ബ്യൂണസ് ഐറിസ്: അര്‍ജന്റീനയ്ക്കായി അവസാനമത്സരത്തിലും മിന്നി ലിയോണേല്‍ മെസ്സി. താരത്തിന്റെ വിടവാങ്ങല്‍ മത്സരത്തില്‍ ബെനിനെ ഏകപക്ഷീയമായ മൂന്ന് ഗോളുകള്‍ക്ക് തോല്‍പ്പിച്ചു. ആദ്യ രണ്ടുഗോളുകള്‍ക്കും അസിസ്റ്റ് ചെയ്ത മെസ്സി പെനാല്‍റ്റിയിലൂടെ മൂന്നാംഗോളിന് അര്‍ഹനാകുകയും ചെയ്തു. ഒട്ടാമെന്‍ഡിയും നിക്കോളാസ് പാസും മെസ്സിയുമായിരുന്നു അര്‍ജന്റീനയുടെ സ്‌കോറര്‍മാര്‍.
ഫൈനല്‍ വിസില്‍ വന്ന് ഒടുവില്‍ ആരാധകരെ കണ്ണീരിലാഴ്ത്തിക്കൊണ്ട് മെസി അര്‍ജന്റീനയ്ക്കായുള്ള കുതിപ്പ് അവസാനിപ്പിച്ചു. വികാരനിര്‍ഭരമായ രംഗമായിരുന്നു മോനുമെന്റല്‍ സ്റ്റേഡിയത്തില്‍ അരങ്ങേറിയത്. ലോകത്തുടനീളമുള്ള അര്‍ജന്റീനയുടേയും തന്റേയും ആരാധകരെ കൈവീശി അഭിവാദ്യം ചെയ്യുകയും അവര്‍ നല്‍കിയ പിന്തുണയ്ക്ക് നന്ദി പറയുകയും ചെയ്തപ്പോള്‍ താരം തന്നെ വികാരാധീനനായി.
അര്‍ജന്റീന ദേശീയ ടീമിനൊപ്പമുള്ള മെസ്സിയുടെ അവസാന മത്സരത്തിന്റെ യാഥാര്‍ത്ഥ്യം ഉള്‍ക്കൊള്ളാനാവാതെ എന്‍സോ ഫെര്‍ണാണ്ടസ് ഉള്‍പ്പെടെയുള്ള നിരവധി താരങ്ങള്‍ കണ്ണീരണിഞ്ഞു. അര്‍ജന്റീനയുടെ ചരിത്രത്തിലെ ഏറ്റവും മികച്ച നിമിഷങ്ങള്‍ സമ്മാനിച്ച തങ്ങളുടെ പ്രിയ നായകനെ ആദരിക്കാന്‍ ഒത്തുകൂടിയ ആരാധകര്‍ മത്സരത്തില്‍ ഉടനീളം മെസ്സി...എന്ന് വിളിച്ചുകൊണ്ടിരുന്നു.
മത്സരത്തില്‍ അനേകം തവണ ഫ്രീകിക്കുകള്‍ കിട്ടിയെങ്കിലും താരത്തിന്റെ കിക്ക് ബെനിന്‍ ഗോള്‍കീപ്പര്‍ തടഞ്ഞു. ഒടുവില്‍ അര്‍ജന്റീനയ്ക്ക് ലഭിച്ച പെനാല്‍റ്റിയില്‍ മെസ്സി ബെനിന്‍ ഗോള്‍കീപ്പറെ തെറ്റായ ദിശയിലേക്ക് കബളിപ്പിച്ച് കൃത്യമായ ഷോട്ടിലൂടെ ഗോട്ട് വലകുലുക്കി.
പകരക്കാരനായി ഇറങ്ങി മിനിറ്റുകള്‍ക്കകം നിക്കോ പാസിന് രണ്ടാംഗോള്‍ നേടാന്‍ അവസരം ഒരുക്കിയത് മെസ്സിയായിരുന്നു. മെസ്സിയുടെ മികച്ച പാസില്‍ നിന്നായിരുന്നു ഗോള്‍. ഇത് താരത്തിന്റെ മത്സരത്തിലെ രണ്ടാം അസിസ്റ്റ് ആയിരുന്നു. ആദ്യഗോള്‍ നേടാന്‍ ഒട്ടാമെന്‍ഡിക്ക് പന്ത് കിട്ടിയതും മെസ്സിയില്‍ നിന്നുമായിരുന്നു. താരം ബോക്‌സിലേക്ക് ഉയര്‍ത്തിവിട്ട കോര്‍ണറില്‍ നിന്നുമായിരുന്നു ഒട്ടാമെന്‍ഡി ഗോള്‍ നേടിയത്. രണ്ടാം പകുതി തുടങ്ങി മിനിറ്റുകള്‍ക്കകമായിരുന്നു ഈ ഗോള്‍ വന്നത്. മെസ്സിയെ തോളിലേറ്റിയാണ് ഒട്ടാമെന്‍ഡി ഈ ഗോള്‍ ആഘോഷിച്ചത്.
Comments