ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിൽ നടന്ന പ്രതിഷേധത്തിനിടെ പൊലീസിന്റെ കസ്റ്റഡിയിലായ യുവാവിന്റെ രസകരമായ അപേക്ഷ സമൂഹമാധ്യമങ്ങളിൽ വൈറലാകുന്നു. മാധ്യമപ്രവർത്തകനാണെന്ന് അവകാശപ്പെടുന്ന അനൂജ് ഭഗാട്ടാണ് വനിതാ പൊലീസ് ഉദ്യോഗസ്ഥയോട് തന്നെ വിട്ടയക്കണമെന്ന് ആവർത്തിച്ച് അപേക്ഷിച്ചത്. പൊലീസ് വാഹനത്തിനുള്ളിൽ നിന്നുള്ള ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്.
വാഹനത്തിന്റെ വാതിൽ അടച്ചുപിടിച്ച് നിൽക്കുന്ന വനിതാ പൊലീസ് ഉദ്യോഗസ്ഥയോടാണ് അനൂജ് ‘ദീദി, ചെറിയ അനുജനുവേണ്ടി ഇത്രയും ചെയ്യാൻ കഴിയില്ലേ’ എന്ന തരത്തിൽ അപേക്ഷിക്കുന്നത്. പുറത്തുനിന്ന് മറ്റ് പ്രതിഷേധക്കാർ വാതിൽ തുറക്കാൻ ശ്രമിക്കുന്നതിനിടെയായിരുന്നു യുവാവിന്റെ അപേക്ഷ. പൊലീസുകാരിയെ സഹോദരിയായി കാണുന്നുവെന്നും അവരെ ബഹുമാനിക്കുന്നുവെന്നും പറഞ്ഞുകൊണ്ട് വിടുതൽ ആവശ്യപ്പെടുകയായിരുന്നു അനൂജ്.
‘ഡൽഹി പൊലീസിലെ വനിതകൾക്ക് സല്യൂട്ട്’ എന്നും ഉദ്യോഗസ്ഥ തന്റെ ജോലി കൃത്യമായി ചെയ്യുകയാണെന്നും യുവാവ് പറയുന്നുണ്ട്. ഇതിനിടെ മറ്റൊരു വനിതാ പൊലീസ് ഉദ്യോഗസ്ഥ കൂടി വാതിൽ അടച്ചുപിടിക്കാൻ എത്തുന്നതും വീഡിയോയിൽ കാണാം. ‘ഞങ്ങൾ മാധ്യമപ്രവർത്തകരാണ്, ഞങ്ങൾ ഒന്നും ചെയ്യുന്നില്ല’ എന്ന് പറഞ്ഞും അനൂജ് പൊലീസുകാരോട് തന്നെ വിട്ടയക്കണമെന്ന് ആവശ്യപ്പെടുന്നുണ്ട്. പ്രതിഷേധത്തിനിടയിലെ ഈ സംഭാഷണമാണ് വീഡിയോയെ രസകരമായ വൈറൽ ദൃശ്യമായി മാറ്റിയത്.
ഗ്യാനേഷ് കുമാറിന്റെ രാജിയും വോട്ടർപട്ടികയിലെ പ്രത്യേക തീവ്ര പരിഷ്കരണം നിർത്തിവയ്ക്കണമെന്നും ആവശ്യപ്പെട്ടാണ് ഡൽഹിയിൽ പ്രതിഷേധങ്ങൾ നടന്നത്. ഒക്ടോബർ നാലിന് ജന്തർ മന്തറിലേക്ക് മാർച്ച് നടത്താൻ ശ്രമിച്ച പ്രതിഷേധക്കാരെ പൊലീസ് തടഞ്ഞിരുന്നു. തുടർന്ന് നിരവധി പ്രതിഷേധക്കാരെ കസ്റ്റഡിയിലെടുത്ത് വിവിധ ബസുകളിലായി മാറ്റിയിരുന്നു. ഇതിനിടെയാണ് അനൂജിന്റെ ‘ദീദി’ വിളിച്ചുള്ള അപേക്ഷയുടെ വീഡിയോ സമൂഹമാധ്യമങ്ങളിൽ ശ്രദ്ധ നേടിയത്.
Comments