ടിക്കൊപ്പമുള്ള ചിത്രം സോഷ്യല്‍ മീഡിയയില്‍ പങ്കുവെച്ച കാര്‍ത്തിക് സുബ്ബരാജ്, തങ്ങള്‍ക്ക് നല്‍കിയ പിന്തുണയ്ക്കും സ്‌നേഹത്തിനും നന്ദി രേഖപ്പെടുത്തി.
'ഞങ്ങള്‍ക്കൊപ്പം ചെലവഴിച്ച സമയത്തിനും 'ഡൊറോത്തി' സിനിമയ്ക്കുള്ള ആശംസയ്ക്കും പ്രചോദിപ്പിക്കുന്ന വാക്കുകള്‍ക്കും നന്ദി മമ്മൂട്ടി സര്‍. നിങ്ങള്‍ എന്നും പ്രചോദനമാണ്', കാര്‍ത്തിക് സുബ്ബരാജ് സാമൂഹികമാധ്യമങ്ങളില്‍ പങ്കുവെച്ച ഫോട്ടോയ്ക്കൊപ്പം കുറിച്ചു.
തിയറ്ററുകളില്‍ മികച്ച പ്രതികരണം നേടി പ്രദര്‍ശനം തുടരുകയാണ് 'ഡൊറോത്തി'. കീര്‍ത്തി സുരേഷ് ആണ് ചിത്രത്തില്‍ നായിക.
ചിത്രം റിലീസായതിന് പിന്നാലെ സോഷ്യൽ മീഡിയയിൽ വലിയ സൈബർ ആക്രമണവും നടന്നിരുന്നു. സിനിമ ക്വീർ വിഭാഗത്തെ പിന്തുണയ്ക്കുന്നു എന്ന് ആരോപിച്ചായിരുന്നു വിമർശനം. പിന്നാലെ, സംവിധായകൻ പരോക്ഷ പ്രതികരണവുമായി രംഗത്തെത്തിയിരുന്നു.
തിയറ്ററിൽ നിന്നുള്ള പ്രേക്ഷകരുടെ പ്രതികരണത്തിന്റെ വീഡിയോ പങ്കുവെച്ച കാർത്തിക് സുബ്ബരാജ്, 'ശാന്തമായിരിക്കൂ, പ്രേക്ഷകരിൽ വിശ്വസിക്കൂ' എന്നും കുറിച്ചിരുന്നു. 1990കളിലെ തമിഴ്‌നാടൻ ഗ്രാമത്തിൽ നടക്കുന്ന കഥയാണ് ചിത്രം പറയുന്നത്. ടൊറന്റോ ഇന്റർനാഷണൽ ഫിലിം ഫെസ്റ്റിവലിലാണ് ചിത്രത്തിന്റെ വേൾഡ് പ്രീമിയർ നടന്നത്. ഇളയരാജയാണ് സംഗീത സംവിധാനം നിർവഹിച്ചിരിക്കുന്നത്.
Comments