ബിഗ്സ്ക്രീനില്‍ ചില താരങ്ങളുടെ കെമിസ്ട്രി കാണുമ്പോള്‍ ഇവര്‍ റിയല്‍ ലൈഫിലും ഒരുമിച്ചിരുന്നെങ്കിലെന്ന് ആരാധകര്‍ ആഗ്രഹിക്കാറുണ്ട്. അത്തരത്തില്‍ സഹതാരങ്ങളിൽ നിന്ന് ജീവിതപങ്കാളികളെന്ന പദവിയിലേക്ക് എത്തിയ താരദമ്പതിമാരാണ് വിജയ് ദേവരകൊണ്ടയും രാശ്മിക മന്ദാനയും. ഇവരുടെ പ്രണയവും വിവാഹവും സോഷ്യല്‍ മീഡിയയിലൂടെ പങ്കിടുന്ന ചിത്രങ്ങളുമെല്ലാം ആരാധകര്‍ ആഘോഷമാക്കിയതാണ്. വിവാഹശേഷം ഇരുവരും ഒരുമിച്ചഭിനയിക്കുന്ന ആദ്യ ചിത്രമായ ‘രണബാലി’ ഒക്ടോബർ 16-നാണ് തിയേറ്ററുകളിൽ റിലീസ് ചെയ്യാൻ ഒരുങ്ങുകയാണ്. 1876-78 കാലഘട്ടത്തിലെ മദ്രാസിന്റെ പശ്ചാത്തലത്തിൽ ഒരുക്കിയ ഈ ചിത്രത്തിന്റെ റിലീസിന് മുന്നോടിയായുള്ള പ്രചാരണത്തിന്റെ തിരക്കിലാണ് ഇരുവരും.
ഇപ്പോഴിതാ സിനിമയുടെ പ്രൊമോഷന്റെ ഭാഗമായി നല്‍കിയ അഭിമുഖത്തില്‍ പ്രണയത്തെക്കുറിച്ചും സ്നേഹത്തെക്കുറിച്ചും വിജയ് ദേവരകൊണ്ടയും രാശ്മികയും പറഞ്ഞ കാര്യങ്ങളാണ് ആരാധകര്‍ ഏറ്റെടുക്കുന്നത്. പ്രണയത്തിൽ രശ്മികയ്ക്കാണ് പക്വത കൂടുതലെന്ന് വിജയ്, ദിവസം കുറഞ്ഞത് 10–15 തവണയെങ്കിലും രാശ്മിക തന്നോട് ഐ ലവ് യൂ പറയാറുണ്ടെന്നും പറയുന്നു.
‘‘ഞങ്ങളുടെ ബന്ധത്തിലും പ്രണയത്തിലും ദൈവത്തിന്റെ കയ്യുണ്ടെന്ന് എനിക്ക് തോന്നുന്നു. അങ്ങനെയാണ് ഞങ്ങൾ ഈ ഘട്ടത്തിലെത്തിയത്. ബന്ധങ്ങളുടെ കാര്യത്തിൽ രശ്മിക കൂടുതൽ പക്വതയുള്ളയാളാണ്. അവൾ പറയുന്നതിനെക്കുറിച്ച് പറഞ്ഞാല്‍, ദിവസം കുറഞ്ഞത് 10–15 തവണയെങ്കിലും അവൾ എന്നോട് ‘ഐ ലവ് യു’ എന്ന് പറയും. ഞാനും അത് തിരികെ പ്രകടിപ്പിക്കേണ്ടത് പ്രധാനമാണെന്ന് അവൾ എന്നെ ഓർമിപ്പിക്കും. അവളോട് മനസ്സിൽ സ്നേഹമുണ്ടെങ്കിലും അത് വാക്കുകളിലൂടെ പുറത്തുപറയേണ്ടതില്ലെന്ന് കരുതിയിരുന്ന വ്യക്തിയായിരുന്നു ഞാൻ, എന്നാൽ അത്തരം ചെറിയ കാര്യങ്ങളാണ് ജീവിതത്തിൽ പ്രധാനമെന്ന് രശ്മികയാണ് പഠിപ്പിച്ചത്....
