തിരുവനന്തപുരം: മന്ത്രി ഒ ജെ ജനീഷിനും ഷാഫി പറമ്പില്‍ എം പിക്കുമെതിരെ നിയമ നടപടിയുമായി എസ്എഫ്‌ഐ. ജനീഷിനും ഷാഫി പറമ്പിലിനുമെതിരെ കേസെടുക്കണമെന്നാവശ്യപ്പെട്ട് എസ്എഫ്‌ഐ മ്യൂസിയം പൊലീസില്‍ പരാതി നല്‍കി. യൂണിവേഴ്സിറ്റി ഹോസ്റ്റല്‍ സംഘര്‍ഷവുമായി ബന്ധപ്പെട്ടാണ് എസ്എഫ്‌ഐയുടെ നടപടി. വിദ്യാര്‍ത്ഥികളെ ആക്രമിക്കാന്‍ നേതൃത്വം നല്‍കിയ കന്റോണ്‍മെന്റ് സി ഐ സതീഷ് കുമാര്‍, എസ് ഐ ഗോകുല്‍ ഗോപന്‍ എന്നിവര്‍ക്കെതിരെ വധശ്രമത്തിന് കേസെടുക്കണമെന്നും എസ്എഫ്‌ഐ ആവശ്യപ്പെട്ടു.
മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ പുറത്താക്കണമെന്നാവശ്യപ്പെട്ട് യൂത്ത് കോൺഗ്രസ് സംസ്ഥാന അധ്യക്ഷനും മന്ത്രിയുമായ ഒ.ജെ. ജനീഷ്, ഷാഫി പറമ്പിൽ എം.പി. എന്നിവരുടെ നേതൃത്വത്തിൽ നടത്തിയ ‘റെസിസ്റ്റൻസ് മാർച്ച്’ യൂണിവേഴ്സിറ്റി ഹോസ്റ്റലിന് മുന്നിൽ എത്തിയതോടെയാണ് വലിയ സംഘർഷമുണ്ടായത്. മാർച്ചിനിടെ യൂത്ത് കോൺഗ്രസ് പ്രവർത്തകർ ഹോസ്റ്റൽ കോമ്പൗണ്ടിലേക്ക് തീപ്പന്തം എറിഞ്ഞത് സംഭവം കൂടുതല്‍ വഷാളയാക്കിയിരുന്നു. സ്ഥലത്തെത്തിയ വലിയ പൊലീസ് സന്നാഹം എസ്.എഫ്.ഐ. സംസ്ഥാന സെക്രട്ടറി പി.എസ്. സഞ്ജീവ് അടക്കമുള്ളവരുടെ സാന്നിധ്യത്തിൽ വിദ്യാർത്ഥികൾക്ക് നേരെ ഏകപക്ഷീയമായ ആക്രമണം അഴിച്ചുവിടുകയായിരുന്നു. പൊലീസ് ആക്രമണത്തിൽ മൂന്ന് വിദ്യാർത്ഥികൾക്ക് പരിക്കേറ്റിരുന്നു.
അതേസമയം സംഭവത്തിന് പിന്നാലെ കന്റോൺമെന്റ് സി.ഐക്കും എസ്.ഐക്കുമെതിരെ പി.എസ്. സഞ്ജീവ് രൂക്ഷ വിമർശനവുമായി രംഗത്തെത്തിയിരുന്നു. ഹോസ്റ്റലിലെ വിദ്യാർത്ഥിയെ എസ്.ഐ. ഗോകുൽ ഗോപൻ ലാത്തികൊണ്ട് ക്രൂരമായി അടിക്കുന്ന ദൃശ്യങ്ങൾ പുറത്തുവന്നതോടെ പ്രതിഷേധം ശക്തമായി. ഇതിന് പിന്നാലെ എസ്.എഫ്.ഐ. തിരുവനന്തപുരം ജില്ലാ സെക്രട്ടറിയെ ഭീഷണിപ്പെടുത്തിക്കൊണ്ടുള്ള എസ്.ഐയുടെ ഫോൺ സംഭാഷണവും, സി.ഐയുടെ ഫേസ്ബുക്ക് പോസ്റ്റും പുറത്തുവന്നത് വലിയ വിവാദമായി. ഉദ്യോഗസ്ഥർക്കെതിരെ ഒക്ടോബർ പത്തിനുള്ളിൽ കർശന നടപടി സ്വീകരിച്ചില്ലെങ്കിൽ ശക്തമായ സമരപരിപാടികളുമായി മുന്നോട്ട് പോകുമെന്നും എസ്.എഫ്.ഐ. മുന്നറിയിപ്പ് നൽകിയിട്ടുണ്ട്.
Comments