മലയാളത്തിന്റെ ഏറെ പ്രിയപ്പെട്ട താരദമ്പതികളാണ് ദിലീപും കാവ്യ മാധവനും. വെള്ളിത്തിരയിൽ കാവ്യയുടെ ആദ്യ നായകൻ ദിലീപായിരുന്നു. പിന്നീട് കാവ്യയുടെ ജീവിതത്തിലും ദിലീപ് തന്നെ നായകനായി. ദിലീപിന്റെയും കാവ്യയുടെയും രണ്ടാം വിവാഹമാണിത്. ഇവർക്ക് മഹാലക്ഷ്മി എന്നൊരു മകൾ കൂടിയുണ്ട്.
വിവാഹശേഷം സിനിമയില്‍ നിന്നും വിട്ടുനില്‍ക്കുന്ന കാവ്യ, പൊതുവേദികളില്‍ നിന്ന് അകലം പാലിച്ച്, വളരെ വിരളമായി മാത്രമേ പൊതുചടങ്ങുകളില്‍ പ്രത്യക്ഷപ്പെടാറുള്ളൂ. ലക്ഷ്യ എന്ന തന്റെ വസ്ത്രബ്രാൻഡിന്റെ മോഡലായി കാവ്യ സോഷ്യൽ മീഡിയയിൽ എത്താറുണ്ട്. അതല്ലാതെ സുഹൃത്തുക്കളുടെയും അടുത്ത ബന്ധുക്കളുടെയും വിവാഹ സല്‍ക്കാരങ്ങളിലും കുടുംബച്ചടങ്ങുകളിലും ദിലീപിനൊപ്പം എത്തുമ്പോഴാണ് കാവ്യ ക്യാമറക്കണ്ണുകൾക്ക് മുന്നിലെത്തുന്നത്. ഇരുവരും ഒന്നിച്ചെത്തുന്ന നിമിഷങ്ങൾ ഓണ്‍ലൈനില്‍ ശ്രദ്ധ നേടാറുണ്ട്.
ഇപ്പോഴിതാ ദിലീപിന്റെ ഉടമസ്ഥതയിലുള്ള റസ്റ്റോറന്റ് ശൃംഖലയായ 'ദേ പുട്ടി'ന്റെ ചെന്നൈ ബ്രാഞ്ചിന്റെ ഉദ്ഘാടനത്തിന് ദിലീപിനൊപ്പം താനും മാമാട്ടിയും എത്തിയ ചിത്രങ്ങൾ പങ്കിടുകയാണ് കാവ്യ. മൂന്നുപേരും ഒന്നിച്ചുള്ള കുടുംബ ചിത്രമാണ് കാവ്യ പങ്കിട്ടിരിക്കുന്നത്. പർപ്പിളിൽ റെഡ് ബോർഡറുള്ള പട്ടുസാരിയും റെഡ് ചോക്കർ നെക്ലേസും അണിഞ്ഞ് തലയിൽ മുല്ലപ്പൂവും ധരിച്ച് തനി നാടൻ സ്റ്റൈലിലാണ് കാവ്യ ചിത്രങ്ങളിൽ തിളങ്ങുന്നത്. അതേ പറ്റേണിലുള്ള പാട്ടുപാവാടയാണ് മഹാലക്ഷ്മി ധരിച്ചിരിക്കുന്നത്. കസവു മുണ്ടും വെള്ള ഷർട്ടുമാണ് ദിലീപിന്റെ വേഷം. താരകുടുംബത്തിന്റെ പുത്തൻ ചിത്രങ്ങൾ കണ്ട സന്തോഷത്തിലാണ് ആരാധകർ.
ജഗൻ ഷാജി കൈലാസ് ആദ്യമായി സംവിധാനം ചെയ്യുന്ന 'നീക്കം' എന്ന ബിഗ് ബജറ്റ് ചിത്രത്തിന്റെ റിലീസിനായുള്ള കാത്തിരിപ്പിലാണ് ദിലീപ്. ദിലീപിനൊപ്പം ബിനു പപ്പു, ബിലാസ് ചന്ദ്രൻ, അശോകൻ, ശാരി, സിദ്ദിഖ്, കലാഭവൻ ഷാജോണ്‍, സാദിഖ്, ഡ്രാക്കുള സുധീർ, കോട്ടയം രമേഷ്, ഷെല്ലി എന്നിവരും ചിത്രത്തിലുണ്ട്.
നിർമ്മാതാക്കള്‍ തമ്മിലുള്ള സാമ്പത്തിക തർക്കത്തെ തുടർന്ന് മദ്രാസ് ഹൈക്കോടതി 'നീക്ക'ത്തിന്റെ റിലീസ് താത്ക്കാലികമായി തടഞ്ഞിരിക്കുകയാണ്.
Comments