ശമ്പളത്തിന്റെ പകുതിയിലേറെ വാടകയ്ക്ക്; ജോലി സ്ഥലത്തുനിന്ന് നാല് മിനിറ്റ് അകലെയുള്ള വീട് വിട്ടുപോകില്ലെന്ന് യുവതി, വൈറൽ

ഗുരുഗ്രാമിൽ ശമ്പളത്തിന്റെ പകുതിയിലേറെയും വീട്ടുവാടകയ്ക്കായി ചെലവഴിച്ചിട്ടും വീട് മാറാൻ തയ്യാറല്ലെന്ന് വ്യക്തമാക്കി യുവതി. ജോലി ചെയ്യുന്ന സ്കൂളിൽനിന്ന് വെറും നാല് മിനിറ്റ് നടന്നാൽ എത്താവുന്ന ദൂരത്താണ് യുവതി താമസിക്കുന്നത്. സാമ്പത്തികമായി നോക്കുമ്പോൾ ഈ തീരുമാനം ശരിയല്ലെന്ന് പലരും പറയാമെങ്കിലും സമയവും ഊർജവും മനഃസമാധാനവും സംരക്ഷിക്കാനാണ് ഉയർന്ന വാടക നൽകുന്നതെന്നാണ് യുവതി പറയുന്നത്. യുവതിയുടെ സമൂഹമാധ്യമ പങ്കുവെപ്പ് ഇപ്പോൾ വലിയ ചർച്ചയായിരിക്കുകയാണ്.

സ്കൂളിലെ ഇടവേളകളിൽ വീട്ടിലെത്തി ചൂടുള്ള ഭക്ഷണം കഴിക്കാനും ബാക്കി ജോലികൾ പൂർത്തിയാക്കാനും കഴിയുന്ന തരത്തിലാണ് വീടിന്റെ സൗകര്യം. രാവിലെ ജോലിക്ക് പോകാൻ തിരക്കിട്ട് ഒരുങ്ങേണ്ടതില്ലെന്നും ദീർഘനേരം ഓട്ടോറിക്ഷയിലോ മെട്രോയിലോ യാത്ര ചെയ്യേണ്ടി വരുന്നില്ലെന്നും യുവതി പറയുന്നു. കുറച്ചുകൂടി അകലെയുള്ള പ്രദേശത്തേക്ക് മാറിയാൽ കുറഞ്ഞ വാടകയ്ക്ക് വീട് ലഭിക്കുമായിരുന്നെങ്കിലും ആ വഴി തിരഞ്ഞെടുക്കാൻ താൻ തയ്യാറായില്ലെന്നും അവർ വ്യക്തമാക്കി.

വാടകയ്ക്കായി ശമ്പളത്തിന്റെ പകുതിയിലേറെ ചെലവാകുന്നുണ്ടെങ്കിലും അതിനെ വെറും വീട്ടുവാടകയായി കാണുന്നില്ലെന്നാണ് യുവതിയുടെ നിലപാട്. പകരം സ്വന്തം സമയത്തിനും സുരക്ഷയ്ക്കും സമാധാനത്തിനും ഊർജത്തിനുമാണ് താൻ പണം ചെലവഴിക്കുന്നതെന്നാണ് അവർ പറയുന്നത്. ലാഭിക്കാനാകുന്ന പണം നിക്ഷേപിക്കുന്നതിന് പകരം ഇരുപതുകളിലെ വരുമാനത്തിന്റെ ഒരു ഭാഗം സ്വന്തം ജീവിതം കൂടുതൽ എളുപ്പമാക്കുന്നതിനായി ഉപയോഗിക്കുകയാണെന്നും യുവതി പറഞ്ഞു. ഒഴിവാകുന്ന സമയത്ത് പുതിയ കാര്യങ്ങൾ പഠിക്കാനും സമൂഹമാധ്യമങ്ങൾക്കായി ഉള്ളടക്കം തയ്യാറാക്കാനും കഴിയുന്നുണ്ടെന്നും അവർ വ്യക്തമാക്കി.

യുവതിയുടെ അഭിപ്രായങ്ങൾ സമൂഹമാധ്യമങ്ങളിൽ സമ്മിശ്ര പ്രതികരണങ്ങൾക്കാണ് വഴിവെച്ചത്. അധിക വാടക നൽകുന്നത് മനഃസമാധാനത്തിനും സമയലാഭത്തിനും വേണ്ടിയാണെങ്കിൽ അതിന് വിലയുണ്ടെന്ന് ചിലർ അഭിപ്രായപ്പെട്ടു. സമയത്തിനും പണത്തിന് തുല്യമായ പ്രാധാന്യമുണ്ടെന്നും ജീവിതനിലവാരം മെച്ചപ്പെടുത്താൻ ഇത്തരം തീരുമാനങ്ങൾ സഹായിക്കുമെന്നും മറ്റുചിലർ ചൂണ്ടിക്കാട്ടി. എന്നാൽ ശമ്പളത്തിന്റെ പകുതിയിലേറെ വാടകയ്ക്കായി നൽകുന്നത് സാമ്പത്തികമായി വലിയ ബാധ്യതയാണെന്ന വിമർശനവും ഉയർന്നു.