28 വയസ്സിലൊക്കെ പ്രണയം എന്നത് സിനിമകളിലും മറ്റും ഉപയോഗിക്കുന്ന ഒരു ‘മാർക്കറ്റിങ് വാക്ക്’ മാത്രമാണെന്നാണ് ഞാൻ വിചാരിച്ചിരുന്നത്. എന്നാൽ പ്രായവും അനുഭവങ്ങളും നൽകിയ പക്വതയാണ് ആ ചിന്ത മാറ്റിയത്. അമ്മ മക്കൾക്ക് നൽകുന്ന സ്നേഹം പോലെ, മറ്റൊരാൾക്ക് വേണ്ടി സ്വന്തം സന്തോഷങ്ങളെ മറക്കുന്ന നിസ്വാർത്ഥമായ സ്നേഹമുണ്ട്. അതിനെ ഒരിക്കലും വിലകുറച്ച് കാണരുത്. ബഹുമാനത്തോടെ പരിപോഷിപ്പിക്കണം. ആദ്യ കാഴ്ചയിലെ പ്രണയത്തിൽ ഞാൻ വിശ്വസിക്കുന്നില്ല. ഒരാൾ നമ്മുടെ ജീവിതപങ്കാളിയാകാൻ അനുയോജ്യനാണോ എന്ന് തിരിച്ചറിയാൻ സമയവും ഒരുമിച്ചുള്ള യാത്രയും ആവശ്യമാണ്. എനിക്ക് 36 വയസ്സായപ്പോഴാണ് വിവാഹജീവിതത്തിലേക്ക് കടക്കാൻ ഞാൻ മാനസികമായി പൂർണ്ണ സജ്ജനായെന്ന് തോന്നിയത്...’’ വിജയ് പറഞ്ഞു.
‘‘വിവാഹം കഴിഞ്ഞാലും, കുട്ടികളുണ്ടായാലും ‘സുപ്രഭാതം’ പറയുന്നതിലും ‘ഇന്നത്തെ ദിവസം എങ്ങനെയുണ്ടായിരുന്നു’ എന്ന് ചോദിച്ചറിയുന്നതിലും മാറ്റമുണ്ടാകരുത്. പങ്കാളിയുടെ സാന്നിധ്യത്തെ വളരെ സ്വാഭാവികമായി കണ്ട് നിസ്സാരവൽക്കരിക്കുമ്പോൾ മാത്രമാണ് ദാമ്പത്യത്തിൽ അകൽച്ചകൾ തുടങ്ങുന്നത്. നിർബന്ധത്തിന് വഴങ്ങിയാകരുത്, ഉള്ളിൽ നിന്നുള്ള യഥാർത്ഥ ആഗ്രഹത്തോടെ വേണം ഈ ചെറിയ കാര്യങ്ങൾ ചെയ്യാൻ...’’ എന്നാണ് രാശ്മിക പറഞ്ഞത്. സ്നേഹബന്ധങ്ങളിൽ തുടർച്ചയായ ശ്രമങ്ങൾ നടത്തേണ്ടതിന്റെ ആവശ്യകതയെക്കുറിച്ച് ഒരു പോഡ്കാസ്റ്റിലാണ് താരദമ്പതിമാര്‍ സംസാരിച്ചത്.
ഗീത ഗോവിന്ദം, ഡിയർ കൊമ്രേഡ് എന്നീ വൻ വിജയങ്ങൾക്ക് ശേഷം വിജയ് ദേവരകൊണ്ടയും രശ്മിക മന്ദാനയും ബിഗ് സ്ക്രീനിൽ ഒന്നിക്കുന്ന ‘രണബാലി’ എന്ന ചിത്രത്തിനായി കാത്തിരിക്കുകയാണ് ആരാധകർ. രാഹുൽ സങ്കൃത്യൻ സംവിധാനം ചെയ്യുന്ന ഈ പിരീഡ് ആക്ഷൻ ഡ്രാമ മൈത്രി മൂവി മേക്കേഴ്സിന്റെ ബാനറിലാണ് നിർമ്മിക്കുന്നത്.
Comments